ഗ്വാഡലഹാര: ലോകകപ്പില് ആദ്യമത്സരത്തിനിറങ്ങിയ ഏഷ്യന്പ്രതിനിധികളായ ദക്ഷിണ കൊറിയയ്ക്ക് ഉദ്ഘാടന പോരാട്ടത്തില് തകര്പ്പന് ജയം. യൂറോപ്യന് കരുത്തരായ ചെക്കിയയെയാണ് ദക്ഷിണകൊറിയ 2-1 ന് തോല്പ്പിച്ചത്. ഗ്വാഡലഹാരയിലെ അക്രോണ് സ്റ്റേഡിയത്തില് നടന്ന മത്സരത്തില് ദക്ഷിണ കൊറിയയ്ക്കായി ഹ്വാങ് ഇന്-ബിയോം, ഹ്വാങ് ഹീ-ചാന് എന്നിവര് സ്കോര് ചെയ്തപ്പോള് ചെക്കിയയുടെ ഗോള് വ്ലാഡിമര് കുഫാല് നേടി. ചെക്കിയ നേടിയ മറ്റൊരു ഗോള് ഓഫ്സൈഡായി വിധിച്ചു.
കളിയുടെ 64 ാം മിനിറ്റില് ചെക്കിയയാണ് ആദ്യംഗോള് നേടിയത്. വ്ലാഡിമിര് കൂഫാല് ബോക്സിലേക്ക് എറിഞ്ഞ ലോങ് ത്രോയില്, ചെക്ക് ക്യാപ്റ്റന് ലാഡിസ്ലാവ് ക്രെയ്സി ഡിഫന്ഡറെ മറികടന്ന് ഓടിയെത്തി പന്ത് തലകൊണ്ട് തട്ടി വലയിലെത്തിച്ചതോടെ ചെക്കിയ മുന്നിലെത്തി. എന്നാല് ഈ ലീഡിന് വെറും മൂന്ന് മിനിറ്റ് ആയുസേ ഉണ്ടായിരുന്നുള്ളു. 67ാം മിനിറ്റില് ഹ്വാങ് ഇന്-ബിയോം മറുപടി നല്കി. ചെക്ക് കീപ്പര് മാറ്റെജ് കോവാര് മുന്നോട്ട് ആഞ്ഞുപാഞ്ഞടുക്കുമ്പോള് ഹ്വാങ് ഇന്-ബിയോമിന് ബോക്സിനുള്ളില് വെച്ച് പന്ത് ലഭിക്കുന്നു. എന്നാല് ഫെയനൂര്ദ് മിഡ്ഫീല്ഡര് ഒരു ഫേക്ക് ഷോട്ടിലൂടെ കീപ്പറെ പൂര്ണ്ണമായും പറ്റിച്ചുകൊണ്ട് പന്ത് ഗോള്കീപ്പര്ക്ക് മുകളിലൂടെ ചിപ്പ് ചെയ്ത് വലയിലാക്കി.
കളി മുമ്പോട്ട് പോകുമ്പോള് അവസാനമിനിറ്റില് ദക്ഷിണ കൊറിയ വീണ്ടും മുന്നിലെത്തി. 80 ാം മിനിറ്റില് ഹ്വാങ് ഇന്-ബിയോം വീണ്ടും തിളങ്ങി. ബോക്സിനുള്ളിലേക്ക് മികച്ചൊരു ക്രോസ് നല്കിക്കൊണ്ട് അദ്ദേഹം പന്ത് ഓ ഹിയോണ്-ഗ്യുവിലേക്ക് എത്തിക്കുന്നു. ഗോള്കീപ്പറെ കാഴ്ചക്കാരനാക്കി ആ പന്ത് ശക്തമായൊരു ഷോട്ടിലൂടെ ഗ്യു വലയിലാക്കിയതോടെ കൊറിയക്കാര് ആവേശത്തിലായി. 77 ാം മിനിറ്റില് ഗോള് നേടിയെങ്കിലും ചെക്കിയയെ സംബന്ധിച്ച് തികച്ചും നിര്ഭാഗ്യകരമായ നിമിഷമായി പോയി അത്. കൊറിയയുടെ ലീ ഹാന്-ബീമിന്റെ കടുത്ത ഫൗളിനെ തുടര്ന്ന് ലഭിച്ച ഫ്രീ കിക്ക്, തോമസ് സൗസെക് മനോഹരമായൊരു ഹെഡറിലൂടെ കൊറിയന് കീപ്പറെ മറികടന്ന് വലയിലെത്തിച്ചിരുന്നു.
ചെക്കിയ മുന്നിലെത്തിയെന്ന് കരുതി കളിക്കാര് ആഘോഷം തുടങ്ങിയെങ്കിലും, റഫറി അമീന് ഒമര് കളി തടസ്സപ്പെടുത്തുകയും ഓഫ്സൈഡ് പരിശോധനയ്ക്കായി 'വാര്' സഹായം തേടുകയും ചെയ്തു. അത് ഓഫ്സൈഡ് ആണെന്ന് സ്ഥിരീകരിച്ചതോടെ ഗോള് നിഷേധിച്ചു. 89' കൊറിയയുടെ ഹ്വാങ് ഹീ-ചാന് മൂന്നാം ഗോള് നേടാനുള്ള മികച്ചൊരു അവസരം ലഭിച്ചെങ്കിലും ആ ശ്രമം പരാജയപ്പെട്ടു. എതിരാളികളുടെ ബോക്സിലേക്ക് അദ്ദേഹം ഒറ്റയ്ക്ക് പന്തുമായി മുന്നേറിയെങ്കിലും, ചെക്കിയന് പ്രതിരോധനിര കൃത്യമായി ഇടപെട്ട് ആ അപകടം ഒഴിവാക്കി. മത്സരത്തില് ഗോളടിച്ചും ഗോളവസരം ഒരുക്കിയും ഹ്വാങ് ഇന്-ബിയോം തിളങ്ങി.
