പാലക്കാട്: ഉപതെരഞ്ഞെടുപ്പിനുള്ള അണിയറനീക്കങ്ങള് നേരത്തെതന്നെ സജീവമായ പാലക്കാട് മണ്ഡലത്തില് പോരാട്ടം കനക്കും. വടകരയില്നിന്ന് ഷാഫി പറമ്പില് ലോക്സഭയിലേക്കു തെരഞ്ഞെടുക്കപ്പെട്ടപ്പോഴേ രാഷ്ട്രീയശ്രദ്ധ പാലക്കാട്ടേക്കു തിരിഞ്ഞിരുന്നു. ഇടതിനെ പിന്തുണച്ച ചരിത്രമുണ്ടെങ്കിലും മണ്ഡലത്തില് കുറച്ചുകാലമായി യു.ഡി.എഫും ബി.ജെ.പിയും നേരിട്ടുള്ള മത്സരമാണ്. സീറ്റ് നിലനിര്ത്തുകയെന്ന യു.ഡി.എഫ്. ലക്ഷ്യവും പിടിച്ചെടുക്കാനുള്ള ബി.ജെ.പി തന്ത്രവും നേര്ക്കുനേര് വരുമ്പോള് ഇടതുനിലപാടും നിര്ണായകം.
2006 ല് കെ.കെ. ദിവാകരനിലൂടെ എല്.ഡി.എഫ്. പിടിച്ചെടുത്ത പാലക്കാട് 2011 ല് ഷാഫി പറമ്പിലാണ് യു.ഡി.എഫിനു വീണ്ടെടുത്തു നല്കിയത്. 1344 വോട്ടിന് എ.വി. ഗോപിനാഥിനെ വീഴ്ത്തിയാണ് കെ.കെ. ദിവാകരന് മണ്ഡലം പിടിച്ചത്. ഷാഫി പറമ്പില് 7403 വോട്ടിന് അതു തിരിച്ചെടുക്കുകയായിരുന്നു. 2016 ല് ഷാഫി തന്റെ ഭൂരിപക്ഷം 17483 ലേക്ക് ഉയര്ത്തി. 2021 ല് ഷാഫി ഹാട്രിക് തികച്ചെങ്കിലും ഭൂരിപക്ഷം 3859 ആയി ചുരുങ്ങിയിരുന്നു. മെട്രോമാന് ഇ. ശ്രീധരനെ ഇറക്കി ബി.ജെ.പി. നടത്തിയ നീക്കമാണു ഭൂരിപക്ഷം കുറച്ചത്. അതോടൊപ്പം ഇടതുപക്ഷത്തിന്റെ വോട്ടിലുണ്ടായ കുറവും ശ്രദ്ധിക്കപ്പെട്ടു.
ഷാഫി പറമ്പിലിന് മണ്ഡലത്തിലുണ്ടാക്കാനായ സ്വാധീനം അതേപടി മറ്റു നേതാക്കള്ക്കു ലഭിക്കുക പ്രയാസം. യൂത്ത് കോണ്ഗ്രസ് പ്രസിഡന്റ് രാഹുല് മാങ്കൂട്ടത്തിലിനെ രംഗത്തിറക്കാനുള്ള ഷാഫിയുടെ ശ്രമത്തില് ചില നേതാക്കള്ക്കെങ്കിലും മുറുമുറുപ്പുമുണ്ട്. ജില്ലയില്നിന്നുള്ള പല പേരുകളും ഒളിഞ്ഞും തെളിഞ്ഞും ഉയര്ത്തി അവരത് പ്രകടമാക്കിയിരുന്നു. രാഹുലിനെ മുന്നിര്ത്തി ഷാഫി പോരാട്ടം നയിച്ചാല് പാലക്കാട് കൈവിടില്ലെന്നാണു പൊതുവേയുള്ള വിലയിരുത്തല്. 2006 ല് ദിവാകരനോടു തോറ്റ മുന് ഡി.സി.സി. പ്രസിഡന്റ് എ.വി. ഗോപിനാഥ് നിലവില് കോണ്ഗ്രസ് വിട്ടുനില്ക്കുകയാണ്.
സംസ്ഥാനത്ത് ആദ്യമായി ഒരു നഗരസഭാ ഭരണം ബി.ജെ.പി നേടിയത് പാലക്കാടാണ്. കൂടുതല് സീറ്റുകളോടെ അതു നിലനിര്ത്താനും അവര്ക്കായി. നിയമസഭാ, ലോക്സഭാ തെരഞ്ഞെടുപ്പുകളിലും ബി.ജെ.പി. വോട്ടുനില മെച്ചപ്പെടുത്തി. തൃശൂരില് വിരിഞ്ഞ താമരയുടെ ആവേശംകൂടി ചേര്ന്നാല് പാലക്കാടും ചരിത്രം കുറിക്കുമെന്ന പ്രതീക്ഷയിലാണു പാര്ട്ടി. എന്നാല് സ്ഥാനാര്ഥിനിര്ണയത്തിലെ കല്ലുകടിയിലാണ് ആശങ്ക.
സംസ്ഥാന ജനറല് സെക്രട്ടറി സി. കൃഷ്ണകുമാറിനെ പരിഗണിക്കുമെന്നു വന്നതോടെ ശോഭാ സുരേന്ദ്രനെ സ്വാഗതം ചെയ്ത് നഗരസഭയ്ക്കു മുന്നില് ഫ്ലക്സ് ബോര്ഡ് ഉയര്ന്നു. പാലക്കാട് നഗരസഭയിലെ ഭരണത്തുടര്ച്ചയിലുണ്ടായ ചില അസ്വാരസ്യങ്ങളും തള്ളിക്കളയാവുന്നതല്ല.
സി.പി.എമ്മിനു ശക്തമായ വേരോട്ടമുള്ള ജില്ലയായിട്ടും പാലക്കാട് നഗരത്തില് അവര് പിന്നോട്ടടിക്കപ്പെടുന്ന സാഹചര്യമാണ്. നഗരസഭയിലെ അംഗബലം ഓരോ തവണയും കുറയുന്നു. മുന് എം.എല്.എമാര്ക്കു പോലും നഗരസഭാ വാര്ഡുകളില്നിന്ന് ജയിക്കാന് കഴിഞ്ഞില്ല. കണ്ണാടി, മാത്തൂര് ഗ്രാമപഞ്ചായത്തുകളിലാണ് പാര്ട്ടിക്കു കാര്യമായ വോട്ടുള്ളത്. പാലക്കാട് നഗരസഭയിലെയും പിരായിരി ഗ്രാമ പഞ്ചായത്തിലെയും ന്യൂനപക്ഷ വോട്ടുകള് ഷാഫിയുടെ അഭാവത്തില് ആര്ക്കൊപ്പം നില്ക്കുമെന്നാണ് നിരീക്ഷകര് ഉറ്റുനോക്കുന്നത്. ജില്ലാ പഞ്ചായത്ത് പ്രസിഡന്റ് കെ. ബിനുമോള്, ജില്ലാ പഞ്ചായത്തംഗം അഡ്വ. സഫ്ദര് ഷെരീഫ്, ഡി.വൈ.എഫ്.ഐ. നേതാവ് വി. വസീഫ് തുടങ്ങിയ പേരുകളാണ് മത്സരരംഗത്ത് ഉയര്ന്നുകേള്ക്കുന്നത്.
എന്. രമേഷ്
