പത്തനംതിട്ട: ഏഴംകുളം അറുകാലിക്കലിൽ തിരഞ്ഞെടുപ്പ് സ്ലിപ്പ് വിതരണം ചെയ്യുന്നതിനിടെ സിപിഎം പ്രവർത്തകന് വെട്ടേറ്റു. അറുകാലിക്കൽ സ്വദേശി രാധാകൃഷ്ണനാണ് വെട്ടേറ്റത്. സംഭവത്തിൽ ഇയാളുടെ അയൽവാസിയായ അലക്സിനെ പോലീസ് കസ്റ്റഡിയിലെടുത്തു.
നിയമസഭാ തിരഞ്ഞെടുപ്പിന്റെ ഭാഗമായി വീടുകളിൽ സ്ലിപ്പ് വിതരണം ചെയ്യുന്നതിനിടെയാണ് രാധാകൃഷ്ണന് നേരെ ആക്രമണമുണ്ടായത്. തലയ്ക്കും കാലിനും ഗുരുതരമായി പരിക്കേറ്റ ഇദ്ദേഹത്തെ ഉടൻ തന്നെ അടുത്തുള്ള ആശുപത്രിയിൽ പ്രവേശിപ്പിച്ചു. അക്രമത്തിന് ഉപയോഗിച്ച ആയുധം പോലീസ് സംഭവസ്ഥലത്തുനിന്ന് കണ്ടെടുത്തിട്ടുണ്ട്.
ആക്രമണത്തിന് പിന്നിൽ രാഷ്ട്രീയ വിദ്വേഷമാണെന്നാണ് സിപിഎം നേതാക്കൾ ആരോപിക്കുന്നത്. പിടിയിലായ അലക്സ് സജീവ കോൺഗ്രസ് പ്രവർത്തകനാണെന്നും ബോധപൂർവമായ രാഷ്ട്രീയ ആക്രമണമാണ് നടന്നതെന്നും അവർ പറഞ്ഞു.
