തിരുവനന്തപുരം : പി.വി.അന്വറിന്റെ് ആരോപണങ്ങളില് മുഖ്യമന്ത്രിയുടെ പൊളിറ്റിക്കല് സെക്രട്ടറി പി.ശശിക്കെതിരെ അന്വേഷണമില്ല .ശശി ഉത്തരവാദിത്വത്തോടെ പ്രവര്ത്തിക്കുന്നു എന്നു പറഞ്ഞ മുഖ്യമന്ത്രി പിണറായി വിജയന്റെ് നിലപാട് സിപിഐഎം സംസ്ഥാന സെക്രട്ടിയേറ്റ് ശരിവെച്ചു.തൃശൂര് പൂരം കലക്കലില് ആഭ്യന്തര സെക്രട്ടറിയുടെ ശുപാര്ശക്ക് അനുസരിച്ച് തുടര് നടപടി സ്വീകരിക്കാനാണ് തീരുമാനം. പി.വി അന്വര് എംഎല്എ ഉന്നയിച്ച ആരോപണങ്ങളില് തെളിവുകള് കൈമാറിയിട്ടില്ല. ആരോപണങ്ങളുടെ പേരില് മാത്രം അന്വേഷണം വേണ്ടെന്നാണ് പാര്ട്ടി നിലപാട്.അന്വറിന്റെ പരാതിയിലും തല്ക്കാലം തുടര്നടപടിയില്ല.
എഡിജിപി എം ആര് അജിത് കുമാറിനെ തിരക്കിട്ട് മാറ്റേണ്ട ആവശ്യമില്ലെന്നും സെക്രട്ടറിയേറ്റ് തീരുമാനമെടുത്തെന്നാണ് വിവരം.പി. ശശിക്കെതിരെ പി.വി. അന്വര് എം.എല്.എ. നല്കിയ പരാതിയില് സംസ്ഥാന സെക്രട്ടേറിയറ്റ് യോഗത്തില് വിശദമായ ചര്ച്ച നടന്നിട്ടുണ്ടെന്നാണ് സൂചന. എഡിജിപിയുടെ കാര്യത്തില് അന്വേഷണ റിപ്പോര്ട്ട് വന്നശേഷം തീരുമാനമെടുക്കാമെന്ന നിലപാടിലേക്കാണ് നിലവില് സിപിഐഎം എത്തിയത്.
അതേസമയം സംസ്ഥാന സെക്രട്ടറിയേറ്റിന്റെ പ്രസ്താവന പുറത്ത് വന്നതിന് ശേഷം പ്രതികരിക്കാമെന്ന് പി വി അന്വര് മാധ്യമങ്ങളോട് പറഞ്ഞത്.മുഖ്യമന്ത്രി വിശ്വസിച്ച് ഏല്പ്പിച്ച ഉത്തരവാദിത്തങ്ങളില് പി. ശശി വീഴ്ച വരുത്തിയെന്നും മന്ത്രിമാരുടെയടക്കം ഫോണുകള് അജിത് കുമാര് ചോര്ത്തുകയാണെന്നുമാണ് അന്വര് വാര്ത്താസമ്മേളനത്തില് ആരോപിച്ചത്. ശശി ഇങ്ങനെ മുന്നോട്ട് പോയാല് പാര്ട്ടി സംവിധാനങ്ങള് മറുപടി പറയേണ്ടി വരുമെന്നും മുഖ്യമന്ത്രിയെ ഈ കൊലച്ചതിക്ക് വിട്ടുകൊടുക്കില്ലെന്നും അന്വര് പറഞ്ഞിരുന്നു.
