കൊച്ചി: സിവില് സര്വീസ് പരീക്ഷയില് ദേശീയ തലത്തില് നാലാം റാങ്ക് നേടി സംസ്ഥാനത്തിന്റെ അഭിമാനമായ കൊച്ചി സ്വദേശി സിദ്ധാര്ഥ് രാംകുമാറിന്റെ വീട്ടില് സന്തോഷത്തിന്റെ അലയൊലികള് ഒഴിഞ്ഞിട്ടില്ല. പള്ളിമുക്കിനടുത്ത് ദിവാന്സ് റോഡിലെ കടത്തനാട് വീട്ടില് പ്രതികരണം ആരാഞ്ഞ് എത്തുന്ന മാധ്യമപ്രവര്ത്തകര് ഉള്പ്പെടെയുള്ളവരോട് അമിതാഹ്ലാദമില്ലാതെ മറുപടി നല്കി പിതാവ് ടി.എന്. രാംകുമാറും മാതാവ് രതിയും. സിദ്ധാര്ഥിന്റെ അച്ഛന്, അമ്മ, സഹോദരന് ആദര്ശ്, ആദര്ശിന്റെ ഭാര്യ ലക്ഷ്മി, മകന് വിവസ്വാന് എന്നിവരാണ് എറണാകുളത്തെ വീട്ടിലുള്ളത്.
അഞ്ചാം ശ്രമത്തിലാണ് സിദ്ധാര്ഥ് മിന്നുന്ന നേട്ടം സ്വന്തമാക്കിയത്. കഴിഞ്ഞ പരീക്ഷയില് 121-ാം റാങ്ക് നേടിയിരുന്നു. വടുതല ചിന്മയ സ്കൂളിലായിരുന്നു സിദ്ധാര്ഥിന്റെ സ്കൂള് വിദ്യാഭ്യാസം. തിരുവനന്തപുരത്തെ കോളജ് ഓഫ് ആര്കിടെക്ചറില്നിന്ന് 2019 ല് ആര്ക്കിടെക്ചര് ബിരുദം പൂര്ത്തിയാക്കി. അന്നു മുതല് സിവില് സര്വിസ് മോഹങ്ങളുടെ പിന്നാലെയായിരുന്നു. 2019 ല് പ്രിലിമിനറി കടക്കാനായില്ല. 2020 ല് റിസര്വ് ലിസ്റ്റില് ഇടംപിടിച്ചു. ഇന്ത്യന് പോസ്റ്റ് ആന്ഡ് ടെലികോം അക്കൗണ്ട്സ് ആന്ഡ് ഫിനാന്സ് സര്വീസില് ജോലി ലഭിച്ചു.
ജോലിക്കിടെ പരിശീലനത്തിനു സമയം കണ്ടെത്തി. 2021 ല് വീണ്ടും സിവില് സര്വീസ് എഴുതി. അത്തവണ തേടിയിയെത്തിയത് 181-ാം റാങ്ക്. ഇതോടെ ഐ.പി.എസ് ലിസ്റ്റില് ഇടംപിടിച്ചു. ഐ.എ.എസ് സ്വപ്നം വിടാതെ, ഹൈദരാബാദില് ഐ.പി.എസ്. ട്രെയിനിങ്ങിലേക്കു സിദ്ധാര്ഥ് കടന്നു. ചിട്ടയായ പഠനവും മോക്ക് ടെസ്റ്റുകളുമായി പരിശ്രമം തുടര്ന്നുകൊണ്ടേയിരുന്നു. 2022 ല് 121-ാം റാങ്കിലേക്ക് എത്തി. 2023 ലെ ഫലം വന്നപ്പോള് സിദ്ധാര്ഥ് രാംകുമാര് നാലാം റാങ്ക് നേടുകയും ചെയ്തു.
