ദാഹരണം സുജാത എന്ന ചിത്രത്തിൽ മഞ്ജു വാര്യരുടെ മകളായി വെള്ളിത്തിരയിൽ എത്തിയ താരമാണ് അനശ്വര രാജൻ. പിന്നീട് നായിക നിരയിലേക്ക് ഉയർന്ന താരം മലയാളത്തിന് പുറമെ തമിഴ്, തെലുങ്ക് സിനിമകളിലും ഇതിനകം അഭിനയിച്ചു കഴിഞ്ഞു. മലയാളത്തിനുപുറമേ തമിഴിലും തെലുങ്കിലും സജീവമാണ് താരം. അടുത്തിടെയാണ് അനശ്വര നായികയായ ലക്കി-ദ സൂപ്പർസ്റ്റാർ എന്ന ചിത്രം പുറത്തിറങ്ങിയത്. ജി.വി. പ്രകാശ് നായകനായ ചിത്രം ഹോട്ട്സ്റ്റാറിലൂടെ ഡയറക്ട് ഒ.ടി.ടി റിലീസായി പ്രേക്ഷകര്ക്ക് മുന്നിലെത്തുകയായിരുന്നു. മികച്ച പ്രതികരണമാണ് സിനിമയ്ക്കും അനശ്വരയുടെ അഭിനയത്തിനും കിട്ടിക്കൊണ്ടിരിക്കുന്നത്.
ഇപ്പോഴിതാ 2026 ലെ ജെഎഫ്ഡബ്ല്യു അച്ചീവേഴ്സ് അവാർഡ് ദാന ചടങ്ങിൽ, അനശ്വര രാജനെ ഹൃദ്യമായി പ്രശംസിക്കുന്ന തെന്നിന്ത്യന് താരം അമല പോളിന്റെ വീഡിയോയാണ് സോഷ്യല് മീഡിയ ഏറ്റെടുക്കുന്നത്. സൂപ്പർ ശരണ്യയിലെ അനശ്വരയുടെ റിയലിസ്റ്റിക് അഭിനയത്തെയും നേരിലെ അന്ധയായ പെൺകുട്ടിയായി അഭിനയിച്ച വൈകാരിക പ്രകടനത്തെയുമാണ് അമല പോള് വേദിയില് വച്ച് പ്രശംസിച്ചത്. അനശ്വരയ്ക്ക് അവാര്ഡ് നല്കാന് വേദിയിലെത്തിയത് അമല പോളായിരുന്നു. അവതരണ വേളയിൽ, അനശ്വരയുടെ പ്രകടനങ്ങൾ തന്നെ എത്രത്തോളം സ്വാധീനിച്ചുവെന്ന് അമല പറഞ്ഞു.
‘‘അനശ്വരയെക്കുറിച്ച് എനിക്ക് ചിലത് പറയാനുണ്ട്. ഈ അവാർഡ് അനശ്വരയ്ക്ക് നൽകുന്നതിൽ വളരെ സന്തോഷമുണ്ട്, കാരണം ഇവര് എന്റെ പ്രിയപ്പെട്ടവരിൽ ഒരാളാണ്. അനശ്വര അഭിനയിച്ച സൂപ്പർ ശരണ്യ എന്നൊരു സിനിമയുണ്ട്. കൂളായി, കാഷ്വലായി, റിയലിസ്റ്റിക്കായിട്ടാണ് അതില് അനശ്വര അഭിനയിച്ചത്. അനശ്വരയുടെ പ്രകടനത്തിൽ നിന്ന് ഞാൻ ഒരുപാട് കാര്യങ്ങൾ പഠിച്ചു. അതിനു ശേഷം കണ്ട ‘നേര്’ എന്ന സിനിമയില് അന്ധയായ പെൺകുട്ടിയായിട്ടാണ് അഭിനയിച്ചത്. ശരിക്കും കണ്ണു കാണാത്ത പെണ്കുട്ടിയാണെന്ന് തോന്നിപ്പോകുന്ന തരത്തിലായിരുന്നു അനശ്വരയുടെ അഭിനയം. അതിലെ വൈകാരികമായ അഭിനയം കണ്ട് ഞങ്ങളെല്ലാവരും അക്ഷരാര്ത്ഥത്തില് കരഞ്ഞു. ശരിക്കും ‘ഊർജ്ജത്തിന്റെ തീഗോള’മാണ് താങ്കള്...ഓള് ദ വെരി ബെസ്റ്റ്...’’ എന്നാണ് അമല പോള് പറഞ്ഞത്. അതിനു മറുപടിയായി നിറചിരിയോടെ ‘താങ്ക്യൂ സോ മച്ച് ചേച്ചി...’ എന്ന് അനശ്വരയും മറുപടി പറഞ്ഞു. 2026 ലെ ജെഎഫ്ഡബ്ല്യു അച്ചീവേഴ്സ് അവാർഡ്സിൽ സെൻസേഷൻ ഓഫ് ദി ഇയർ’ അവാര്ഡാണ് അനശ്വരയ്ക്ക് ലഭിച്ചത്. രണ്ട് നടിമാരും വേദിയിൽ ചെയ്ത രസകരമായ നൃത്തവും പ്രേക്ഷകരെ ആവേശഭരിതരാക്കി.
