കോഴിക്കോട്: വീട്ടുടമസ്ഥന് വാടകക്കാരുടെ അവശ്യവസ്തുക്കളും വീട്ടുപകരണങ്ങളും പണിആയുധങ്ങളും തീയിട്ടു നശിപ്പിച്ചതായി പരാതി.
പരപ്പനങ്ങാടി വള്ളിക്കുന്ന് സ്വദേശികളായ സുന്ദരന് ശ്രീജ ദമ്പതികളാണ് രണ്ടുമാസം മുമ്പ് വരെ വട്ടാംപൊയിലില് വാടകക്ക് താമസിച്ചിരുന്ന വീട്ടില് സൂക്ഷിച്ചിരുന്ന വസ്തുക്കള് വീട്ടുടമസ്ഥന് തീയിട്ടു നശിപ്പിച്ചെന്ന പരാതിയുമായി രംഗത്തെത്തിയിരിക്കുന്നത്.
1986ല് ഏകമകള് പത്താംക്ലാസ് തോറ്റവിഷമത്തില് ആത്മഹത്യ ചെയ്തതിനെ തുടര്ന്ന് സ്വന്തമായുണ്ടായിരുന്ന വീടുവിറ്റ് വട്ടാംപൊയിലില് എത്തിയവരാണ് ഇവര്. 30വര്ഷത്തോളമായി സുന്ദരനും ശ്രീജയും വട്ടാപൊയിലിലെ വീട്ടില് താമസമാക്കിയിട്ട്. ജന്മിയില് നിന്നും 150രൂപ ഭൂമിവാടക നല്കി, കഠിനാധ്വാനം കൊണ്ട് കെട്ടിപൊക്കിയ ഓറ്റമുറിയിലാണ് ഇരുവരും താമസിച്ചിരുന്നത്. മോട്ടോര് മെക്കാനിക്കായ സുന്ദരന്റെ പണിആയുധങ്ങളും ഉപകരണങ്ങളും വീട്ടുപകരണങ്ങളും മക്കളെപോലെ സ്നേഹിക്കുന്ന കുറച്ച് നായ്ക്കളുമാണ് ദമ്പതികള്ക്കൊപ്പം ആ കുടുസുമുറിയില് ഉണ്ടായിരുന്നത്.
രണ്ടര മീറ്റര് വീതിയും മൂന്നരമീറ്റര് നീളവുമുള്ള മുറിയില് ദുഖത്തിന്റെയും പ്രാരാബ്ദങ്ങളുടെയും നിഴലിലാണ് ജീവിതം തള്ളിനീക്കിയിരുന്നത്.
ദമ്പതികളുടെ ദുരിതജീവിതം മംഗളം പത്ത്രില് വാര്ത്തയായിരുന്നു. വാര്ത്തയെ തുടര്ന്ന് വീട്ടുടമസ്ഥന് ശ്രീജയോട് നായ്ക്കളെയും കൊണ്ട് വീടുമാറണമെന്നും സുന്ദരന് ജോലിസ്ഥലമായി ഒറ്റമുറി ഉപയോഗിക്കാമെന്നും പറഞ്ഞിരുന്നു. നായ്ക്കളെ വളര്ത്തുന്നതില് ബുദ്ധിമുട്ട് ഉണ്ടെന്നും എത്രയും പെട്ടന്ന് താമസംമാറണമെന്നും ഉടമസ്ഥമന് നിര്ബന്ധിച്ചിരുന്നതായി ദമ്പതികള് പറയുന്നു.
ഇതിനിടയില് പലതവണകളിലായി വാടക വര്ദ്ധിപിച്ചിരുന്നു. താമസം ഒഴിയണമെന്ന ആവശ്യം ഉയര്ന്നപ്പോള് ഭൂമി വാടകക്ക് എടുക്കുമ്പോള് ജന്മിക്ക് പകിടയായി നല്കിയ 20000രൂപയും ഒറ്റമുറി നിര്മ്മിക്കാനും വൈദ്യുതീകരണം പോലെയുള്ള കാര്യങ്ങള്ക്കും ചിലവായ തുകയും തിരികെ ലഭിക്കണമെന്നും ദമ്പതികള് പറഞ്ഞു. തുടര്ന്ന് 1.25ലക്ഷം രൂപ ഭൂഉടമസ്ഥന് നല്കിയിരുന്നു. 'മംഗളം' ദിനപത്രത്തില് വന്ന വാര്ത്തയെ തുടര്ന്ന് നാട്ടുകാരില് ചിലരും സാമ്പത്തുകമായി സഹായിച്ചിരുന്നു.
അങ്ങനെ ലഭിച്ച പണംകൊണ്ട് പരപ്പനങ്ങാടി വള്ളികുന്നില് സ്ഥലം വാങ്ങി ഒരു കൂര ചെരിച്ചുകെട്ടിയാണ് ഇപ്പോള് താമസിക്കുന്നത്.
അടച്ചുറപ്പില്ലാത്തതിനാലും വൈദ്യുതി സംവിധാനങ്ങള് ഇല്ലാത്തതിനാലും ഫ്രിഡ്ജ്, ടി.വി, വസ്ത്രങ്ങള് എന്നിവ വട്ടാം പൊയിലിലെ വീട്ടില് സൂക്ഷിച്ചിരുന്നു. സുന്ദരന് ജോലി ചെയ്ായനുള്ള സാഹചര്യം ഉറപ്പുനല്കിയാണ് താമസം മാറാന് ഉടമസ്ഥന് നിര്ബന്ധിച്ചത്. എന്നാല് കഴിഞ്ഞ ഞായറാഴ്ച്ച് രാത്രിയില് ഉടമസ്ഥനും കൂട്ടാളികളും അതിക്രമിച്ചു കയറി മുറിയില് സൂക്ഷിച്ചിരുന്ന വസ്തുക്കളും വസ്ത്രങ്ങളും തീയിട്ടു നശിപ്പിച്ചതായാണ് പരാതി. സുന്ദരന്റെ പണി ആയുധങ്ങളും, ഫ്രിഡ്ജ്, ടി.വി എന്നവയും കാണാതായതായും പരാതിയില് പറയുന്നുണ്ട്.
എന്നാല് തങ്ങള്ക്കുണ്ടായ ദുരന്തം പോലീസില് അറിയിക്കാന് ശ്രമിച്ചപ്പോള് നേരിടേണ്ടി വന്നത് മറ്റുചില തിക്താനുഭവങ്ങളാണെന്ന് ശ്രീജ പറയുന്നു.
പോലീസിന്റെ ഭാഗത്തുനിന്നും തികഞ്ഞ നിഷ്ക്രിയത്വവും ഉദാസീനതയുമാണ് കാണാന് സാധിച്ചതെന്നും ഉടമസ്ഥന് പോലീസില് സ്വാധീനം ചെലുത്തിയതായി സംശയമുണ്ടെന്നും ഇവര് പറയുന്നു. ഇവരുടെ ജീവിതം വാര്ത്തകളിലൂടെ പുറം ലോകം അറിയുന്നതിനു മുമ്പ് തന്നെ വാടക വര്ദ്ധിപ്പിക്കുന്നതുമായി ബന്ധപ്പെട്ട് ഉടമസ്ഥന് ദമ്പടികളുടെ പേരില് കേസ് കൊടുതിരുന്നു. രണ്ടു വര്ഷത്തോളമായി കേസ് കോടതിയിലാണ്. എന്നാല് വാടക വര്ദ്ധിപ്പിക്കാനായി കേസ് കൊടുത്ത ഉടമസ്ഥന് മൂന്ന് വര്ഷത്തോളമായി വാടക വാങ്ങാറില്ലായിരുന്നു എന്നാണ് ശ്രീജ പറയുന്നത്.
വാടക കൈപ്പറ്റാന് സമീപിക്കുകയോ നല്കിയാല് വാങ്ങാനോ ഉടമ തയ്യാറായിരുന്നില്ല. അതുകൊണ്ട് തന്നെ വാടക നല്കിയതിന് മതിയായ രേഖകളുമില്ല. എന്നാല് ഇത്തരം അനവധി കേസുകള് നിലവിലുണ്ടെന്നും സംഭവത്തിനുപിന്നാലെ പോകുന്നത് കൊണ്ട് പ്രത്യേകിച്ച് ഗുണങ്ങളില്ലെന്നും പോലീസ് പറഞ്ഞതായി ഇവര് പറയുന്നു. ഇതിനെതുടര്ന്ന് ദമ്പതികള് കോഴിക്കോട് സിറ്റിപോലീസ് കമ്മീഷണര്ക്ക് നേരിട്ട് പരാതി നല്കിയിട്ടുണ്ട്.
