ചാലക്കുടി: കോടികളുടെ വികസനം ചാലക്കുടി മണ്ഡലത്തില് കൊണ്ടുവന്നുവെന്ന് പോസ്റ്ററടിച്ച് അവകാശപ്പെടുന്ന സനീഷ് കുമാര് ജോസഫ് എം.എല്.എ 2021 ലെ തെരഞ്ഞെടുപ്പില് സ്വന്തം പ്രകടനപത്രികയില് ജനങ്ങള്ക്ക് വാഗ്ദാനം നല്കിയ എത്ര പദ്ധതികള് നടപ്പാക്കിയെന്ന് പറയാന് ആര്ജവം കാണിക്കണമെന്ന് മുന് എം.എല്.എ. ബി.ഡി ദേവസി.
താന് എംഎല്എ ആയ കാലത്ത് മുന് എം.എല്.എ പൂര്ത്തീകരിക്കാത്ത കാര്യങ്ങള് ആദ്യം പൂര്ത്തീകരിക്കുകയാണ് ചെയ്തതെന്ന് ബി.ഡി ദേവസി പറഞ്ഞു. എന്നാല് പുതിയ വികസന പദ്ധതികള് ആവിഷ്കരിക്കാനോ മുന് എം.എല്.എ. തുടങ്ങി വച്ച വികസനപദ്ധതികള് പൂര്ത്തീകരിക്കാനോ സനീഷ് കുമാറിന് കഴിഞ്ഞിട്ടില്ല. നടപ്പാക്കിയെന്ന് അദ്ദേഹം പറയുന്നത് മുന് എം.എല്.എ ആരംഭിച്ച പദ്ധതികളാണ്. അതില് തന്നെ എം.എല്.എ കൊണ്ടുവന്ന 188 കോടി രൂപയുടെ പദ്ധതികള് കഴിഞ്ഞ അഞ്ച് വര്ഷമായിട്ടും ആരംഭിക്കാന് പോലും സനീഷിന് ആയിട്ടില്ലെന്ന് അദ്ദേഹം കുറ്റപ്പെടുത്തി.
ചാലക്കുടി മണ്ഡലത്തിന് അനുവദിച്ച പദ്ധതികള് പാഴാക്കിയതിന് ജനങ്ങളുടെ കോടതി ഈ തിരഞ്ഞെടുപ്പില് അദ്ദേഹത്തെ വിചാരണ നടത്തുമെന്ന് വാര്ത്താ സമ്മേളനത്തില് എല്.ഡി.എഫ് നേതാക്കളായ കെ.എസ് അശോകന്, സി.വി ജോഫി, പോളി ഡേവിസ്, പി.ഡി നാരായണന്, എന്.സി പോള്, ഉണ്ണി നാനാട്ടി എന്നിവര് അറിയിച്ചു.
