താനൂര്: തെരഞ്ഞെടുക്കപ്പെട്ടാല് താനൂരിന്റെ വികസനത്തിന് പുതിയ മുഖം നല്കുമെന്ന് താനൂര് നിയോജക മണ്ഡലം യു.ഡി.എഫ്. സ്ഥാനാര്ഥി പി.കെ. നവാസ് താനൂരില് വാര്ത്താ സമ്മേളനത്തില് പറഞ്ഞു.
യു.ഡി.എഫ്. സംസ്ഥാന നേതൃത്വം പുറത്തിറക്കിയ പ്രകടന പത്രികയുടെ ചുവടു പിടിച്ചുള്ള വികസന മുന്നേറ്റങ്ങള്ക്കാണ് താനൂരില് നേതൃത്വം നല്കുക. ആഭ്യന്തര ടൂറിസത്തിന് ഏറെ സാധ്യതകള് ഉള്ള മണ്ണാണ് താനൂര്. ഒട്ടുമ്പുറം തൂവല്ത്തീരം, ഉണ്യാല്, കനോലി കനാല്, മാലിദ്വീപ് പാറയില്, ന്യൂ കട്ട് ഭാഗങ്ങളെ ബന്ധിപ്പിച്ച് ടൂറിസം സര്ക്യൂട്ട് താനൂരിന്റെ വിനോദ സഞ്ചാര സാധ്യതകളെ ഇരട്ടിയാക്കും. എല്ലാവര്ക്കും കുടിവെള്ളം എന്നത് നടപ്പിലാക്കും. ചെറുപ്പക്കാരുടെ ചിന്തയും സ്കില്ലും മെച്ചപ്പെടുത്താനുള്ള നൂതന പദ്ധതികള്ക്ക് രൂപം നല്കും.
പ്രവാസിസംബന്ധമായ കാര്യങ്ങള്ക്ക് ഊന്നല് നല്കും. യു.ഡി.എഫ് പ്രകടന പത്രികയില് പറഞ്ഞ മത്സ്യതൊഴിലാളികളുടെ ഭവന പദ്ധതി പുനസ്ഥാപിക്കുമെന്ന പ്രഖ്യാപനമുള്പ്പെടെയുള്ളവ മത്സ്യതൊഴിലാളികള്ക്കായി കൊണ്ടുവരും. മാലിന്യം പേറി ഒഴുകുന്ന കനോലി കനാലിന്റെ നവീകരണം തന്റെ മുഖ്യ അജണ്ടയാണ്. മത്സ്യത്തൊഴിലാളികളുടെ പ്രതീക്ഷകള്ക്കൊത്ത് താനൂര് ഫിഷിങ് ഹാര്ബറിനെ മാറ്റിയെടുക്കും.
കേരളത്തിന്റെ കായിക ഭൂപടത്തിലേക്ക് താനൂരിനെയും കൊണ്ടുവരേണ്ടതുണ്ട്. അത്രമേല് കായിക താരങ്ങള് ഉള്ള മണ്ണാണ് താനൂര്. കാര്ഷിക മേഖലയുടെ സമ്പൂര്ണ വികസനത്തിന് പദ്ധതികള് ആവിഷ്കരിക്കും. നെല്കര്ഷകര് ഉള്പ്പെടെയുള്ളവര് അനുഭവിക്കുന്ന പ്രയാസങ്ങള്ക്ക് പരിഹാരം കാണാനുള്ള പദ്ധതികള്ക്ക് പ്രഥമ പരിഗണന നല്കും. നിര്മ്മിത ബുദ്ധിയുടെ കാലത്ത് അതിനനുയോജ്യമായ രീതികള് വിദ്യാഭ്യാസ മേഖലയില് നടപ്പിലാക്കുമെന്നും അദ്ദേഹം പറഞ്ഞു. വാര്ത്താ സമ്മേളനത്തില് സ്ഥാനാര്ഥിക്കൊപ്പം യു.ഡി.എഫ്. നേതാക്കളായ കെ.എന്. മുത്തുക്കോയ തങ്ങള്, പി. രത്നാകരന്, എം.പി. അഷ്റഫ്, സി. ജയശങ്കര്, നൂഹ് കരിങ്കപ്പാറ പങ്കെടുത്തു.
