ഹൈദരാബാദ്: ഐ.പി.എല് ടീമുകളുടെ ഉടമകള്ക്ക് അന്തിമ ഇലവനെ തെരഞ്ഞെടുക്കുന്നതില് സ്വാധീനമുണ്ടോ? കൃത്യമായ തെളിവുകളില്ലാതെ എപ്പോഴും ചര്ച്ച ചെയ്യപ്പെടുന്ന ഒരു വിഷയമാണിത്. ഓരോ വര്ഷവും കോടിക്കണക്കിന് രൂപ മുടക്കുന്ന ഐ.പി.എല് ഉടമകള് കളിയില് ഏറെ താല്പര്യമുള്ളവരാണെന്ന് എല്ലാവര്ക്കും അറിയാം. തങ്ങളുടെ ടീമുകളെ പിന്തുണയ്ക്കാന് പലരും സ്റ്റേഡിയത്തില് എത്താറുമുണ്ട്.
എന്നാല് അവര് അതിരുകടന്ന് ടീം തെരഞ്ഞെടുപ്പിലും അഭിപ്രായം പറയുന്നതായി സണ്റൈസേഴ്സ് ഹൈദരാബാദ് താരം ലിയാം ലിവിങ്സ്റ്റണ്. ഐ.പി.എല് 2026-ലെ തന്റെ അനുഭവം തന്നെയാണ് അദ്ദേഹം ഇതിന് ഉദാഹരണമായി ചൂണ്ടിക്കാണിക്കുന്നത്. ഇംഗ്ലണ്ടിന്റെ ഓള്റൗണ്ടറായ ലിവിങ്സ്റ്റണ് ഈ സീസണില് വെറും രണ്ട് മത്സരങ്ങളില് മാത്രമാണ് കളിക്കാന് അവസരം ലഭിച്ചത്. അതില് 1, 14 എന്നിങ്ങനെയായിരുന്നു അദ്ദേഹത്തിന്റെ സ്കോര്. ഉടമസ്ഥര്ക്ക് ഒരു പ്രത്യേക കളിക്കാരനോട് താല്പര്യമുള്ളതിനാലാണ് തനിക്ക് പകരം ആ കളിക്കാരനെ ടീമില് ഉള്പ്പെടുത്തിയതെന്ന് ലിവിങ്സ്റ്റണ് ആരോപിക്കുന്നു.
വിദേശ കളിക്കാരുടെ കോട്ടയില് ഒഴിവുണ്ടായിട്ടും എസ്.ആര്.എച്ച് വെറും മൂന്ന് വിദേശ താരങ്ങളെ മാത്രം വെച്ചാണ് കളിച്ചതെന്നും, തനിക്ക് തുടര്ച്ചയായ അവസരങ്ങള് നല്കാന് അവര് തയ്യാറായില്ലെന്നും അദ്ദേഹം കൂട്ടിച്ചേര്ത്തു.
'ഐ.പി.എല്ലില് മൂന്ന് തരത്തിലുള്ള സാഹചര്യങ്ങളാണുള്ളത്. ഒന്നുകില് നിങ്ങള് ടീമില് ഉറപ്പായിട്ടുണ്ടാകും, മറ്റൊന്ന് ടീമിന്റെ പരിഗണനയിലുള്ള ഒരു പകരക്കാരനായിരിക്കും നിങ്ങള്. ചിലപ്പോള് കളിക്കാം, ചിലപ്പോള് കളിക്കാതിരിക്കാം. മൂന്നാമത്തേത് ഈ വര്ഷം എനിക്കുണ്ടായ അനുഭവമാണ്. ഇത്തവണ ലേലത്തില് മുംബൈ ഇന്ത്യന്സ് സ്വന്തമാക്കാന് ആഗ്രഹിച്ച ഒരു യുവതാരത്തെ (സലില് അറോറ) കൂടുതല് തുകയെറിഞ്ഞ് ഞങ്ങള് സ്വന്തമാക്കിയിരുന്നു. ടീം ഉടമകള്ക്ക് അവനെ വലിയ കാര്യമായിരുന്നു. അതുകൊണ്ട് തന്നെ അവന് ടീമില് കളിക്കുമെന്ന് ഉറപ്പായിരുന്നു. പാറ്റ് കമ്മിന്സ് ഇല്ലാതിരുന്ന സമയത്ത് പോലും ഞങ്ങള് മൂന്ന് വിദേശ താരങ്ങളെ മാത്രമാണ് കളിപ്പിച്ചത്. എന്തുകൊണ്ടാണ് മൂന്ന് വിദേശ താരങ്ങളെ മാത്രം കളിപ്പിക്കുന്നതെന്ന് ഞാന് കോച്ച് ഡാന് വെട്ടോറിയോട് ചോദിച്ചു. ടീം ഉടമകള്ക്ക് ഈ കളിക്കാരനെ വളരെ ഇഷ്ടമാണെന്നും, കമ്മിന്സ് തിരിച്ചെത്തിയാലും ഈ തന്ത്രത്തില് മാറ്റമുണ്ടാകില്ലെന്നുമായിരുന്നു ഡാന്റെ മറുപടി. അതോടെ ആര്ക്കെങ്കിലും പരിക്കേറ്റാല് മാത്രമേ അവസരം ലഭിക്കൂ എന്ന് മനസ്സിലായി. കളിക്കാന് കഴിയില്ലെന്ന് ഉറപ്പാകുമ്പോള് നിങ്ങളുടെ ചിന്താഗതി തന്നെ പൂര്ണ്ണമായി മാറും.' ലിവിങ്സ്റ്റണ് പറഞ്ഞു.
ഈ വിഷയത്തോട് പ്രതികരിച്ച ക്രിക്കറ്റ് വിദഗ്ധന് ഡേവിഡ് ലോയ്ഡ്, ഈ ഉടമകള്ക്ക് ക്രിക്കറ്റില് എന്ത് വൈദഗ്ധ്യമാണുള്ളത്? എന്ന് ചോദിച്ചപ്പോള്, പോഡ്കാസ്റ്റിന്റെ ഭാഗമായിരുന്ന മുന് ഇംഗ്ലണ്ട് താരം അലിസ്റ്റര് കുക്ക്, 'ധാരാളം പണം' എന്നാണ് മറുപടി നല്കിയത്. 'അവര് പൂര്ണ്ണമായും തീരുമാനങ്ങള് എടുക്കുന്നുണ്ടോ എന്ന് എനിക്കറിയില്ല, എങ്കിലും അവരുടെ ഭാഗത്തുനിന്ന് ഇടപെടലുകള് ഉണ്ടാകാറുണ്ട്. ഈ വര്ഷം ഡാന് വെട്ടോറി എന്നോട് കാര്യങ്ങള് തുറന്നുപറഞ്ഞു എന്നതാണ് എനിക്ക് ആശ്വാസമായത്. എന്താണ് സംഭവിക്കുന്നതെന്ന് എനിക്ക് കൃത്യമായി അറിയാമായിരുന്നെന്നും ലിവിങ്സ്റ്റണ് കൂട്ടിച്ചേര്ത്തു.
കാവ്യ മാരന്റെ സഹഉടമസ്ഥതയിലുള്ളതാണ് സണ്റൈസേഴ്സ് ഹൈദരാബാദ്. ഐ.പി.എല് 2026-ല് പ്ലേഓഫില് പ്രവേശിച്ചെങ്കിലും എലിമിനേറ്ററില് രാജസ്ഥാന് റോയല്സിനോട് തോറ്റ് ടീം പുറത്തായിരുന്നു.
