ആറന്മുള: ആചാരപാലനത്തിനായി അമേരിക്കയില്നിന്നു ഭട്ടതിരി. ഷിക്കാഗോയില് എന്ജിനീയറായ അനൂപ് നാരായണ ഭട്ടതിരിയാണ് ആറന്മുള പാര്ത്ഥസാരഥിക്ക് ഓണവിഭവങ്ങള് എത്തിക്കാന് അമേരിക്കയില്നിന്നു പറന്നെത്തിയത്. പിതാവ് നാരായണന് ഭട്ടതിരി ആയിരുന്നു കാല് നൂറ്റാണ്ട് കാട്ടൂരില്നിന്ന് ഉത്രാട സന്ധ്യയില് പുറപ്പെടുന്ന തിരുവോണത്തോണിക്ക് ആചാരപ്രകാരം ദൗത്യം നിറവേറ്റിയിരുന്നത്.
അദ്ദേഹത്തിന്റെ വിയോഗത്തെത്തുടര്ന്ന് കഴിഞ്ഞ നാല് വര്ഷമായി അനുജന് രവീന്ദ്ര ബാബു ആയിരുന്നു തോണിയാത്ര നയിച്ചത്. ഇപ്പോള് അദ്ദേഹത്തിനും യാത്രകള് ബുദ്ധിമുട്ടായതിനാലാണ് നാരായണ ഭട്ടതിരിയുടെ മകന് അനുപ് ചുമതല ഏറ്റെടുത്തത്.
മദ്രാസില്നിന്ന് എം.ടെക് പഠനത്തിനുശേഷം എന്ജിനീയറായ അദ്ദേഹത്തിനു കഴിഞ്ഞ വര്ഷമാണു ഷിക്കാഗോയില് ജോലി ലഭിച്ചത്. ഇതിനിടയിലാണ് ചരിത്രപരമായ തിരുവോണത്തോണിയുടെ നായകത്വം ഏറ്റെടുക്കേണ്ടി വന്നത്. ഒരാഴ്ച അവധിയെടുത്ത് കഴിഞ്ഞ ദിവസം നാട്ടിലെത്തി. വ്രതാനുഷ്ഠാനങ്ങള് പൂര്ത്തിയാക്കി കഴിഞ്ഞ 12നു കുമാരനല്ലൂരില്നിന്നു ചുരുളന് വള്ളത്തില് ആറന്മുളയിലേക്ക് തിരിച്ചു.
ഇന്നലെ രാവിലെ തിരുവല്ലയില് എത്തി പുളിക്കീഴ് മനയില് വിശ്രമിച്ച ശേഷം വീണ്ടും യാത്ര പുറപ്പെട്ടാണ് വൈകിട്ട് ആറന്മുളയില് എത്തിയത്. ഇവിടെ നിന്നും ഇന്ന് കാട്ടൂരിലേക്ക് പോകും. അവിടെ വരെ ചുരുളന് വള്ളത്തിലാണ് യാത്ര.
തുടര്ന്ന് തിരുവോണ നാളില് ആറന്മുള പാര്ത്ഥസാരഥിക്കു നിവേദ്യത്തിനുള്ള വിഭവങ്ങളുമായി തിരുവോണത്തോണിയില് ഉത്രാട സന്ധ്യയില് കാട്ടൂര് മഹാവിഷ്ണുക്ഷേത്രക്കടവില്നിന്നു പമ്പാനദിയിലൂടെ യാത്ര തിരിക്കും. തിരുവോണനാളില് ആറന്മുളയില് എത്തി ഭഗവാന് പാര്ത്ഥസാരഥിക്കൊപ്പം ഓണമുണ്ട് ആചാരങ്ങള് പൂര്ത്തിയാക്കുന്ന അനൂപ് ഭട്ടതിരി അവിട്ടം നാളായ 16 നു ഷിക്കാഗോയിലേക്ക് മടങ്ങും.
