തിരുവനന്തപുരം; ഉരുള്പൊട്ടലിനെത്തുടര്ന്ന് ദുരിതാശ്വാസ ക്യാംപുകളില് കഴിയുന്നവരെ ആശ്വാസവുമായി സംസ്ഥാന സര്ക്കാര്. ഒരോ കുടുംബത്തിനും അടിയന്തര ധനസഹായമായി 10000 രൂപ വീതം അനുവദിക്കും. ജീവനോപാധി നഷ്ടപ്പെട്ട കുടുംബത്തിലെ പ്ായപൂര്ത്തിയായ ഒരാള്ക്ക് പ്രതിദിനം 300 രൂപ നല്കും.
ഇപ്രകാരം ഒരു കുടുംബത്തിലെ രണ്ടുപേര്ക്കാണ് ആനുകൂല്യം ലഭിക്കുക. കിടപ്പുരോഗികളോ ആശുപത്രിയില് ദീര്ഘനാള് ചികിത്സയില് കഴിയുന്ന രോഗികളോ ഉണ്ടെങ്കില്, കുടുംബത്തിലെ മൂന്നുപേര്ക്ക് ആനുകൂല്യം ലഭിക്കും. 30 ദിവസത്തേക്കാണ് ഈ തുക നല്കുക.
മുണ്ടക്കൈ, ചൂരല്മല പ്രദേശത്തെ ദുരന്തത്തെത്തുടര്ന്ന് ക്യാംപുകളില് കഴിയുന്നവര്ക്ക് മറ്റൊരു വാസസ്ഥലത്തേക്ക് തിരിച്ചു പോകുമ്പോള് സര്ക്കാര് ഉടമസ്ഥതയിലോ മറ്റു പൊതു ഉടമസ്ഥതയിലോ മാറാന് കഴിയുന്ന വിധമുള്ള താമസ സൗകര്യം ഒരുക്കാനാകുമോ എന്നതില് കലക്ടറുടെ റിപ്പോര്ട്ട് ആവശ്യപ്പെട്ടിട്ടുണ്ട്.
