അമ്പലപ്പുഴ: യാതൊരു മുന്നറിയിപ്പും സുരക്ഷയുമില്ലാതെ ദേശീയ പാതയിലെ ഗതാഗതം വഴിതിരിച്ചുവിട്ടു. പ്രധാന ജങ്ഷനുകളില് അപകടം പതിവാകുന്നു. ദേശീയ പാതയില് മണിക്കൂറുകളോളം ഗതാഗതക്കുരുക്ക്.
ദേശീയ പാതയില് വണ്ടാനം മെഡിക്കല് കോളജ് ആശുപത്രി ജങ്ഷന് തെക്ക് ഭാഗത്ത് അമ്പലപ്പുഴ വടക്ക് ഗ്രാമ പഞ്ചായത്ത് ഓഫീസിന് മുന്നില് വെച്ചാണ് ദേശീയ പാത വികസനത്തിന്റെ ഭാഗമായി ദേശീയ പാതയില് നിന്നുള്ള ഗതാഗതം സര്വീസ് റോഡിലൂടെ തിരിച്ചുവിട്ടത്. തെക്ക് ഭാഗത്തേക്ക് പോകുന്ന വാഹനങ്ങളാണ് വഴി തിരിച്ചുവിട്ടത്. എന്നാല് തൊട്ടടുത്ത പ്രധാന ജങ്ഷനായ എസ്. എന് കവല ജങ്ഷനില് ഇതുമൂലം വലിയ അപകടത്തിന് കാരണമാകുകയാണ്. ഇവിടെ ദേശീയപാതയ്ക്ക് ഇരുഭാഗത്തു നിന്നും സര്വീസ് റോഡ് വഴി വരുന്ന വാഹനങ്ങളും കഞ്ഞിപ്പാടം ഭാഗത്തുനിന്ന് വരുന്ന വാഹനങ്ങളുമെല്ലാം ഗതാഗതക്കുരുക്കില്പ്പെടുകയാണ്.
ദേശീയ പാത മണിക്കൂറുകളോളം ഗതാഗതക്കുരുക്കില്പ്പെട്ടിട്ടും ഗതാഗത നിയന്ത്രണത്തിന് ഇവിടെ പോലീസോ ഹോം ഗാര്ഡോ ഇല്ല. ജങ്ഷനിലെ ഓട്ടോറിക്ഷാ ഡ്രൈവര്മാരും സമീപത്തെ വ്യാപാരികളും ചേര്ന്നാണ് പലപ്പോഴും ഗതാഗതം നിയന്ത്രിക്കുന്നത്. കെ.എസ്.ആര്.ടി.സിയുടെ ദീര്ഘദൂര ബസുകളും ചരക്ക് ലോറികളും ഉള്പ്പടെ നൂറുകണക്കിന് വാഹനങ്ങളാണ് ഇവിടെ ഗതാഗതക്കുരുക്കില്പ്പെടുന്നത്. ഇരുചക്ര വാഹനങ്ങളാണ് കൂടുതലും ഇവിടെ അപകടത്തില്പ്പെടുന്നത്.
മഴയായതിനാല് ദേശീയപാത നിറയെ കുണ്ടും കുഴിയു മായി കിടക്കുന്നതിനാല് ഒച്ചിഴയും വേഗത്തിലാണ് വാഹനങ്ങള് വരുന്നത്. ഇതും വലിയ ഗതാഗതക്കുരുക്കിനും അപകടത്തിനും കാരണമാകുകയാണ്. ഇത് കണക്കിലെടുത്ത് അടിയന്തരമായി ജങ്ഷനില് ഗതാഗത നിയന്ത്രണത്തിന് പോലീസിനെ നിയോഗിക്കണമെന്നാണ് ആവശ്യമുയര്ന്നിരിക്കുന്നത്.
