തിരുവനന്തപുരം: ബി.ജെ.പി. ബന്ധം അവസാനിപ്പിച്ചാല് ബി.ഡി.ജെ.എസിനെ ഇടതുമുന്നണിയില് ഉള്പ്പെടുത്താന് സി.പി.എമ്മില് ധാരണ. മുന്നണിമാറ്റം ചര്ച്ചചെയ്യാന് ബി.ഡി.ജെ.എസ്. അടിയന്തരയോഗം വിളിച്ചു. സി.പി.എമ്മുമായി ചില ബി.ഡി.ജെ.എസ്. നേതാക്കള് അനൗദ്യോഗികചര്ച്ചകള് നടത്തിയതായും സൂചന.
തിടുക്കത്തില് ബി.ജെ.പിയെ പിണക്കി മറുകണ്ടം ചാടുന്നതിനോട് പാര്ട്ടി അധ്യക്ഷന് തുഷാര് വെള്ളാപ്പള്ളിക്കു താത്പര്യക്കുറവുണ്ട്. ബി.ജെ.പിയോടു ചില ആവശ്യങ്ങള്കൂടി ഉന്നയിക്കാനും നടപ്പായില്ലെങ്കില് മുന്നണിമാറ്റത്തിലേക്കു നീങ്ങാനുമാണു തീരുമാനം. അഞ്ച് നിയമസഭാ സീറ്റ് ലഭിച്ചാല് ഇടതുമുന്നണിയില് ചേരാമെന്ന സന്ദേശമാണു ചില ബി.ഡി.ജെ.എസ്. നേതാക്കള് സി.പി.എമ്മിനെ അറിയിച്ചത്. എസ്.എന്.ഡി.പി. യോഗം ജനറല് സെക്രട്ടറി വെള്ളാപ്പള്ളി നടേശനും മുന്നണിമാറ്റത്തിന് അനുകൂലമാണ്. ആലപ്പുഴയില് മൂന്ന് നിയമസഭാ സീറ്റുകളാണു ലക്ഷ്യം.
ഇടതുമുന്നണിയുടെ ഭാഗമായി തദ്ദേശതെരഞ്ഞെടുപ്പില് സംസ്ഥാനത്തെ എല്ലാ പഞ്ചായത്തിലും മത്സരിക്കാനുള്ള അവസരവും ബി.ഡി.ജെ.എസ്. ആഗ്രഹിക്കുന്നു. തദ്ദേശ, നിയമസഭാ തെരഞ്ഞെടുപ്പുകളിലെ സീറ്റ് ആവശ്യം സി.പി.എം. അംഗീകരിച്ചില്ലെങ്കില് യു.ഡി.എഫ്. പ്രവേശനസാധ്യതയും തേടും. ഫെബ്രുവരി ഒന്നിന് ചേര്ത്തലയിലാണ് ബി.ഡി.ജെ.എസ്. സംസ്ഥാന നിര്വാഹകസമിതി യോഗം.
കോട്ടയം ജില്ലാ കമ്മിറ്റിയില് മുന്നണിമാറ്റപ്രമേയം വന്നതിനു പിന്നാലെയാണ് അടിയന്തരയോഗം. ഒരു പതിറ്റാണ്ടോളമായി എന്.ഡി.എയില് അവഗണന നേരിടുന്നുവെന്ന പരാതി പാര്ട്ടി നേതൃത്വത്തിനുണ്ട്.
