തിരുവനന്തപുരം: തെരഞ്ഞെടുപ്പ് വന്നതുകൊണ്ടാണ് ഇടതുപക്ഷം സിഎഎ ചര്ച്ചാവിഷയമാക്കിയിരിക്കുന്നതെന്ന ആരോപണം തള്ളി മുഖ്യമന്ത്രി പിണറായി വിജയന്. നാലു വര്ഷം മുമ്പ് തെരഞ്ഞെടുപ്പ് ഇല്ലാതിരുന്ന സമയത്തും തങ്ങള് ഇതേ വിഷയത്തിന് പ്രതിരോധവുമായി എത്തിയവരാണെന്നും അന്ന് സുപ്രീംകോടതിയിലേക്ക് വരെ പോയെന്നും പിണറായി വിജയന് പറഞ്ഞു.
എല്ഡിഎഫ് സിഎഎ വിഷയം ഉന്നയിക്കുന്നത് തിരഞ്ഞെടുപ്പ് ലക്ഷ്യം വച്ചാണെന്ന ആരോപണങ്ങള്ക്കായിരുന്നു പിണറായിയുടെ മറുപടി. നാലു വര്ഷം മുമ്പ് ഇതില് പ്രതികരണം നടത്തിയവരായിരുന്നു ഇടതുപക്ഷം. എന്നാല് കോണ്ഗ്രസിന് ഇപ്പോഴും സിഎഎയില് പ്രതികരണമില്ല. രാജ്യത്തുള്ള എല്ലാ വിഷയങ്ങളിലും പ്രതികരിച്ച രാഹുല് ഗാന്ധിയും ഇതില് പ്രതികരിച്ചില്ല. സിപിഐഎം ഇറക്കിയ പ്രകടനപത്രിയില് പൗരത്വ നിയമത്തിനെതിരെ പറഞ്ഞു. എന്നാല് കോണ്ഗ്രസിന്റെ പ്രകടനപത്രികയില് മിണ്ടാട്ടമില്ലെന്നും ഒരു പാര്ട്ടി എന്ന നിലയില് പ്രതികരിക്കേണ്ടതില്ലേ. എത്ര പരിഹാസ്യമാണ് ഇതെന്നും മുഖ്യമന്ത്രി ചോദിച്ചു.
നേരത്തേ ഈവിഷയത്തെക്കുറിച്ച് ചോദിച്ചപ്പോള് എട്ടാം പേജ് നോക്കാനായിരുന്നു പ്രതിപക്ഷ നേതാവിന്റെ ഉപദേശം. പൗരത്വ നിയമഭേദഗതി എന്ന ഒരു കാര്യമേ ആ പേജിലില്ല. എത്രമാത്രം വസ്തുതാ വിരുദ്ധമായ കാര്യമാണ് കോണ്ഗ്രസ് പറയുന്നതെന്നും കൂട്ടിച്ചേര്ത്ത് മുഖ്യമന്ത്രി എങ്ങനെയാണ് കോണ്ഗ്രസിന് സംഘപരിവാര് മനസ്സ് വരുന്നതെന്ന് ചോദിച്ചു. കിഫ്ബി, തോമസ് ഐസക്ക് വിഷയങ്ങളില് കോണ്ഗ്രസ് ആരുടെ കൂടെയാണെന്ന് ചോദിച്ച മുഖ്യമന്ത്രി, പ്രതിപക്ഷം എന്ഫോഴ്സ്മെന്റ് ഡയറക്ടറേറ്റിന്റെ കൂടെയാണെന്നും ആരോപിച്ചു.
