ചെന്നൈ: ഐപിഎല് സീസണിലെ തുടര്ച്ചയായ രണ്ടാം തോല്വിക്ക് പിന്നാലെ ചെന്നൈ സൂപ്പര് കിംഗ്സില് അസ്വാരസ്യങ്ങള് പുകയുന്നതായി റിപ്പോര്ട്ട്. ടീമിലെ പുതിയ അംഗമായ മലയാളി താരം സഞ്ജു സാംസണിന്റെ സാന്നിധ്യം ക്യാപ്റ്റന് റുതുരാജ് ഗെയ്ക്വാദിനെ സമ്മര്ദ്ദത്തിലാക്കുന്നു എന്ന ചര്ച്ചകള്ക്കാണ് മുന് താരങ്ങള് തുടക്കമിട്ടിരിക്കുന്നത്. പഞ്ചാബ് കിംഗ്സിനോടേറ്റ തോല്വിക്ക് പിന്നാലെ പ്രമുഖ ക്രിക്കറ്റ് വെബ്സൈറ്റായ 'ക്രിക്ബസി'ല് നടന്ന ചര്ച്ചയിലാണ് മൈക്കല് വോണും സൈമണ് ഡൂളും ഗൗരവകരമായ ഈ നിരീക്ഷണങ്ങള് പങ്കുവെച്ചത്.
എം.എസ്. ധോണി എന്ന ഇതിഹാസ നായകന് ശേഷം സിഎസ്കെയുടെ വിക്കറ്റ് കീപ്പര്-ബാറ്റര് റോളിലേക്ക് സഞ്ജു എത്തിയത് ഗെയ്ക്വാദിനെ സംബന്ധിച്ച് വെല്ലുവിളിയാണെന്ന് ഇവര് വിലയിരുത്തുന്നു. സഞ്ജുവിനെ തന്റെ ക്യാപ്റ്റന്സിക്ക് ഭീഷണിയായാണ് റുതുരാജ് കാണുന്നതെന്നും ഇത് അദ്ദേഹത്തിന്റെ പ്രകടനത്തെ ബാധിക്കുന്നുണ്ടെന്നും മുന് ഇംഗ്ലണ്ട് താരം മൈക്കല് വോണ് നിരീക്ഷിച്ചു. രാജസ്ഥാനെ ഐപിഎല് ഫൈനലില് എത്തിച്ച സഞ്ജുവിന്റെ നായക മികവ് ടീമിലെ മറ്റൊരു അധികാര കേന്ദ്രമായി മാറുമോ എന്ന ആശങ്ക ചെന്നൈ ക്യാമ്പിലുണ്ടെന്നാണ് സൂചന.
വലിയ പ്രതീക്ഷകളോടെയാണ് സഞ്ജു സാംസണ് മഞ്ഞക്കുപ്പായത്തില് എത്തിയതെങ്കിലും ആദ്യ രണ്ട് മത്സരങ്ങളിലും താരത്തിന് തിളങ്ങാനായില്ല. ആദ്യ മത്സരത്തില് 7 പന്തില് 6 റണ്സ് നേടിയ താരം രണ്ടാം മത്സരത്തില് വെറും 7 റണ്സ് ആണ് നേടിയത്. രവീന്ദ്ര ജഡേജ, സാം കറന് തുടങ്ങിയ വമ്പന് താരങ്ങളെ കൈവിട്ടാണ് സിഎസ്കെ സഞ്ജുവിനെ സ്വന്തമാക്കിയത്. അതിനാല് തന്നെ സഞ്ജുവിന്റെ ഫോമില്ലായ്മ ടീം മാനേജ്മെന്റിനും വലിയ തലവേദനയാകുന്നുണ്ട്.
ടി20 ലോകകപ്പില് ഇന്ത്യക്കായി തകര്പ്പന് പ്രകടനം കാഴ്ചവെച്ച സഞ്ജുവിന് ദക്ഷിണേന്ത്യന് ആരാധകര്ക്ക് മുന്നില് അത് ആവര്ത്തിക്കാന് ഇതുവരെ സാധിച്ചിട്ടില്ല. ഹോം ഗ്രൗണ്ടായ ചെന്നൈയില് ടീമിനെ വിജയവഴിയില് എത്തിക്കാനും സ്വന്തം സ്ഥാനം ഉറപ്പിക്കാനും സഞ്ജുവിന് വരും മത്സരങ്ങള് നിര്ണ്ണായകമാണ്. ടീമിനുള്ളിലെ പടലപ്പിണക്കങ്ങള് അവസാനിപ്പിച്ച് ഒത്തൊരുമയോടെ മുന്നോട്ട് പോയില്ലെങ്കില് ചെന്നൈയുടെ ഈ സീസണ് പ്രതിസന്ധിയിലാകുമെന്നും ക്രിക്കറ്റ് ലോകം വിലയിരുത്തുന്നു.
