ലോകകപ്പിന്റെ ആരവങ്ങള്
അടുത്തുവരുമ്പോള് ലോകം വീണ്ടും
ഒരു പന്തിന്റെ പിന്നാലെ ചേരുന്നു. പ്രകാശപൂരിതമായ സ്റ്റേഡിയങ്ങളില് നിന്ന് ഗ്രാമങ്ങളിലെ പൊടിമൈതാനങ്ങളിലേക്കും കടല്ത്തീരങ്ങളിലെ
സായാഹ്ന കളികളിലേക്കും നീളുന്നു ഫുട്ബോളിന്റെ മായാജാലം.
ഒരു പന്തുണ്ട്.തോലില് തുന്നിച്ചേര്ത്ത കുറച്ച് കഷണങ്ങള്. വായു നിറച്ച ഒരു ഗോളം. ഭൂമിയുടെ ഏത് കോണില് വീണാലും ഉരുണ്ടുപോകാന് മാത്രം കഴിയുന്ന ഒരു സാധാരണ വസ്തു.എന്നാല്, ആ പന്ത് ഒരു കാലിന്റെ സ്പര്ശം ഏറ്റാല്, അത് വെറുമൊരു പന്തല്ലാതാകുന്നു. അത് ഒരു സ്വപ്നമാകുന്നു. ഒരു ഭാഷയാകുന്നു. ഒരു ജനതയുടെ ആത്മാവാകുന്നു. കോടിക്കണക്കിന് മനുഷ്യരുടെ ഹൃദയമിടിപ്പിന്റെ താളമാകുന്നു.
ലോകകപ്പ് ഫുട്ബോള് അടുത്തെത്തുമ്പോള് ലോകം വീണ്ടും ആ അത്ഭുതം ഓര്ക്കുകയാണ്.
ചില കായിക ഇനങ്ങള് രാജ്യങ്ങളെ പ്രതിനിധീകരിക്കുന്നു. ചിലത് സമൂഹങ്ങളെ. എന്നാല്, ഫുട്ബോള് മനുഷ്യരാശിയെ മുഴുവന് പ്രതിനിധീകരിക്കുന്നു. കാരണം ലോകത്ത് മറ്റൊരു കളിക്കും ഇല്ലാത്ത ഒരു ജനാധിപത്യമുണ്ട് ഫുട്ബോളിന്. ഒരു കുട്ടിക്ക് ഫുട്ബോള് കളിക്കാന് വിലകൂടിയ ഉപകരണങ്ങളോ ആഡംബര സൗകര്യങ്ങളോ വേണ്ട. ഒരു പന്ത് മതി. ചിലപ്പോള് അതുപോലും വേണ്ട. പഴയ തുണിക്കഷണങ്ങള് കൂട്ടിക്കെട്ടിയുണ്ടാക്കിയ ഒരു പന്ത് മതിയാകും.
അതുകൊണ്ടാവാം ഫുട്ബോള് മൈതാനങ്ങള് ലോകത്തിലെ ഏറ്റവും വലിയ സമത്വപാഠശാലകളായി മാറിയത്.
ഒരു വശത്ത് ലക്ഷക്കണക്കിന് ഡോളര് വിലവരുന്ന മാന്ഷന്റെ പച്ചപ്പു വിരിച്ച ലോണ്. അവിടെ കളിക്കുന്ന ഒരു സൂപ്പര്താരം. മറുവശത്ത് ഓലമേഞ്ഞ വീടിന്റെ ചെറിയ മുറ്റം. അവിടെ ചെരുപ്പില്ലാതെ ഓടുന്ന ഒരു കുട്ടി. ഇരുവരുടെയും കാലിനു മുന്നില് ഒരേ രൂപത്തിലുള്ള പന്താണ്. ഇരുവരുടെയും കണ്ണുകളില് ഒരേ സ്വപ്നമാണ്.
ഫുട്ബോള് അങ്ങനെ സമ്പത്തിന്റെയും ദാരിദ്ര്യത്തിന്റെയും ഇടയിലുള്ള മതിലുകള് ഒരു നിമിഷത്തേക്കെങ്കിലും അപ്രത്യക്ഷമാക്കുന്നു.
ലോകത്തിലെ ഏറ്റവും വലിയ സ്റ്റേഡിയങ്ങളിലൊന്നില് കളി ആരംഭിക്കുമ്പോള് ഉണ്ടാകുന്ന ആ നിമിഷം ഓര്ക്കുക.
പതിനായിരങ്ങളോ ലക്ഷങ്ങളോ ആളുകള് നിറഞ്ഞ ഗ്യാലറികള്. നിറപ്പകിട്ടാര്ന്ന പതാകകള്. നെഞ്ചിടിപ്പിന്റെ താളംപോലെ ഉയരുന്ന മുദ്രാവാക്യങ്ങള്. ദേശീയഗാനം അവസാനിക്കുന്ന നിമിഷം. റഫറിയുടെ വിസില് മുഴങ്ങുന്നു. പന്ത് ഉരുളുന്നു.
അപ്പോള് സ്റ്റേഡിയം ഒരു ജീവിയായി മാറുന്നു. ഓരോ പാസിലും അത് ശ്വസിക്കുന്നു. ഓരോ മുന്നേറ്റത്തിലും അത് ആവേശത്തോടെ ചാടിയെഴുന്നേല്ക്കുന്നു. ഓരോ നഷ്ടാവസരത്തിലും അത് നിരാശയോടെ നിശബ്ദമാകുന്നു. ഗോള്പോസ്റ്റിലേക്കുള്ള ഓരോ ഷോട്ടും ലക്ഷക്കണക്കിന് ഹൃദയങ്ങളെ ഒരേസമയം നിശ്ചലമാക്കുന്നു.
ഫുട്ബോളിന്റെ മഹത്വം അതിന്റെ നാടകീയതയിലാണ്.
അവസാന മിനിറ്റില് വീഴുന്ന ഒരു ഗോള്. ഇന്ജുറി ടൈമില് ലഭിക്കുന്ന ഒരു പെനാല്റ്റി. തോല്വി ഉറപ്പിച്ച മത്സരത്തെ വിജയമാക്കി മാറ്റുന്ന ഒരു അത്ഭുത മുന്നേറ്റം. ഒരു ഗോള്കീപ്പറുടെ വിരല്ത്തുമ്പില് തട്ടി വഴിമാറുന്ന പന്ത്.
ജീവിതം തന്നെ എഴുതാന് മടിക്കുന്ന കഥകളാണ് പലപ്പോഴും ഫുട്ബോള് എഴുതുന്നത്.
അതിനാലാണ് ഫുട്ബോള് വെറും കളിയെല്ലന്ന് പറയുന്നത്.
അത് മനുഷ്യവികാരങ്ങളുടെ ഏറ്റവും വലിയ നാടകവേദിയാണ്.
ഒരു നിമിഷം മുമ്പ് കരഞ്ഞുകൊണ്ടിരുന്ന ആരാധകന് അടുത്ത നിമിഷം ആനന്ദാശ്രുക്കളോടെ ചാടിമറിയുന്നു. തോല്വിയുടെ വേദനയില് തലകുനിച്ചിരുന്ന രാജ്യം ഒരു ഗോളിന്റെ അകലെ വീണ്ടും പ്രതീക്ഷ കണ്ടെത്തുന്നു. അന്യരായ മനുഷ്യര് പരസ്പരം കെട്ടിപ്പിടിക്കുന്നു. ഒരിക്കലും കണ്ടിട്ടില്ലാത്ത ആളുകള് ഒരേ ടീമിന്റെ പേരില് ഒരേ വികാരം പങ്കിടുന്നു.
ലോകത്ത് മറ്റെന്താണ് ഇങ്ങനെ മനുഷ്യരെ കൂട്ടിയിണക്കുന്നത്?
ഫുട്ബോളിന്റെ യഥാര്ഥ സൗന്ദര്യം ലോകകപ്പ് സ്റ്റേഡിയങ്ങളില് മാത്രമല്ല കാണാന് കഴിയുക.
സൂര്യന് അസ്തമിക്കുന്ന കടല്ത്തീരത്ത് മണല്പ്പരപ്പിലൂടെ ഓടുന്ന കുട്ടികളിലുണ്ട് അത്. മഴനനഞ്ഞ ഗ്രാമവഴികളില് ചെളി തെറിപ്പിച്ച് കളിക്കുന്ന കൗമാരക്കാരിലുണ്ട് അത്. നഗരത്തിലെ ഇടുങ്ങിയ തെരുവില് വാഹനങ്ങള് കടന്നുപോകുമ്പോള് കളി നിര്ത്തി വീണ്ടും തുടങ്ങുന്ന ബാല്യങ്ങളിലുണ്ട് അത്.
ബ്രസീലിലെ ബീച്ചുകളില്നിന്ന് കേരളത്തിലെ കടപ്പുറങ്ങളിലേക്ക്, ആഫ്രിക്കന് ഗ്രാമങ്ങളില്നിന്ന് യൂറോപ്യന് നഗരങ്ങളിലേക്ക്, ഫുട്ബോള് ഒരേ സന്ദേശമാണ് നല്കുന്നത്.
നമ്മള് വ്യത്യസ്തരാകാം. ഭാഷകള് വ്യത്യസ്തമാകാം. രാജ്യങ്ങള് വ്യത്യസ്തമാകാം. എന്നാല് ഒരു പന്തിന് പിന്നാലെ ഓടുമ്പോള് മനുഷ്യന് ഒരാളാണ്.
അതുകൊണ്ടാണ് ഫുട്ബോള് ലോകത്തിലെ ഏറ്റവും ജനപ്രിയ കായികവിനോദമായത്.
അതിന്റെ നിയമങ്ങള് ലളിതമാണ്. അതിന്റെ സൗന്ദര്യം സര്വലൗകികമാണ്. അതിന്റെ വികാരങ്ങള് മനുഷ്യസഹജമാണ്.
ഒരു കുഞ്ഞിന്റെ ആദ്യ സ്വപ്നവും അതാകാം. ഒരു വൃദ്ധന്റെ അവസാന ഓര്മയും അതാകാം.
ഓരോ ലോകകപ്പും നമ്മെ ഇത് വീണ്ടും ഓര്മിപ്പിക്കുന്നു.
ലോകത്തിന്റെ വിവിധ കോണുകളില് ജീവിക്കുന്ന മനുഷ്യര് ചില ആഴ്ചകളെങ്കിലും ഒരേ കഥയുടെ ഭാഗമാകുന്നു. ഒരേ മത്സരത്തെക്കുറിച്ച് സംസാരിക്കുന്നു. ഒരേ ഗോളില് ആവേശം കൊള്ളുന്നു. ഒരേ തോല്വിയില് നിരാശപ്പെടുന്നു.
ഭൂമിയില് മനുഷ്യരെ വേര്തിരിക്കുന്ന കാരണങ്ങള് അനവധിയുണ്ട്. അതിര്ത്തികള് ഉണ്ട്. രാഷ്ട്രീയമുണ്ട്. മതമുണ്ട്. ഭാഷകളുണ്ട്. വര്ഗങ്ങളുണ്ട്. എന്നാല് ഇവയ്ക്കെല്ലാം മുകളിലൂടെ ഉരുണ്ടുപോകുന്ന ഒരു ചെറിയ പന്തുമുണ്ട്. അത് ഉരുളുമ്പോള് ലോകം ഒരുമിച്ച് ചിരിക്കുന്നു. അത് വലയിലേക്ക് കയറുമ്പോള് കോടിക്കണക്കിന് ഹൃദയങ്ങള് ഒരേ താളത്തില് മിടിക്കുന്നു. അത് നഷ്ടമാകുമ്പോള് ലക്ഷങ്ങള് ഒരുമിച്ച് നെടുവീര്പ്പിടുന്നു.
അതാണ് ഫുട്ബോള്.
ഭൂമിയിലെ ഏറ്റവും ലളിതമായ കളി.
അതേസമയം മനുഷ്യരാശി ഇതുവരെ
സൃഷ്ടിച്ച ഏറ്റവും മനോഹരമായ കൂട്ടായ കവിത.
