പൃഥ്വിരാജും ബേസിൽ ജോസഫും ഒന്നിച്ചെത്തിയ ‘ഗുരുവായൂരമ്പലനടയില്’ ചിത്രം പ്രേക്ഷകരുടെ ഹൃദയം കീഴടക്കി മുന്നേറുകയാണ്. പേരിലെ കൗതുകത്തിന് പിന്നാലെ എത്തിയ രസകരമായ പ്രമോഷൻ മെറ്റീരിയലുകളും പ്രേക്ഷകർ ഏറ്റെടുത്തു. മികച്ച മൗത്ത് പബ്ലിസിറ്റിയാണ് ‘ഗുരുവായൂരമ്പലനടയിലി’ന് ലഭിച്ചു കൊണ്ടിരിക്കുന്നത്.
ഇപ്പോഴിതാ ഗുരുവായൂർ അമ്പലമാണെന്ന് കരുതി സിനിമ സെറ്റില് പ്രാർത്ഥിക്കുന്ന സ്ത്രീയുടെ വീഡിയോ പങ്കുവച്ച് ‘ഗുരുവായൂരമ്പലനടയില്’ സിനിമയുടെ സംവിധായകൻ വിപിന്ദാസ്. ‘‘ഗുരുവായൂരമ്പലനടയില് സ്ഥിരമുള്ള കാഴ്ചകളില് ഒന്ന്!! എല്ലാ ക്രെഡിറ്റും ആർട്ട് ഡയറക്ടർ സുനിലേട്ടനുള്ളതാണ്...’’ എന്ന ക്യാപ്ഷന് നല്കിയാണ് വീഡിയോ പങ്കുവച്ചിരിക്കുന്നത്. സിനിമാ ചിത്രീകരണത്തിനായി ഗുരുവായൂർ അമ്പലത്തിന്റെ സെറ്റ് ഒരുക്കിയിരുന്നു. ഇത് യഥാർത്ഥ ക്ഷേത്രമാണെന്ന് ധരിച്ചായിരുന്നു സ്ത്രീ തൊഴുത് പ്രാർത്ഥിച്ചത്. ആ വീഡിയോയാണ് സംവിധായകന് സോഷ്യല് മീഡിയ അക്കൗണ്ടിലൂടെ പങ്കുവച്ചിരിക്കുന്നത്.
വിപിൻ ദാസ് വീഡിയോ പങ്കുവച്ചതോടെ ഗുരുവായൂരമ്പല നടയില് ചിത്രത്തിന്റെ സെറ്റിനെ കുറിച്ചുള്ള ചർച്ചകളാണ് സോഷ്യല് മീഡിയയില് നിറയുന്നത്. കയ്പ്പോള, ഫാലിമി തുടങ്ങിയ ചിത്രങ്ങളിലൂടെ ശ്രദ്ധേയനായ കലാസംവിധായകൻ സുനില് കുമാരനാണ് യഥാർത്ഥ ഗുരുവായൂർ ക്ഷേത്രത്തിന്റെ മാതൃകയിലുള്ള സെറ്റ് ഒരുക്കിയത്. സെറ്റിനായി മൂന്നരക്കോടിയാണ് മുടക്കിയതെന്നാണ് സൂചന.
ഒരു കല്യാണത്തെ ചുറ്റിപ്പറ്റി ഉണ്ടാവുന്ന പ്രശ്നങ്ങളെ അടിസ്ഥാനമാക്കിയുള്ള കോമഡി എന്റർടെയ്നറാണ് ചിത്രം. പൃഥ്വിരാജ് പ്രൊഡക്ഷൻസിന്റെ ബാനറില് സുപ്രിയ മേനോൻ, ഇ 4 എന്റർടെയ്ൻമെന്റിന്റെ ബാനറില് മുകേഷ് ആർ മേത്ത, സി വി സാരഥി എന്നിവർ ചേർന്നാണ് ചിത്രത്തിന്റെ നിർമാണം. കുഞ്ഞിരാമായണത്തിന് ശേഷം ദീപു പ്രദീപ് തിരക്കഥയൊരുക്കുന്ന സിനിമ കൂടിയാണ്. അനശ്വര രാജൻ, നിഖില വിമല്, ജഗദീഷ്, ബൈജു, യോഗി ബാബു, ഇർഷാദ്, പി വി കുഞ്ഞികൃഷ്ണൻ തുടങ്ങിയവർ ചിത്രത്തില് പ്രധാന വേഷങ്ങളിലുണ്ട്. തമിഴ് താരം യോഗി ബാബുവിന്റെ മലയാളത്തിലെ ആദ്യ ചിത്രം കൂടിയാണിത്.
