ജയ്പൂര്: ഐപിഎല് 2026-ലെ മത്സരത്തിനിടെ കൗമാര താരം വൈഭവ് സൂര്യവംശിയെ പുറത്താക്കിയ ശേഷം ഡല്ഹി ക്യാപിറ്റല്സ് പേസര് കൈല് ജാമിസണ് നടത്തിയ പ്രകോപനപരമായ ആംഗ്യത്തിന് രൂക്ഷ വിമര്ശനം. മത്സരത്തിലെ രണ്ടാം ഓവറില് ഇന്സ്വിംഗിംഗ് യോര്ക്കറിലൂടെ ജാമിസണ് സൂര്യവംശിയെ ഞെട്ടിച്ചു. പന്തിന്റെ വേഗതയിലും സ്വിംഗിലും പതറിയ വൈഭവിന്റെ ബാറ്റിന്റെ അറ്റത്ത് തട്ടിയ പന്ത് സ്റ്റംപ് തെറിപ്പിച്ചു.
ഈ സീസണിലെ 11 ഇന്നിംഗ്സുകളില് വൈഭവ് ഒറ്റയക്കത്തിന് പുറത്താകുന്ന മൂന്നാമത്തെ മാത്രം സംഭവമായിരുന്നു ഇത്. വിക്കറ്റ് നേടിയ ശേഷമുള്ള ജാമിസണിന്റെ അതിരുകടന്ന ആഘോഷം കടുത്ത വിമര്ശനങ്ങള്ക്ക് വഴിവെച്ചു. എക്സില് പങ്കുവെച്ച കുറിപ്പില്, ജാമിസണിന്റെ പ്രതികരണം തീര്ത്തും അനാവശ്യമായിരുന്നുവെന്ന് മുന് ഇന്ത്യന് ക്രിക്കറ്റ് താരം പ്രിയങ്ക് പാഞ്ചാല് രൂക്ഷമായി വിമര്ശിച്ചു.
'31 കാരനായ കൈല് ജാമിസണ് 15 വയസ്സുള്ള ഒരു കുട്ടിയെ പുറത്താക്കിയ ശേഷം ഇത്തരത്തില് പെരുമാറുന്നത് കാണാന് അത്ര സുഖമുള്ള കാഴ്ചയല്ല. എങ്കിലും, വൈഭവ് എന്ന ബാറ്റിംഗ് പ്രതിഭ എതിരാളികളില് എത്രത്തോളം ഭയവും സ്വാധീനവും ചെലുത്തിയിട്ടുണ്ട് എന്നതിന്റെ തെളിവ് കൂടിയാണിത്.' പാഞ്ചാല് കുറിച്ചു. ഈ സീസണില് സൂര്യവംശിയുടെ അപൂര്വ്വം പരാജയങ്ങളില് ഒന്നായിരുന്നു ഇത്.
മത്സരത്തിന് മുമ്പ് 10 കളികളില് നിന്ന് ഒരു സെഞ്ചുറിയും രണ്ട് അര്ദ്ധ സെഞ്ചുറികളും ഉള്പ്പെടെ 400 റണ്സ് വൈഭവ് നേടിയിരുന്നു. ജാമിസണിന്റെ പന്തില് രണ്ട് പന്തില് നാല് റണ്സ് മാത്രമെടുത്താണ് താരം മടങ്ങിയത്.
രാജസ്ഥാന് റോയല്സിന്റെ മുന്നിര തകര്ന്നതിന് ശേഷം നായകന് റിയാന് പരാഗും ധ്രുവ് ജൂറലും ചേര്ന്ന് 102 റണ്സിന്റെ കൂട്ടുകെട്ടുണ്ടാക്കി ടീമിനെ കരകയറ്റി. 50 പന്തില് 90 റണ്സ് അടിച്ചുകൂട്ടിയ പരാഗ് തന്റെ വിമര്ശകര്ക്ക് മറുപടി നല്കി. ജൂറല് 32 പന്തില് 40 റണ്സും, ഡൊനോവന് ഫെരേര വെറും 14 പന്തില് പുറത്താകാതെ 47 റണ്സും നേടി. ഇവരുടെ കരുത്തില് രാജസ്ഥാന് 225/6 എന്ന കൂറ്റന് സ്കോറിലെത്തി.
