മലപ്പുറം : നിലമ്പൂര് ഉപതിരഞ്ഞെടുപ്പ് പ്രചാരണത്തില് തന്നെ ആരും ക്ഷണിച്ചില്ലായെന്ന ശശി തരൂര് എംപിയുടെ വെളിപ്പെടുത്തലില് പ്രതികരണവുമായി മുതിര്ന്ന കോണ്ഗ്രസ് നേതാവ് തിരുവഞ്ചൂര് രാധാകൃഷ്ണന്.പാര്ട്ടി പ്രവര്ത്തകനെന്ന നിലയില് സ്വാഭാവികമായും ഒരു ഉത്തരവാദിത്തമുണ്ടെന്നും അദ്ദേഹം മാധ്യമങ്ങളോട് പറഞ്ഞു .
ശശി തരൂര് ഇന്ത്യന് നാഷണല് കോണ്ഗ്രസിന്റെ പൊതു സ്വത്താണെന്നും അദ്ദേഹത്തിന് രാഷ്ട്രീയത്തില് തലയുയര്ത്തി നില്ക്കുന്നതിന് വേണ്ടിയുള്ള എല്ലാ അന്തരീക്ഷവും ഒരുക്കിയത് കോണ്ഗ്രസാണെന്നും തിരുവഞ്ചൂര് പറഞ്ഞു. ദേശീയ-അന്തര്ദേശീയ തലത്തില് സുപ്രധാന കാര്യങ്ങള് ഏല്പ്പിക്കാന് പറ്റിയയാളാണെന്നും എല്ലാത്തിനും യോഗ്യനാണെന്നും തിരുവഞ്ചൂര് വ്യക്തമാക്കി.
നിലമ്പൂരിലേക്ക് തന്നെ ആരും ക്ഷണിച്ചില്ലെന്നും ഒരു മിസ്കോള് പോലും ലഭിച്ചില്ലെന്നുമായിരുന്നു ശശി തരൂര് പറഞ്ഞത്. ക്ഷണിച്ചിരുന്നെങ്കില് പോകുമായിരുന്നുവെന്നും ശശി തരൂര് പറഞ്ഞു. ഷൗക്കത്ത് നല്ല സ്ഥാനാര്ത്ഥിയാണ്. അദ്ദേഹം ജയിക്കണം. നിലമ്പൂരില് എന്റെ ആവശ്യം ഉണ്ടായിരുന്നില്ലായെന്നാണ് കരുതുന്നത്. അല്ലാതെ തന്നെ അദ്ദേഹം വിജയിക്കും. ചില കോണ്ഗ്രസ് നേതൃത്വത്തോട് അഭിപ്രായ വ്യത്യാസം ഉണ്ട്. എല്ലാം നിങ്ങള്ക്ക് അറിയാം, ഒളിക്കാനൊന്നുമില്ലായെന്നും ശശി തരൂര് വ്യക്തമാക്കി.
