കട്ടപ്പന: നിരവധി വാഹനങ്ങളില് ഇടിച്ചിട്ടും നിര്ത്താതെപോയ വാഹനം നാട്ടുകാര് തടഞ്ഞു. ബുധനാഴ്ച രാത്രി 10 ഓടെ മലയോര ഹൈവൈയിലാണ് സംഭവം നടന്നത്. ഡ്രൈവര് പീരുമേട് സ്വദേശി മനോജിനെ പോലീസ് കസ്റ്റഡിയിലെടുത്തു. കാഞ്ചിയാര് വെള്ളിലാങ്കണ്ടം കുഴല്പ്പാലത്തിന് സമീപം മാരുതി സെന് കാര് ഇന്നോവ കാറില് ഇടിച്ച ശേഷം നിര്ത്താതെ പോയതോടെയാണ് സംഭവങ്ങളുടെ തുടക്കം.
കട്ടപ്പന സ്വദേശികള് സഞ്ചരിച്ച കാറിലേക്കാണ് സെന് കാര് ഇടിച്ചത്. ഇത് ചോദ്യം ചെയ്യുന്നതിന് മുമ്പുതന്നെ ഇയാള് വാഹനം എടുത്ത് അവിടെ നിന്നും കടന്നു. കട്ടപ്പനയിലേക്ക് മലയോര ഹൈവേയിലൂടെ അമിത വേഗതയില് പോയ വാഹനം ഇലക്ര്ടിക് പോസ്റ്റിലും ഇടിച്ചു. കൂടാതെ ഇരുചക്ര വാഹനങ്ങളിലും ഇടിച്ചു. ഇന്നോവ കാറില് ഉണ്ടായിരുന്നവര് കട്ടപ്പന വരെ ഈ വാഹനത്തെ പിന്തുടര്ന്നു.
വാഹനം അപകടകരമായി പോകുന്ന ദൃശ്യങ്ങളും പകര്ത്തി. കാല്നട യാത്രക്കാര് അടക്കം ഓടി മാറിയാണ് രക്ഷപ്പെട്ടത്. കട്ടപ്പന ടൗണിലൂടെ അമിത വേഗത്തില് പോകാന് ശ്രമിച്ച കാര് ഇന്നോവ കാറില് ഉണ്ടായിരുന്നവരുടെ സുഹൃത്തുക്കളുടെ സഹായത്തോടെ കട്ടപ്പന പോലീസ് സ്റ്റേഷന് സമീപത്തുവച്ച് പിടികൂടി. വാഹനത്തില് ഒരാള് മാത്രമാണ് ഉണ്ടായിരുന്നത്.
കാറില് മദ്യക്കുപ്പിയും ഉണ്ടായിരുന്നു. കൂടാതെ കോടതി ജോലിക്കാരന് എന്ന് സൂചിപ്പിക്കുന്ന സ്റ്റിക്കര് വാഹനത്തില് ഒട്ടിച്ചിട്ടുണ്ട്. വിവിധ സ്ഥലങ്ങളില് ഇടിച്ചതോടെ വാഹനം പൂര്ണമായി തകര്ന്ന സ്ഥിതിയിലാണ്.
