മുംബൈ: മത്സ്യവില്പ്പനക്കാരായ ദമ്പതികള് സഞ്ചരിച്ചിരുന്ന സ്കൂട്ടറില് അമിതവേഗത്തിലെത്തിയ ആഡംബരക്കാറിടിച്ച് യുവതിക്കു ദാരുണാന്ത്യം. ഭര്ത്താവിനു പരുക്ക്. സംഭവത്തില് വാഹനം ഓടിച്ചിരുന്നെന്നു കരുതുന്ന ശിവസേനാ (ഏക്നാഥ് ഷിന്ഡെ വിഭാഗം) നേതാവിന്റെ മകന് ഒളിവില്. ഇന്നലെ പുലര്ച്ചെ അഞ്ചരയോടെ മുംബൈ വര്ളിയിലാണു സംഭവം. കാവേരി നഖ്വയെന്ന നാല്പ്പത്തഞ്ചുകാരിയാണ് മരിച്ചത്.
ഭര്ത്താവ് പ്രദിക് നക്വ നിസാര പരുക്കുകളോടെ രക്ഷപ്പെട്ടു. കോളിവാഡ പ്രദേശത്തെ താമസക്കാരായ ദമ്പതികള് പതിവുപോലെ വില്പ്പനയ്ക്കുള്ള മത്സ്യംവാങ്ങി സ്കൂട്ടറില് മടങ്ങുകയായിരുന്നു. ഇതിനിടയിലാണ് അമിതവേഗത്തിലെത്തിയ ബി.എം. ഡബ്ല്യു. കാര് ഇവര് സഞ്ചരിച്ചിരുന്ന ഇരുചക്രവാഹനത്തിലേക്ക് ഇടിച്ചുകയറിയത്. ഇടിയുടെ ആഘാതത്തില് ദമ്പതികള് സ്കൂട്ടറില്നിന്നു തെറിച്ച് എസ്.യു.വിയുടെ ബോണറ്റില് പതിച്ചു. അപകടമുണ്ടായിട്ടും കാര് നിര്ത്താന് ഡ്രൈവര് തയാറായില്ല. ഇതോടെ റോഡിലേക്കുവീണ കാവേരിയുടെ ശരീരത്തിലൂടെ കാര് വാഹനം കയറിയിറങ്ങി. തെറിച്ചുവീണ കാവേരിയെ കാര് നൂറുമീറ്ററോളം വലിച്ചിഴച്ചു. പരുക്കേറ്റ ഇരുവരെയും അപകടത്തിനു സാക്ഷികളായവര് ആശുപത്രിയിലെത്തിച്ചെങ്കിലും കാവേരി മരിച്ചു. നിസാര പരുക്കുകളോടെ ഭര്ത്താവ് പ്രദിക് രക്ഷപ്പെട്ടു.
മഹാരാഷ്ട്രയിലെ പാല്ഘര് ജില്ലയിലെ ശിവസേനയുടെ ഉപനേതാവ് രാജേഷ് ഷായുടെ മകന് മിഹിര് ഷാ(24)യാണു അപകടമുണ്ടാക്കിയ ബി.എം.ഡബ്ല്യു. കാര് ഓടിച്ചിരുന്നതെന്നു പോലീസ് പറഞ്ഞു. ഇയാള് മദ്യപിച്ചിരുന്നതായും സംശയമുണ്ട്. സംഭവത്തില് രാജേഷ് ഷായും ഡ്രൈവറും പോലീസ് കസ്റ്റഡിയിലാണ്. ഭാരതീയ ന്യായ് സംഹിത പ്രകാരം മനപ്പൂര്വമല്ലാത്ത നരഹത്യയ്ക്കും അശ്രദ്ധമായി വാഹനമോടിച്ചതിനും തെളിവ് നശിപ്പിച്ചതിനും കേസെടുത്തു. മിഹിര് ഷായുടെ പേരിലാണ് വാഹനം രജിസ്റ്റര് ചെയ്തിരിക്കുന്നത്.
അപകടസമയം സേനാ നേതാവിന്റെ മകനും അവരുടെ ഡ്രൈവറുമാണ് കാറിലുണ്ടായിരുന്നതെന്ന് പോലീസ് പറഞ്ഞു. രാത്രി ജുഹുവിലെ ഒരു ബാറില് കയറി മിഹിര് ഷാ മദ്യപിച്ചിരുന്നു. അവിടെനിന്നു മടങ്ങുന്നതിനിടെ കാര് വര്ളിയിലെത്തിയപ്പോള് മിഹിര് ഷാ ഡ്രൈവിങ് ഏറ്റെടുത്തു. അമിതവേഗത്തില് കുതിച്ച ബി.എം.ഡബ്ല്യു. ദമ്പതികള് സഞ്ചരിച്ച സ്കൂട്ടറില് ഇടിക്കുകയായിരുന്നു.
നിര്ത്താതെ കാറോടിച്ചുപോയ മിഹിര് ഷാ, പിതാവിനെ വിളിച്ച് അപകടത്തെക്കുറിച്ചു പറഞ്ഞിരുന്നതായി പോലീസ് പറഞ്ഞു. ഇതിനുശേഷം ഇയാളുടെ ഫോണ് സ്വിച്ച് ഓഫാണ്. നാലു സംഘങ്ങളായാണു പോലീസ് തെരച്ചില് നടത്തുന്നത്. തെളിവ് നശിപ്പിക്കാനുള്ള ശ്രമം നടന്നതായും പോലീസിന്റെ അനേ്വഷണത്തില് കണ്ടെത്തി. കാറിന്റെ വിന്ഡ്ഷീല്ഡിലുണ്ടായിരുന്ന ശിവസേനയുടെ സ്റ്റിക്കര് നീക്കിയിരുന്നു. അപകടശേഷം കാറിന്റെ നമ്പര് പ്ലേറ്റുകളിലൊന്നും നീക്കി. എന്നാല്, പ്രദേശത്തെ സി.സി.ടിവി ദൃശ്യങ്ങള് പരിശോധിച്ച് പോലീസ് കാര് തിരിച്ചറിഞ്ഞു.
സംഭവം ദൗര്ഭാഗ്യകരമാണെന്നു മഹാരാഷ്ട്ര മുഖ്യമന്ത്രിയും ശിവസേനാ നേതാവുമായ ഏക്നാഥ് ഷിന്ഡെ പറഞ്ഞു. നിയമത്തിനു മുന്നില് എല്ലാവരും തുല്യരാണെന്നും പോലീസ് കര്ശന നടപടി സ്വീകരിക്കുമെന്നും അദ്ദേഹം വ്യക്തമാക്കി. പുനെയില് പ്രായപൂര്ത്തിയാകാത്ത പ്രതി മദ്യപിച്ച് ഓടിച്ച കാറിടിച്ച് രണ്ടു യുവ എന്ജിനീയര്മാര് കൊല്ലപ്പെട്ടതിനു പിന്നാലെയാണു പുതിയ സംഭവം.
