മുംബൈ: 20 കോടി രൂപയുടെ മാനനഷ്ടക്കേസ് ഒത്തുതീര്പ്പാക്കാന് 90 വയസുള്ള സ്ത്രീ വിസമ്മതിച്ചതിനെത്തുടര്ന്ന് ഹൈക്കോടതി കേസ് മാറ്റിയത് 2046 ലേക്ക്. മുംബൈയിലെ ഒരു ഹൗസിങ് സൊസൈറ്റിയുടെ മാനേജിങ് കമ്മിറ്റി അംഗങ്ങള്ക്കെതിരേ വയോധികയും മകളും കേസ് ഫയല് ചെയ്തത്. വിഷയം രമ്യമായി പരിഹരിക്കാന് കോടതി നേരത്തെ ഇരു കക്ഷികള്ക്കും സമയം അനുവദിച്ചിരുന്നു.
കഴിഞ്ഞ 20 ന് പ്രതികള് നിരുപാധികം ക്ഷമാപണം നടത്തിയാല് തര്ക്കം പരിഹരിക്കാമെന്ന നിര്ദേശമാണു മുന്നോട്ടുവച്ചത്. ചൊവ്വാഴ്ച കേസ് പരിഗണിച്ചപ്പോള് സൊസൈറ്റിയെ പ്രതിനിധീകരിക്കുന്ന മുന് കമ്മിറ്റി അംഗങ്ങള് ഉപാധികളില്ലാതെ ക്ഷമാപണം നടത്താന് സമ്മതിച്ചിരുന്നു. എന്നാല് വാദിയായ വയോധിക നിയമനടപടികള് തുടരാന് തീരുമാനിക്കുകയായിരുന്നു.
ഈ വിഷയം അടുത്ത 20 വര്ഷത്തേക്ക് പരിഗണിക്കരുതെന്ന് ഒഴികെ മറ്റൊന്നും പറയാന് ഞാന് ആഗ്രഹിക്കുന്നില്ലെന്ന് ജസ്റ്റിസ് ജിതേന്ദ്ര ജെയിന് പറഞ്ഞു. തുടര്ന്ന് കേസ് 2046 ലേക്ക് മാറ്റിവച്ചു. ഫലത്തില് കേസിന് രണ്ടു പതിറ്റാണ്ടില് തുടര്നടപടിയുണ്ടാകില്ല. ജീവിതത്തിന്റെ അവസാനത്തില് കക്ഷികള് തമ്മിലുള്ള അഹങ്കാര പോരാട്ടം കോടതി സംവിധാനത്തെ തടസപ്പെടുത്തുന്ന ഒന്നാണിത്. കൂടുതല് മുന്ഗണന ആവശ്യമുള്ള കാര്യങ്ങള് ഏറ്റെടുക്കുന്നതില്നിന്നു കോടതിയെ ഇത്തരം പ്രവണതകള് തടയുകയാണെന്ന് കോടതി വിലയിരുത്തി.
ഭവന സൊസൈറ്റിയുടെ അറ്റകുറ്റപ്പണികള്ക്കും പരിപാലനത്തിനുമായുള്ള ഫണ്ട് പിരിവുമായി ബന്ധപ്പെട്ട് വയോധികയെ അധിക്ഷേപിച്ചതാണു പതിറ്റാണ്ട് പഴക്കമുള്ള വിഷയങ്ങള്ക്ക് കാരണം. ഇതേത്തുടര്ന്നാണ് അവര് മാനനഷ്ടക്കേസ് ഫയല് ചെയ്തത്.
