വ്യത്യസ്തത ഉണര്ത്തുന്ന ഒട്ടനവധി വീഡിയോകള് സോഷ്യല് മീഡിയയിലൂടെ പുറത്തുവരാറണ്ട്. ഇപ്പോഴിതാ ദക്ഷിണാഫ്രിക്കയിലെ കോടതിയില് നിന്നുള്ള ദൃശ്യങ്ങളാണ് നെറ്റീസണ്സിനിടയില് ഞെട്ടല് സൃഷ്ടിക്കുന്നത്. കോടതിയില് ഹാജരാക്കിയ കുറ്റാരോപിതനായ യുവാവ് കെട്ടിടത്തിന് മുകളില് നിന്നും അതിവിദഗ്ദ്ധമായി താഴേക്കിറങ്ങി ഓടിരക്ഷപ്പെടുന്നതാണ് വീഡിയോയില് കാണുന്നത്.
കോടതിയില് പോലും ഇതാണോ അവസ്ഥ? ഇത്രപോലും സുരക്ഷ ഒരു കോടതിയില് ഇല്ലേ എന്നാണ് വീഡിയോ വൈറലായതിന് പിന്നാലെ പലരും ചോദിക്കുന്നത്. ദക്ഷിണാഫ്രിക്കന് പ്രതിരോധ കമ്പനിയായ സബര്ബന് കണ്ട്രോള് സെന്ററാണ് പ്രസ്തുത വീഡിയോ സോഷ്യല് മീഡിയയില് ഷെയര് ചെയ്തിരിക്കുന്നത്. ജെപ്പിലെ ജോഹന്നാസ്ബര്ഗ് കോടതിയില് ഹാജരാക്കിയ സമയത്താണ് ഇയാള് കസ്റ്റഡിയില് നിന്നും രക്ഷപ്പെട്ടിരിക്കുന്നത്.
ഓനോഷാന താന്ഡോ സാദികി എന്ന യുവാവിനെ വീട് തകര്ത്ത് അകത്ത് കയറി മോഷണം നടത്തിയതിനാണ് അറസ്റ്റ് ചെയ്ത് കോടതിയില് ഹാജരാക്കിയത് എന്നാണ് വീഡിയോയുടെ കാപ്ഷനില് പറയുന്നത്. വീഡിയോയില് ഇയാള് കോടതിയുടെ മുകളിലെ നിലയില് നിന്നും അടുത്ത നിലയിലേക്ക് ഇറങ്ങുന്നതിന്റെ ദൃശ്യങ്ങളാണ് കാണുന്നത്. അതിവിദഗ്ദ്ധമായി താഴേക്കിറങ്ങിയ ഇയാള് അവിടെ നിന്നും ഏറ്റവും താഴെ എത്തുകയും അവിടെ നിന്നും പുറത്തേക്ക് ഓടിപ്പോവുകയും ചെയ്യുന്നതും വീഡിയോയില് കാണാം. ആരും ഇയാളെ തടയുന്നതോ, ഇയാള്ക്ക് പിന്നാലെ പോകുന്നതോ ഒന്നും തന്നെ വീഡിയോയില് കാണാന് സാധിക്കുന്നില്ല.
സോഷ്യല് മീഡിയയില് പങ്കുവച്ചിരിക്കുന്ന വീഡിയോയ്ക്ക് വന് വിമര്ശനങ്ങളാണ് ഉയരുന്നത്. കോടതിയില് ഇത്രയും സുരക്ഷാവീഴ്ചയാണ് എങ്കില് മറ്റുള്ള സ്ഥലങ്ങളിലെ കാര്യം പറയേണ്ടതുണ്ടോ എന്നായിരുന്നു മിക്കവരുടേയും സംശയം. വീഡിയോയ്ക്ക് രസകരമായ കമന്റുകള് നല്കിയവരും ഉണ്ടായിരുന്നു. 'എങ്ങനെയാണ് മോഷണം നടത്തിയത് എന്ന് അയാള് കാണിച്ചു തരികയാണ്' എന്ന് കമന്റ് നല്കിയവരുണ്ട്.
