അമ്പലപ്പുഴ: അവയവ കൈമാറ്റ മാഫിയ ആലപ്പുഴ ജില്ലയിലെ തീരമേഖലയിലും സജീവം. അമ്പലപ്പുഴ തെക്ക് പഞ്ചായത്തിലെ തീരദേശ വാര്ഡുകളായ 14, 15 വാര്ഡുകള് കേന്ദ്രീകരിച്ചാണ് വൃക്ക മാഫിയ സജീവമായിരിക്കുന്നത്. കഴിഞ്ഞ ഏതാനും വര്ഷത്തിനിടെ ഈ വാര്ഡുകളിലെ ഇരുപതോളം നിര്ധനരായ മത്സ്യത്തൊഴിലാളി വനിതകളാണ് ഇവരുടെ ഇരകളായിരിക്കുന്നത്.
പെണ്മക്കളുടെ വിവാഹം, വീടു നിര്മാണം എന്നിവക്കു വേണ്ടിയാണ് സ്ത്രീകള് തങ്ങളുടെ വൃക്കകള് വില്ക്കുന്നത്. ഇവരുടെ ദാരിദ്ര്യം ചൂഷണം ചെയ്ത് ഇടനിലക്കാര് ലക്ഷങ്ങളാണ് സമ്പാദിക്കുന്നത്. 10 ലക്ഷത്തില്പ്പരം രൂപ അവയവദാനത്തിനായി ഇടനിലക്കാര് വാഗ്ദാനം ചെയ്യാറുണ്ടെങ്കിലും വൃക്ക നല്കിയ ശേഷം ഇവരുടെ കൈകളില് ലഭിക്കുന്നത് പലപ്പോഴും ആറും ഏഴും ലക്ഷം രൂപ മാത്രമാണ്.
തൃശൂര്, എറണാകുളം, കോഴിക്കോട് കേന്ദ്രീകരിച്ചുള്ള വമ്പന് സ്വകാര്യ ആശുപത്രികളിലാണ് ശസ്ത്രക്രിയ നടക്കുന്നത്. അവയവദാനത്തിനായി ഗ്രാമപഞ്ചായത്തംഗത്തിന്റെ സാക്ഷ്യപത്രവും ആവശ്യമാണ്. നിയമപരമല്ലാത്ത ഈ ഇടപാടിന് പഞ്ചായത്തംഗങ്ങള് സാക്ഷ്യപത്രവും നല്കാറുണ്ടെന്നും പരാതി. അമ്പലപ്പുഴയിലെഅനധികൃത അവയവ ദാനക്കച്ചവടത്തിനെതിരേ പോലീസ് യാതൊരു നടപടിയും സ്വീകരിച്ചിട്ടില്ല. ആരോഗ്യ വകുപ്പും കണ്ണടയ്ക്കുകയാണ്. പണം വാങ്ങി അവയവം നല്കുന്നത് നിയമ വിരുദ്ധമാണ്.
ശസ്ത്രക്രിയ നടത്തുന്ന ആശുപത്രികളില് നിന്ന് ഉന്നത ഉദ്യോഗസ്ഥര് ഉള്പ്പെടെയുള്ളവര്ക്ക് വന് തുകയാണ് നല്കുന്നതെന്നും സൂചനയുണ്ട്. രേഖാമൂലം ആരും പരാതി നല്കാത്തതു കൊണ്ട് കേസെടുത്ത് അന്വേഷണം നടത്താന് കഴിയില്ലെന്ന നിലപാടാണ് പോലീസിനുള്ളത്. നേരത്തെ രഹസ്യാന്വേഷണ വിഭാഗം ഇതിനെക്കുറിച്ച് അന്വേഷണം നടത്തി റിപ്പോര്ട്ട് നല്കിയിരുന്നു. എന്നാല് ഇവയെല്ലാം കടലാസിലൊതുങ്ങി.
