ക്രിസ്ത്യാനോ റൊണാള്ഡോയ്ക്ക് പിന്നാലെ മറ്റൊരു സൂപ്പര്താരം ഫ്രാന്സിന്റെ കിലിയന് എംബാപ്പേയ്ക്കും ഗോളില്ലാതെ യൂറോകപ്പില് മടക്കം. ലോകകപ്പില് കാട്ടിയ വീറ് യൂറോപ്പില് നഷ്ടപ്പെട്ടുപോയ ഫ്രാന്സിനെ ഒന്നിനെതിരേ രണ്ടുഗോളുകള്ക്ക് മറികടന്ന് സ്പെയിന് യൂറോകപ്പ് ഫൈനലില് കടന്നു. നിര്ണ്ണായകമായ സെമിഫൈനലില് കൗമാരതാരം യമാലിന്റെയും ഡാനി ഓല്മോയുടേയും ഗോളുകളില് സ്പാനിഷ്കപ്പല് ഫ്രഞ്ച് പ്രതിരോധത്തെ തകര്ത്തു മുന്നേറി.
ടൂര്ണമെന്റില് ഇതുവരെ ഫീല്ഡ്ഗോള് ഒരെണ്ണം പോലും കുറിക്കാതിരുന്ന അവര് സെമിഫൈനലില് ആദ്യമായി ഗോളടിച്ചു. ക്വാര്ട്ടര് വരെ സെല്ഫ്ഗോളുകളുടെയും പെനാല്റ്റിയുടേയും ഷൂട്ടൗട്ടിന്റെയും ആനുകൂല്യത്തില് മുന്നേറിയ അവര്ക്കായി 2024 യൂറോയില് ആദ്യമായി ഗോളടിച്ചത് റണ്ടാല് കോളോ മൗനിയായിരുന്നു. കളിയുടെ എട്ടാം മിനിറ്റില് തന്നെ ഗോള് നേടി മുന്നിലെത്തിയ അവരെ ആദ്യ പകുതിയില് തന്നെ രണ്ടു തവണ തിരിച്ചടിച്ചാണ് സ്പെയിന് മറുപടി കൊടുത്തത്. 21 ാം മിനിറ്റില് യമാലും 25 ാം മിനിറ്റില് ഒല്മോയും സ്കോര് ചെയ്തതോടെ ഫ്രാന്സിന്റെ പ്രതിരോധം ചിതറപ്പെട്ടു. സ്പെയിന്റെ പാസ് ഗെയിമിനെ നേരിടാനാകാതെ ഫ്രഞ്ച് പ്രതിരോധക്കാര് പകച്ചു.
ടൂര്ണമെന്റില് ഒരു ഗോള് പോലും നേടാനായില്ലെങ്കിലും സെമിയിലെ ആദ്യഗോളിന് അവസരം ഒരുക്കിക്കൊടുത്തത് എംബാപ്പേ ആയിരുന്നു. എംബാപ്പേയുടെ പെര്ഫെക്ട് ക്രോസില് നിന്നായിരുന്നു മൗനിയുടെ ഗോള്. എന്നാല് 21 ാം മിനിറ്റില് യമാല് ഒരു വണ്ടര്ഗോളിലൂടെ ഫ്രാന്സിനെ ഒപ്പമെത്തിച്ചു. പെനാല്റ്റി ബോക്സില് നിന്നും തൊടുത്ത ഒരു റോക്കറ്റ് ഫ്രഞ്ച് വലയില് എത്തി. ഇതോടെ യൂറോയില് ഗോള് നേടുന്ന ഏറ്റവും പ്രായം കുറഞ്ഞ താരമായിട്ടാണ് യമാല് മാറിയത്. 16 വയസ്സും 362 ദിവസവുമാണ് ഈ ഗോള് സ്കോര് ചെയ്യുമ്പോള് യമാലിന്റെ പ്രായം. 2004 ല് യോഹാന് വൊണ്ലാന്തന് നേടിയ റെക്കോഡാണ് യമാല് മറികടന്നത്. യോഹാന് 18 വയസ്സും 141 ദിവസവുമുള്ളപ്പോഴാണ് ഗോള് നേടിയത്.
യൂറോയുടെ സെമിയില് ഗോള്നേടുന്ന ഏറ്റവും പ്രായം കുറഞ്ഞ താരമെന്ന ചരിത്രം കൂടി ഈ മത്സരത്തിലൂടെ യമാല് നേടിയെടുത്തു. നാലു മിനിറ്റ് കഴിഞ്ഞപ്പോള് ഡാനി ഒല്മോ അത് ഇരട്ടിയാക്കി. ഫ്രാന്സ് ഈ ടൂര്ണമെന്റില് വഴങ്ങുന്ന ആദ്യ ഫീല്ഡ്ഗോളുമായിരുന്നു ഇത്. മൂന്ന് സുന്ദരമായ ടച്ചുകള് മാത്രമാണ് ഒല്മോയുടെ ഗോള് നേട്ടത്തിനായി സ്പെയിന് വേണ്ടി വന്നത്.
