തിരുവനന്തപുരം : തൃണമൂല് കോണ്ഗ്രസിന്റെ സംസ്ഥാന കോ ഓര്ഡിനേറ്ററായ പി.വി.അന്വര് യു.ഡി.എഫിന് നിലമ്പൂര് സീറ്റ് വിട്ടുകൊടുക്കുന്നതു രാഷ്ട്രീയ ഭാവി സുഭദ്രമാക്കാന്. കേരളത്തില് മുന്നണി രാഷ്ട്രീയത്തിനൊപ്പം നിന്നാലെ ജയിക്കാന് കഴിയൂവെന്ന് അന്വറിന് അറിയാം.
മലപ്പുറത്ത് കോണ്ഗ്രസ് മത്സരിക്കുന്ന സീറ്റാണ് നിലമ്പൂര്. ഇൗ സീറ്റിനുവേണ്ടി വാദിച്ചാല് യു.ഡി.എഫ്. പ്രവേശം അത്ര സുഗമമാകില്ലെന്ന് അന്വര് മനസിലാക്കി. ഇതോടെയാണ് അന്വര് നിലമ്പൂരില് മത്സരിക്കേണ്ടതില്ലെന്ന തീരുമാനത്തിലെത്തിയത്. കോണ്ഗ്രസ് ഹൈക്കമാന്ഡിന്റെ നിലപാടാകും അന്വറിന്റെ യു.ഡി.എഫ് മുന്നണി പ്രവേശത്തില് ഏറ്റവും നിര്ണായകം.
ഇതിനിടെയിലും ഡി.സി.സി. പ്രസിഡന്റ് വി.എസ്. ജോയിയെ സ്ഥാനാര്ത്ഥിയാക്കണമെന്ന് പറഞ്ഞുവയ്ക്കുകയും ചെയ്തു. നിലമ്പൂരില് തന്റെ രാഷ്ട്രീയ എതിരാളിയായി അന്വര് കണ്ടിരുന്ന ആര്യാടന് ഷൗക്കത്തിനെ കോണ്ഗ്രസ് മത്സരിപ്പിക്കരുതെന്ന സന്ദേശമാണ് ഇതിലൂടെ നല്കുന്നത്. ഇതിനൊപ്പം വി.ഡി. സതീശനോടു മാപ്പും പറഞ്ഞു.
രാഹുല് ഗാന്ധിയുടെ രാഷ്ട്രീയ ഡി.എന്.എയിലും വിശദീകരണം നല്കി. ഇതെല്ലാം യു.ഡി.എഫിലേക്ക് എടുക്കാനുള്ള അന്വറിന്റെ നീക്കമാണ്. തൃണമൂല് കോണ്ഗ്രസിനെ ഇനി യു.ഡി.എഫില് എടുക്കുന്നതില് കോണ്ഗ്രസും മുസ്ലിം ലീഗും എതിരു നില്ക്കില്ലെന്നാണ് അന്വറിന്റെ പ്രതീക്ഷ.അന്വറിന്റെ മാപ്പ് സ്വീകരിക്കുമെന്ന് വി.ഡി. സതീശനും പ്രതികരിച്ചു. കെ.പി.സി.സി. അധ്യക്ഷന് കെ. സുധാകരനും മുതിര്ന്ന നേതാവ് രമേശ് ചെന്നിത്തലയും അന്വറിന് അനുകൂലമാണ്.
എന്നാല് നിലമ്പൂരിലെ സ്ഥാനാര്ത്ഥിയെ തങ്ങള് തീരുമാനിക്കുമെന്നും കോണ്ഗ്രസ് പറയുന്നു. ആര്യാടന് ഷൗക്കത്തു പോലും അന്വറിനെ വ്യക്തിപരമായി കടന്നാക്രമിച്ചിട്ടില്ല. യു.ഡി.എഫിനെ അധികാരത്തില് എത്തിക്കുമെന്ന അന്വറിന്റെ പരാമര്ശം നേതാക്കളെ ആവേശത്തിലാക്കിയിട്ടുണ്ട്. പിണറായിസത്തിനെതിരായ പ്രചാരണത്തിന് അന്വറാണ് നല്ല പോരാളിയന്ന അഭിപ്രായം യു.ഡി.എഫില് സജീവമാണ്.
