മൊഗാദിഷു: തുര്ക്കിയോട് വിചിത്രമായ ആവശ്യമുന്നയിച്ച് ഉഗാണ്ട പ്രസിഡന്റ് യൊവേരി മുസെവേനിയുടെ മകനും സൈനികമേധാവിയുമായ മുഹൂസി കെയ്നെറുഗാബ. 100 കോടി ഡോളറും(ഏകദേശം 8300 കോടി രൂപ) വധുവായി രാജ്യത്തെ ഏറ്റവും സുന്ദരിയായ സ്ത്രീയെ നല്കണമെന്നുമാണ് തുര്ക്കിയോട് മുഹൂസി ആവശ്യപ്പെട്ടത്. മേഖലയിലെ സുരക്ഷാ കാര്യങ്ങളില് ഉഗാണ്ട നല്കുന്ന സംഭാവനകള്ക്ക് മതിയായ അംഗീകാരം ലഭിക്കുന്നില്ലെന്നും അതിനുള്ള സാമ്പത്തിക നഷ്ടപരിഹാരം നല്കണമെന്നുമാണു കെയ്നെറുഗാബയുടെ അവകാശവാദം. 30 ദിവസത്തിനുള്ളില് തന്റെ ആവശ്യങ്ങള് അംഗീകരിച്ചില്ലെങ്കില് കമ്പാലയിലെ തുര്ക്കി എംബസി അടച്ചുപൂട്ടുമെന്നും നയതന്ത്രബന്ധം അവസാനിപ്പിക്കുമെന്നും അദ്ദേഹം ഭീഷണിപ്പെടുത്തി. കൂടാതെ, തുര്ക്കിയിലെ ഏറ്റവും സുന്ദരിയായ സ്ത്രീയെ തനിക്ക് വിവാഹം കഴിച്ചു നല്കണമെന്ന വിവാദ പരാമര്ശവും അദ്ദേഹം നടത്തി.
സൊമാലിയയുടെ തലസ്ഥാനമായ മൊഗാദിഷുവിലെ തുറമുഖങ്ങളും വിമാനത്താവളങ്ങളും ഉള്പ്പെടെയുള്ള ബിസിനസ്-അടിസ്ഥാന സൗകര്യ പദ്ധതികളില്നിന്നു തുര്ക്കി ലാഭമുണ്ടാക്കുകയാണെന്ന് സാമൂഹികമാധ്യമമായ എക്സില് പങ്കുവച്ച പോസ്റ്റില് മുഹൂസി കെയ്നെറുഗാബ കുറ്റപ്പെടുത്തി. തുര്ക്കി ലാഭം കൊയ്യുമ്പോള്, വര്ഷങ്ങളായി ഉഗാണ്ടയാണ് അവിടുത്തെ സുരക്ഷാ ചുമതല വഹിക്കുന്നതെന്ന് അദ്ദേഹം അവകാശപ്പെട്ടു. അല്-ഷബാബ് തീവ്രവാദികള്ക്കെതിരേ പോരാടാന് കഴിഞ്ഞ രണ്ടു പതിറ്റാണ്ടായി ആഫ്രിക്കന് യൂണിയന് ദൗത്യത്തിന്റെ ഭാഗമായി ഉഗാണ്ടന് സൈന്യം സൊമാലിയയിലുണ്ട്.ഇതിന്റെ സുരക്ഷാ വിഹിതമായി 100 കോടി ഡോളര് ഉഗാണ്ടയ്ക്ക് നല്കണമെന്നാണ് ആവശ്യം.'തുര്ക്കിയെ സംബന്ധിച്ചിടത്തോളം ഇത് ലളിതമായ ഒരു ഇടപാടാണ്... ഒന്നുകില് അവര് പണം നല്കണം, അല്ലെങ്കില് ഞാന് അവരുടെ എംബസി പൂട്ടും. അവര്ക്ക് വേണമെങ്കില് തുര്ക്കിയിലുള്ള ഞങ്ങളുടെ എംബസിയും പൂട്ടാം, അതില് കുഴപ്പമില്ല'- മുഹൂസി കെയ്നെറുഗാബ എക്സില് കുറിച്ചു.
