കീവ്: ഓള്ഗ ലോയ്ക്(21) യുക്രൈന് സ്വദേശിയാണ്. പെന്സില്വാനിയ സര്വകലാശാലാ വിദ്യാര്ഥിനി. പക്ഷേ, റഷ്യന് അനുകൂല വീഡിയോകളില് റഷ്യന് പെണ്കുട്ടിയാണ് ഓള്ഗ. റഷ്യന് പക്ഷത്തേക്കു മാറിയോ? നാട്ടില്നിന്നു ഫോണ് കോളുകള് പ്രവഹിച്ചപ്പോഴാണ് ഓള്ഗ ആ സത്യം അറിഞ്ഞത്. റഷ്യന് അനുകൂല പ്രചാരണത്തിന് ഉപയോഗിക്കുന്നത് ഓള്ഗയുടെ മുഖമാണ്. പിന്നില് എ.ഐ(നിര്മിത ബുദ്ധി)യും.
'ഞാന് സ്വപ്നത്തില്പ്പോലും വിചാരിക്കാത്ത കാര്യങ്ങളാണ് എന്റെ രൂപത്തിലും ശബ്ദത്തിലും പുറത്തുവരുന്നത്. റഷ്യയെ പ്രോത്സാഹിപ്പിക്കുന്ന മുഖത്തിനായി ഒരു യുക്രൈനന് പെണ്കുട്ടിയെ ഉപയോഗിക്കുന്നു. അവര്ക്കു ഭ്രാന്താണ്.' - ഓള്ഗയുടെ ആദ്യ പ്രതികരണം ഇങ്ങനെ. ചൈനീസ് സാമൂഹിക മാധ്യമങ്ങളിലെ പരിചിത മുഖമാണ് അവരിപ്പോള്. ' ഇതെല്ലാം വളരെ വിചിത്രമായിരിക്കുന്നു, ഞാന് ഒരിക്കലും പറയാത്ത കാര്യങ്ങള് ഞാന് പറയുന്നത് ഞാന് കണ്ടു' അവര് തുടര്ന്നു. മുഖവും ശബ്ദവും ഓള്ഗയുടേതാണെങ്കിലും പേരുകള്ക്ക് മാറ്റമുണ്ട്.
സോഫിയ, നടാഷ, ഏപ്രില്, സ്റ്റേസി എന്നിങ്ങനെ ഡസന് കണക്കിന് പേരുകളാണു സാമൂഹിക മാധ്യമങ്ങളില് ഓള്ഗയ്ക്കു നല്കുന്നത്. ചൈനയില് പ്രചാരത്തിലുള്ള മന്ഡാരിന് ഭാഷയിലെ അവതാരമാണ് ഓള്ഗയെ ഞെട്ടിച്ചത്. 'ഞാന് മന്ഡാരിന് ഭാഷ കേട്ടിട്ടുപോലുമില്ലായിരുന്നു. റഷ്യ- ചൈന സൗഹൃദത്തെക്കുറിച്ചാണ് എന്റെ രൂപം ആ വീഡിയോയില് സംസാരിച്ചത്'- അവര് പറഞ്ഞു. ചില റഷ്യന് ഉത്പന്നങ്ങളുടെ പരസ്യത്തിലും 'അറിയാതെ' ഓള്ഗയെത്തി. '90% വീഡിയോകളും ചൈനയെക്കുറിച്ചും റഷ്യയെക്കുറിച്ചും ചൈന- -റഷ്യ സൗഹൃദത്തെക്കുറിച്ചും എന്റെ രൂപം സംസാരിക്കുന്നതായി കണ്ടു, ഒപ്പം ഭക്ഷ്യ വസ്തുക്കളുടെ പരസ്യങ്ങളും.'
അവയില് മൂന്ന് ലക്ഷം ഫോളോവര്മാരുള്ള അക്കൗണ്ടുകളും ഉണ്ടായിരുന്നു. 'നടാഷ ഇറക്കുമതി ചെയ്ത ഭക്ഷണം' എന്നായിരുന്നു തലക്കെട്ട്. ഓള്ഗയുടെ രൂപത്തിലുള്ള നതാഷ സാമൂഹിക മാധ്യമങ്ങളിലൂടെ പറഞ്ഞത് ഇങ്ങനെ: 'റഷ്യയാണ് ഏറ്റവും മികച്ച രാജ്യം. റഷ്യന് മിഠായികള്ക്ക് അതുല്യ രുചിയാണ്'. മാന്ഡാരിന് 'സംസാരിക്കുന്ന' ഓള്ഗയുടെ മുഖമുള്ള യൂടൂബ് ചാനല് കഴിഞ്ഞ വര്ഷമാണു തുടങ്ങിയത്.
ഒരു മാസത്തിനുശേഷം മാന്ഡാരിന് ഭാഷയില് സംസാരിക്കുന്നത് കണ്ടുവെന്ന് അവകാശപ്പെടുന്ന സന്ദേശങ്ങള് അവര്ക്കു ലഭിക്കാന് തുടങ്ങി. ആകാംക്ഷാഭരിതയായ അവര് സ്വയം തിരയാന് തുടങ്ങി. ഇന്സ്റ്റാഗ്രാം പോലുള്ള പ്ലാറ്റ്ഫോമായ സിയാവോഹോങ്ഷുവിലും യൂട്യൂബിന് സമാനമായ വീഡിയോ സൈറ്റായ ബിലിബിലിയിലും സ്വന്തം രൂപങ്ങള് കണ്ടെത്തി. അവയ്ക്കു പിന്നില് എ.ഐ. ആയിരുന്നു. ഓള്ഗയുടെ മുഖം 35 അക്കൗണ്ടുകളിലാണ് ഉപയോഗിക്കുന്നത്.
എ.ഐയുടെ സഹായത്തോടെയാണു രൂപം സൃഷ്ടിച്ചതെന്ന് അവയില് ഹെയെ്ജന് എന്ന സ്ഥാപനം തുറന്നു സമ്മതിച്ചു. അവര് ഉണ്ടാക്കിയതാകട്ടേ, 4,900 വീഡിയോകള്. ഇനി ഉപയോഗിക്കരുതെന്ന് അവരോട് ഓള്ഗ അഭ്യര്ഥിച്ചിട്ടുണ്ട്. എന്നാല് ഓള്ഗയ്ക്ക് സംഭവിച്ചത് ചൈനയില് വളരെ സാധാരണമാണെന്ന് ഹോങ്കോങ് സര്വകലാശാലയിലെ ഏഞ്ചല ഴാങ് പറയുന്നു. കള്ളനോട്ട്, വ്യക്തിഗത ഡേറ്റ ദുരുപയോഗം ചെയ്യല്, ഡീപ്ഫേക്കുകള് നിര്മിക്കല് എന്നിവയില് വൈദഗ്ധ്യം നേടിയവരാണ് അവിടുള്ളത്.
2023 ല് പൊതുസുരക്ഷാ വകുപ്പ് വെളിപ്പെടുത്തിയ സ്ഥിതിവിവരക്കണക്കുകള് കാണിക്കുന്നത് 'ആര്ട്ടിഫിഷ്യല് ഇന്റലിജന്സ് ഫെയ്സ് സ്വാപ്പ്' പ്രവര്ത്തനങ്ങളുടെ പേരില് 515 വ്യക്തികളെ അറസ്റ്റ് ചെയ്തു എന്നാണ്. ചൈനീസ് കോടതികളും ഈ മേഖലയിലെ കേസുകള് കൈകാര്യം ചെയ്തിട്ടുണ്ട്. എന്നാല് ഓള്ഗയെപ്പോലുള്ള സാധാരണക്കാര്ക്ക് പ്രതീക്ഷ വേണ്ടെന്നാണു വിദഗ്ധര് പറയുന്നത്. ചൈനീസ് കോടതികളിലെത്തി അനുകൂല വിധി സ്വന്തമാക്കുന്നത് ബുദ്ധിമുട്ടായതാണു കാരണം.
