കാമ്പുള്ള കഥാപാത്രങ്ങളിലൂടെയും മികച്ച പ്രകടനങ്ങളിലൂടെയും പ്രേക്ഷകമനസ്സിലിടം നേടിയ ബോളിവുഡ് താരമാണ് വിക്രാന്ത് മാസി. പ്രേക്ഷകപ്രശംസയും നിരൂപകപ്രശംസയും ഒരുപോലെ പിടിച്ചുപറ്റിയ ചിത്രങ്ങളാണ് വിക്രാന്തിന്റെ കരിയറിലുള്ളത്. തന്റെ കരിയറിന്റെ പീക്കില് നില്ക്കുമ്പോള് വിക്രാന്ത് മാസി അഭിനയത്തില് നിന്ന് വിരമിക്കുന്നുവെന്ന റിപ്പോർട്ടുകള് പുറത്തു വന്നു. താരത്തിന്റെ ആ സോഷ്യല് മീഡിയ പോസ്റ്റ് ഞെട്ടലോടെയാണ് ആരാധകർ ഏറ്റെടുത്തത്.
എന്നാല്, ഇപ്പോഴിതാ വിഷയത്തില് വ്യക്ത വരുത്തിയിരിക്കുകയാണ് വിക്രാന്ത് മാസി. ഒരു വലിയ ഇടവേള എടുക്കുന്നു എന്നു മാത്രമാണ് ഉദ്ദേശിച്ചതെന്നും തന്റെ വാക്കുകള് ആളുകള് തെറ്റായി വ്യാഖ്യാനിച്ചതാണെന്നും താരം വ്യക്തമാക്കി.
‘‘എനിക്ക് കുറച്ച് സമയം ഇടവേളയെടുക്കണം. ക്രാഫ്റ്റ് മെച്ചപ്പെടുത്താൻ ആഗ്രഹിക്കുന്നു. ഏകാന്തത അനുഭവിക്കുന്നു. നേരത്തെ ഇട്ട പോസ്റ്റ് ഞാൻ അഭിനയം വിടുന്നു, വിരമിക്കുന്നു എന്ന തരത്തില് തെറ്റായി വ്യാഖ്യാനിക്കപ്പെടുകയായിരുന്നു. എന്റെ ശ്രദ്ധ ഇനി കുറച്ചുകാലം കുടുംബത്തിനും ആരോഗ്യത്തിനും വേണ്ടി മാറ്റി വെക്കണമെന്ന് കരുതുന്നു. മികച്ച ഒരു സമയം നോക്കി മടങ്ങിവരുന്നതായിരിക്കും...’’ വിക്രാന്ത് പറഞ്ഞു. ഒരു മാധ്യമത്തിന് നല്കിയ അഭിമുഖത്തിലാണ് താരമിത് പറഞ്ഞത്.
കഴിഞ്ഞ ദിവസമാണ് വിക്രാന്ത് മാസി താൻ അഭിനയത്തില് നിന്ന് വിരമിക്കുകയാണെന്ന സൂചനകളോടെ സോഷ്യല് മീഡിയയില് കുറിപ്പ് പങ്കുവച്ചത്. ‘‘അസാധാരണമായിരുന്നു കഴിഞ്ഞ കുറച്ച് വർഷങ്ങള്. നിങ്ങളുടെ അകമഴിഞ്ഞ പിന്തുണയ്ക്ക് ഞാൻ ഓരോരുത്തർക്കും നന്ദി പറയുന്നു. പക്ഷേ, മുന്നോട്ട് നോക്കുമ്ബോള് ഒരു ഭർത്താവ്, പിതാവ്, മകൻ എന്ന നിലയില് വീട്ടിലേക്ക് മടങ്ങാനുള്ള സമയമാണിതെന്ന് ഞാൻ മനസ്സിലാക്കുന്നു. കൂടാതെ ഒരു അഭിനേതാവ് എന്ന നിലയിലും. 2025-ല് നമ്മള് പരസ്പരം അവസാനമായി കാണും. അവസാന രണ്ട് ചിത്രങ്ങളും ഒരുപാട് ഓർമകളുമുണ്ട്. ഒരിക്കല്ക്കൂടി നന്ദി...’’ വിക്രാന്ത് മാസി ഇൻസ്റ്റാഗ്രാമില് കുറിച്ചു.
മിനിസ്ക്രീനിലൂടെയാണ് വിക്രാന്ത് മാസി ബിഗ് സ്ക്രീനിലേക്ക് എത്തിയത്. 2007-ല് ‘ധൂം മച്ചാവോ ധൂം’ എന്ന ടെലിവിഷൻ ഷോയില് ആമിർ ഹാസൻ എന്ന കഥാപ്രാത്രത്തെ അവതരിപ്പിച്ചാണ് വിക്രാന്ത് മാസി അഭിനയരംഗത്തേക്ക് എത്തിയത്. പിന്നീട് ധരം വീർ, ബാലികാവധു, ബാബ ഐസോ വർ ധൂണ്ടോ, ഖുബൂല് ഹേ തുടങ്ങിയ ടെലിവിഷൻ സീരിയലുകളില് അഭിനയിച്ചു. ബാലികാ വധു എന്ന പരമ്പരയിലെ ശ്യാം സിങ് എന്ന കഥാപാത്രം വിക്രാന്തിന്റെ കരിയറില് ശ്രദ്ധിക്കപ്പെട്ടതാണ്.
2013-ല് രണ്വീർ സിങ്, സോനാക്ഷി സിൻഹ എന്നിവർ പ്രധാനവേഷത്തില് എത്തിയ വിക്രമാദിത്യ മോഠ്വനിയുടെ ലൂട്ടേര എന്ന ചിത്രത്തിലൂടെയാണ് താരം ബിഗ് സ്ക്രീനില് അരങ്ങേറ്റം കുറിച്ചത്. മിർസാപുർ പരമ്പരയിലെ പ്രകടനം വിക്രാന്തിന്റെ കരിയറിലെ പ്രധാന വഴിത്തിരിവായി മാറി. മലയാളചിത്രം ഫോറൻസികിന്റെ റീ മേക്കിലും താരം അഭിനയിച്ചിരുന്നു. വിക്രാന്ത് പ്രധാനകഥാപാത്രങ്ങളെ അവതരിപ്പിച്ച ട്വല്ത് ഫെയ്ല്, സെക്ടർ 36, സബർമതി എക്സ്പ്രസ് എന്നീ സിനിമകള് വലിയ വിജയം നേടിയിരുന്നു.
