ഐസിസി ചാമ്പ്യന്സ് ട്രോഫി 2025 ല് ഓസ്ട്രേലിയ ഇന്ത്യയോട് സെമിയില് പുറത്തായതിന് പിന്നാലെ ഓസ്ട്രേലിയന് ക്യാപ്റ്റനും ഇതിഹാസതാരവുമായ സ്റ്റീവ് സ്മിത്ത് 50 ഓവര് ഫോര്മാറ്റില് നിന്ന് വിരമിക്കല് പ്രഖ്യാപിച്ചു. ഏകദിന ഫോര്മാറ്റില് നിന്നുമാണ് വിരമിക്കല് പ്രഖ്യാപിച്ചിട്ടുള്ളത്. രണ്ടു ലോകകപ്പ് നേടിയ ടീമില് അംഗമായിരുന്ന സ്മിത്ത് പുതിയ താരങ്ങള്ക്കായി വഴിമാറിക്കൊടുക്കുകയാണെന്ന് പറഞ്ഞു.
തന്റെ തീരുമാനത്തെക്കുറിച്ച് തുറന്ന് പറഞ്ഞ സ്മിത്ത്, ഏകദിന ഫോര്മാറ്റില് പുതുമുഖങ്ങള്ക്ക് ചുവടുവെക്കാന് പറ്റിയ സമയമാണിതെന്ന് പറഞ്ഞു. ''ഇപ്പോള് ആളുകള്ക്ക് 2027 ലോകകപ്പിനുള്ള തയ്യാറെടുപ്പ് ആരംഭിക്കാനുള്ള മികച്ച അവസരമാണ്, അതിനാല് വഴിയൊരുക്കാനുള്ള ശരിയായ സമയമാണിതെന്ന് തോന്നുന്നു.'' സ്മിത്ത് വ്യക്തമാക്കി. അതേസമയം ദേശീയടീമിനൊപ്പം ടെസ്റ്റില് തുടരുമെന്നും വയക്തമാക്കി.
ലോക ടെസ്റ്റ് ചാമ്പ്യന്ഷിപ്പ് ഫൈനല്, ശൈത്യകാലത്ത് വെസ്റ്റ് ഇന്ഡീസ് പര്യടനം, തുടര്ന്ന് ഇംഗ്ലണ്ട് പര്യടനം എന്നിവയ്ക്കായി ഞാന് ശരിക്കും കാത്തിരിക്കുകയാണെന്നും ആ വേദിയില് എനിക്ക് ഇനിയും ഒരുപാട് സംഭാവന ചെയ്യാനുണ്ടെന്ന് എനിക്ക് തോന്നുന്നു. ഓസ്ട്രേലിയയ്ക്കായി 170 ഏകദിനങ്ങളില് കളിച്ച സ്മിത്ത് 43.28 ശരാശരിയില് 12 സെഞ്ചുറികളും 35 അര്ധസെഞ്ചുറികളും ഉള്പ്പെടെ 5800 റണ്സും 28 വിക്കറ്റുകളും കുറിച്ചു.
ടോപ്പ് ഓര്ഡര് ബാറ്ററായ സ്മിത്ത് 2015-ലും 2023-ലും ഓസ്ട്രേലിയയുടെ ക്രിക്കറ്റ് ലോകകപ്പ് ജേതാക്കളായ ടീമുകളുടെ അവിഭാജ്യ അംഗം കൂടിയായിരുന്നു. 50 ഓവര് ഫോര്മാറ്റില് ഓസ്ട്രേലിയയുടെ പ്രകടനത്തിന് വലിയ സംഭാവന നല്കിയ സ്റ്റീവിന് മികച്ച ഏകദിന കരിയറിന് അഭിനന്ദനങ്ങള്,' ക്രിക്കറ്റ് ഓസ്ട്രേലിയ ചീഫ് എക്സിക്യൂട്ടീവ് ടോഡ് ഗ്രീന്ബെര്ഗ് പറഞ്ഞു.
