കിഴക്കമ്പലം: പോളിങ് സ്റ്റേഷനില് നിന്നുള്ള ദൂരപരിധിയെച്ചൊല്ലി കുന്നത്തുനാട് പഞ്ചായത്തിലെ മോറക്കാല സെന്റ് മേരീസ് ഹയര് സെക്കന്ഡറി സ്കൂളില് യു.ഡി.എഫ് - എന്.ഡി.എ പ്രവര്ത്തകര് തമ്മില് തര്ക്കം. സംഘര്ഷാവസ്ഥ കണക്കിലെടുത്ത് ഇരു മുന്നണികളുടെയും ബൂത്തുകള് പോലീസ് ഇടപെട്ട് പൂട്ടിപ്പിച്ചു.
പോളിങ് സേ്റ്റഷന്റെ നൂറ് മീറ്റര് പരിധിക്കുള്ളിലാണ് എന്.ഡി.എയുടെ ബൂത്ത് പ്രവര്ത്തിക്കുന്നതെന്ന് കാണിച്ച് ബുധനാഴ്ച യു.ഡി.എഫ് പോലീസില് പരാതി നല്കിയിരുന്നു. പോലീസ് ഇടപെട്ട് ഇത് നേരത്തെ പൂട്ടിച്ചെങ്കിലും വ്യാഴാഴ്ച വീണ്ടും തുറന്നു പ്രവര്ത്തിച്ചതാണ് തര്ക്കത്തിന് കാരണമായത്.
കോണ്ഗ്രസ് പ്രവര്ത്തകര് ഇതിനെ ചോദ്യം ചെയ്തതോടെ ഇരുവിഭാഗവും തമ്മില് വാക് തര്ക്കമുണ്ടാവുകയും സ്ഥലത്ത് സംഘര്ഷാവസ്ഥ രൂപപ്പെടുകയും ചെയ്തു. ഇതിനിടെ യു.ഡി.എഫിന്റെ ബൂത്തും നൂറ് മീറ്റര് പരിധി പാലിച്ചിട്ടില്ലെന്നും പൊതുസ്ഥലം കൈയേറിയാണ് ബൂത്ത് നിര്മ്മിച്ചിരിക്കുന്നതെന്നും ആരോപിച്ച് എന്.ഡി.എ പ്രവര്ത്തകരും രംഗത്തെത്തി.
കൂടുതല് പ്രവര്ത്തകര് സ്ഥലത്തേക്ക് ഒഴുകിയെത്തിയതോടെ സ്ഥിതിഗതികള് വഷളായി. സംഘര്ഷ സാധ്യത മുന്നില്ക്കണ്ട് കൂടുതല് പോലീസ് സംഘം സ്ഥലത്തെത്തി. ചര്ച്ചകള്ക്കൊടുവില് ദൂരപരിധി ലംഘിച്ചെന്ന് കണ്ടതിനെ തുടര്ന്ന് എന്.ഡി.എയുടെയും യു.ഡി.എഫിന്റെയും ബൂത്തുകള് പോലീസ് അവിടെനിന്നും മാറ്റിപ്പിച്ചു.
പോലീസിന്റെ സമയോചിതമായ ഇടപെടലിനെ തുടര്ന്ന് വലിയ സംഘര്ഷമാണ് ഒഴിവായത്. നിലവില് സ്ഥലത്ത് പോലീസ് കാവല് ഏര്പ്പെടുത്തിയിട്ടുണ്ട്.
