തന്നോട് ചോദ്യം ചോദിക്കുന്ന മാധ്യമപ്രവര്ത്തകര്ക്ക് ചിലപ്പോഴൊക്കെ തഗ് മറുപടി നല്കാറുണ്ട് നടന് മമ്മൂട്ടി. ഇപ്പോഴിതാ വോട്ട് ചെയ്യാനെത്തിയപ്പോള് ഒരു മാധ്യമപ്രവര്ത്തകന് മമ്മൂട്ടി നല്കിയ മറുപടിയാണ് വൈറലാകുന്നത്.
വോട്ട് ചെയ്ത ശേഷം കാറിലേക്ക് കയറാന് ശ്രമിക്കശവയാണ് മമ്മൂട്ടിയെ മാധ്യമപ്രവര്ത്തകര് വളഞ്ഞത്. വോട്ട് ചെയ്തതിനെക്കുറിച്ച് ഇംഗ്ലീഷിലായിരുന്നു മാധ്യമപ്രവര്ത്തകന്റെ ചോദ്യം. എനിക്ക് ഇംഗ്ലീഷ് വല്യ പിടിയില്ല എന്നാണ് ചിരിച്ചു കൊണ്ടുളള മമ്മൂട്ടിയുടെ മറുപടി.
തൃക്കാക്കര മണ്ഡലത്തിലെ പൊന്നുരുന്നി ക്രൈസ്റ്റ് കോണ്വെന്റ് സ്കൂളിലെ 106 ാം നമ്പര് ബൂത്തിലാണ് മമ്മൂട്ടി വോട്ട് ചെയ്യാനെത്തിയത്. ഭാര്യ സുല്ഫത്തിനൊപ്പമെത്തിയ താരത്തെ കാണാന് വലിയ ജനക്കൂട്ടമാണ് സ്കൂള് പരിസരത്ത് തടിച്ചുകൂടിയത്. രാവിലെ പത്ത് മണിക്ക് ശേഷമാണ് മമ്മൂട്ടിയെത്തിയത്.
ചെന്നൈയിലായിരുന്ന മമ്മൂട്ടി വോട്ട് രേഖപ്പെടുത്താന് കൊച്ചിയിലേക്ക് വരികയായിരുന്നു. അതേസമയം 2026 ലെ കേരള നിയമസഭ തെരഞ്ഞെടുപ്പ് വോട്ടെടുപ്പ് പുരോഗമിക്കുമ്പോള് തിരക്കുകള്ക്കിടയിലും ജനാധിപത്യ പ്രക്രിയയില് പങ്കാളികളാകാന് മലയാളത്തിന്റെ പ്രിയതാരങ്ങള് പോളിങ് ബൂത്തുകളിലേക്ക് ഒഴുകിയെത്തുകയാണ്.
സംസ്ഥാനത്തിന്റെ വിവിധ ഭാഗങ്ങളില് സിനിമാ- സാംസ്കാരിക രംഗത്തെ പ്രമുഖര് വോട്ട് രേഖപ്പെടുത്താനെത്തുന്നത് വോട്ടര്മാര്ക്കിടയിലും വലിയ ആവേശമാണ് സൃഷ്ടിക്കുന്നത്. വിദേശ യാത്രകള്ക്കും ഷൂട്ടിങ് തിരക്കുകള്ക്കും അവധി നല്കിയാണ് താരങ്ങള് തങ്ങളുടെ സമ്മതിദാനാവകാശം വിനിയോഗിക്കാന് എത്തുന്നത് എന്നതും ശ്രദ്ധേയമാണ്.
