ന്യൂഡല്ഹി: ഭരണഘടനാ ശില്പിയായ ഡോ. ബി.ആര്. അംബേദ്കര് 1940-ല് മഹാരാഷ്ട്രയിലെ സത്താറയില് ആര്.എസ്.എസ്. ശാഖ സന്ദര്ശിച്ചിട്ടുണ്ടെന്ന് സംഘടനയുടെ മാധ്യമ വിഭാഗം അവകാശപ്പെട്ടു. ആര്.എസ്.എസ്. ദളിത് വിരുദ്ധമാണെന്ന ആരോപണം തെറ്റാണെന്നും വിശ്വ സംവാദ കേന്ദ്ര(വി.എസ്.കെ.)ത്തിന്റെ വിദര്ഭ വിഭാഗം പറഞ്ഞു.
' ആര്.എസ്.എസ്. ദളിത് വിരുദ്ധരാണെന്ന് ആരോപണമുണ്ട്. ബാബാസാഹേബ് അംബേദ്കറിനെയും ആര്.എസ്.എസിനെയും കുറിച്ച് തെറ്റായ വിവരങ്ങള് പ്രചരിപ്പിച്ചിരുന്നു. എന്നാല് ഇപ്പോള് ഡോ. അംബേദ്കറും ആര്.എസ്.എസും തമ്മിലുള്ള ബന്ധം വെളിപ്പെടുത്തുന്ന പുതിയ രേഖ പുറത്തുവന്നിരിക്കുന്നു. ഡോ. അംബേദ്കര് 1940 ജനുവരി 2 ന് സത്താറ ജില്ലയിലെ കരാഡില് ഒരു ശാഖ സന്ദര്ശിക്കുകയും പ്രവര്ത്തകരെ അഭിസംബോധനചെയ്യുകയും ചെയ്തു. ചില വിഷയങ്ങളില് അഭിപ്രായവ്യത്യാസങ്ങളുണ്ടെങ്കിലും സംഘത്തെ താന് അടുപ്പത്തോടെയാണു കാണുന്നതെന്നും അദ്ദേഹം പ്രസംഗത്തില് പറഞ്ഞു.'-വി.എസ്.കെയുടെ പ്രസ്താവനയില് പറയുന്നു.
1940 ജനുവരി 9-ന് മറാത്തി ദിനപത്രമായ കേസരിയില് ഡോ. അംബേദ്കറുടെ ആര്.എസ്.എസ്. ശാഖാ സന്ദര്ശനത്തെക്കുറിച്ച് റിപ്പോര്ട്ട് പ്രസിദ്ധീകരിച്ചെന്നു പറയുന്ന വി.എസ്.കെ., പ്രസ്താവനയ്ക്കൊപ്പം വാര്ത്തയുടെ ക്ലിപ്പിങ്ങും പുറത്തുവിട്ടു. 'ആര്.എസ്.എസ്. നേതാവ് ദത്തോപാന്ത് ഠേങ്ഡി എഴുതിയ 'ഡോ. അംബേദ്കര് ഒൗര് സമാജിക് ക്രാന്തി കി യാത്ര' എന്ന പുസ്തകത്തില് അംബേദ്കറും ആര്.എസ്.എസും തമ്മിലുള്ള ബന്ധത്തെക്കുറിച്ചു വ്യക്തമാക്കുന്നുണ്ട്.
ആര്.എസ്.എസ്. പ്രവര്ത്തകര് നിരന്തരം അംബേദ്കറുമായി ബന്ധപ്പെട്ടിരുന്നെന്നും ആര്.എസ്.എസ് ഹിന്ദുക്കളെ ഒന്നിപ്പിക്കുന്ന ഒരു പാന്-ഇന്ത്യ സംഘടനയാണെന്ന് ഡോ. അംബേദ്കറിനും അറിയാമായിരുന്നെന്നും പുസ്തകത്തില് പറയുന്നു.
ബ്രാഹ്മണര്ക്കു വേണ്ടി മാത്രമുള്ളതാണ് സംഘമെന്ന ആരോപണം തെറ്റാണെന്ന് തെളിഞ്ഞിരിക്കുന്നു. മഹാത്മാഗാന്ധി 1934-ല് മഹാരാഷ്ട്രയിലെ വാര്ധയിലെ ആര്.എസ്.എസ്. ക്യാമ്പ് സന്ദര്ശിച്ചപ്പോള് അവിടെ സംഘത്തില് നാനാജാതി മതസ്ഥരായ സന്നദ്ധപ്രവര്ത്തകര് ഉണ്ടെന്ന് മനസിലാക്കി. ക്യാമ്പിലെ ഒരു സ്വയംസേവകനും സ്വന്തം ജാതിയോ മറ്റ് സ്വയംസേവകരുടെയോ ജാതി അറിയാന് താല്പ്പര്യമില്ലെന്ന് അദ്ദേഹം തിരിച്ചറിഞ്ഞു. ഇതു കണ്ട് ഗാന്ധിജി വളരെ ആശ്ചര്യപ്പെട്ടു.
അടുത്ത ദിവസം, അദ്ദേഹം ആര്.എസ്.എസ്. സ്ഥാപകന് ഡോ. ഹെഡ്ഗേവാറുമായി ഒരു കൂടിക്കാഴ്ച നടത്തി. തൊട്ടുകൂടായ്മ ഇല്ലാതാക്കാനുള്ള പരിപാടി വിജയകരമായി നടപ്പിലാക്കിയതിന് അദ്ദേഹം അദ്ദേഹത്തെ അഭിനന്ദിച്ചു.'-വി.എസ്.കെ. പറഞ്ഞു.
