വാഷിങ്ടണ്: എച്ച്-1ബി വിസ അപേക്ഷകര്ക്ക് 100,000 ഡോളര് (ഏകദേശം 88 ലക്ഷം രൂപ) ഫീസ് ചുമത്താനുള്ള ഡോണള്ഡ് ട്രംപ് ഭരണകൂടത്തിന്റെ തീരുമാനം ഇന്ത്യക്ക് തിരിച്ചടിയാകും. ഇന്ത്യയില്നിന്നും ചൈനയില്നിന്നുമുള്ള വിദഗ്ധരെ ആശ്രയിക്കുന്ന സാങ്കേതിക മേഖലയ്ക്ക് ട്രംപിന്റെ തീരുമാനം തിരിച്ചടിയാകും.
രാജ്യത്തേക്ക് കൊണ്ടുവരുന്ന ആളുകള് 'വളരെ ഉന്നതമായ കഴിവുകളുള്ളവരാണെന്ന്' ഉറപ്പാക്കുകയും അമേരിക്കന് തൊഴിലാളികള്ക്ക് തൊഴില് നഷ്ടം ഉണ്ടാകില്ലെന്ന് ഉറപ്പുവരുത്തുകയും വേണമെന്നാണ്' ട്രംപിന്റെ നിലപാട്. ഏറ്റവും കൂടുതല് ദുരുപയോഗം ചെയ്യുന്ന കുടിയേറ്റ വിസ പദ്ധതിയാണു എച്ച്-1ബിയെന്നു വൈറ്റ് ഹൗസ് സ്റ്റാഫ് സെക്രട്ടറി വില് ഷാര്ഫ് അഭിപ്രായപ്പെട്ടു.
എച്ച്-1ബി വിസ
എച്ച്-1ബി ഒരു താല്ക്കാലിക അമേരിക്കന് തൊഴില് വിസയാണ്. ഇതു പ്രത്യേക കഴിവുകളുള്ള വിദേശ പ്രഫഷണലുകളെ നിയമിക്കാന് കമ്പനികളെ അനുവദിക്കുന്നു. വിദഗ്ധരെ ലഭിക്കാന് ബുദ്ധിമുള്ള മേഖലകളില്, പ്രത്യേകിച്ച് ശാസ്ത്രം, സാങ്കേതികവിദ്യ, എന്ജിനീയറിങ്, ഗണിതശാസ്ത്രം എന്നിവയില് ബിരുദാനന്തര ബിരുദമോ അതില് കൂടുതലോ ഉള്ളവര്ക്കായി 1990 ലാണ് എച്ച്-1ബി വിസ നിര്ദേശിക്കപ്പെട്ടത്.
വിസ ആദ്യം മൂന്ന് വര്ഷത്തേക്ക് നല്കുന്നു, പക്ഷേ ആറ് വര്ഷം വരെ നീട്ടാം. ഗ്രീന് കാര്ഡ് (സ്ഥിര താമസ അനുമതി) ലഭിച്ചവര്ക്ക് വിസ അനിശ്ചിതകാലത്തേക്ക് പുതുക്കാം. അപേക്ഷകര് അമേരിക്കന് പൗരത്വവും കുടിയേറ്റ സേവനങ്ങളും (യു.എസ്.സി.ഐ.എസ്.) വഴി ഓണ്ലൈനായി രജിസ്റ്റര് ചെയ്യണം. അപേക്ഷകളെ പരിഗണിക്കുന്ന രീതിയില് കൂടുതല് മാറ്റങ്ങള് ട്രംപ് ഭരണകൂടം പരിഗണിക്കുന്നുണ്ടെന്ന് ബ്ലൂംബര്ഗ് റിപ്പോര്ട്ട് ചെയ്തു. ഒരിക്കല് വിസ അനുവദിച്ചാല്, അവരുടെ വൈദഗ്ധ്യമുള്ള അമേരിക്കന് പൗരന്മാര്ക്കു തുല്യ ശമ്പളവും തൊഴില് സാഹചര്യങ്ങളും ഉറപ്പാക്കും.
തീരുമാനം ഇന്ത്യക്കാരെ ബാധിക്കുന്നതെങ്ങനെ
എച്ച്-1ബി വിസ ഉടമകളില് ഭൂരിഭാഗവും ഇന്ത്യന് വംശജരാണ്. സര്ക്കാര് ഡേറ്റ പ്രകാരം, കഴിഞ്ഞ വര്ഷം വിസ ലഭിച്ചവരില് 71 ശതമാനം ഇന്ത്യക്കാരായിരുന്നു. രണ്ടാം സ്ഥാനത്ത് ചൈനയാണ്- 11.7 ശതമാനം.
2025 ന്റെ ആദ്യ പകുതിയില്, അമസോണും അതിന്റെ ക്ലൗഡ് കമ്പ്യൂട്ടിങ് യൂണിറ്റായ എ.ഡബ്ല്യൂ.എസും 12,000 ല് അധികം എച്ച്-1ബി വിസകള്ക്കായി അംഗീകാരം നേടിയിരുന്നു, മൈക്രോസോഫ്റ്റും മെറ്റാ പ്ലാറ്റ്ഫോംസും 5,000 ല് അധികം എച്ച്-1ബി വിസ അംഗീകാരങ്ങള് നേടിയിരുന്നു.
ട്രംപിന്റെ പ്രഖ്യാപനങ്ങള് ഇന്ത്യക്കാര്ക്കു തിരിച്ചടിയാകും. ഇന്ത്യക്കാര്ക്ക് ഗ്രീന് കാര്ഡിന് അപേക്ഷിക്കാന് കഴിയുമെങ്കിലും, കാത്തിരിപ്പ് സമയം സാധാരണയായി കൂടുതലാണ്. എച്ച്-1ബി വിസക്ക് ഓരോ തവണയും 88 ലക്ഷം രൂപയില് അധികം നല്കേണ്ടിവരും.ട്രംപിന്റെ ആദ്യ ടേമിലും അദ്ദേഹം വിസ നിയന്ത്രണങ്ങള് കൊണ്ടുവന്നിരുന്നു. പിന്നീട് ജോ ബൈഡന് ആ നിയന്ത്രണങ്ങള് ഉപേക്ഷിച്ചു.
ട്രംപിന്റെ 'ഗോള്ഡ് കാര്ഡ്' വിസ പദ്ധതി
വ്യക്തികള്ക്ക് 10 ലക്ഷം ഡോളറും ബിസിനസുകള്ക്ക് 20 ലക്ഷം ഡോളറും ഫീ നിശ്ചയിച്ചിട്ടുള്ള 'ഗോള്ഡ് കാര്ഡ്' വിസ ട്രംപ് പ്രഖ്യാപിച്ചിട്ടുണ്ട്. 'ഗോള്ഡ് കാര്ഡ്' പ്ലാനിലൂടെ, അമേരിക്കക്കാര്ക്കായി ബിസിനസും ജോലിയും സൃഷ്ടിക്കാന് കഴിയുമെന്നാണ് അദ്ദേഹത്തിന്റെ പ്രതീക്ഷ.
