തനിക്ക് ബ്രെസ്റ്റ് കാന്സറാണെന്നും രോഗം ഇപ്പോള് മൂന്നാം ഘട്ടത്തിലാണെന്നും ഒരു അഭിമുഖത്തില് രേണു സുധി വെളിപ്പെടുത്തിയിരുന്നു. പിന്നാലെ ഇപ്പോള് സമൂഹമാധ്യമങ്ങളില് രേണു പങ്കുവച്ച പോസ്റ്റാണ് ശ്രദ്ധ നേടുന്നത്.
'' ഞാന് ഒരു പോരാളിയാണ്.. ദയവായി എനിക്ക് വേണ്ടി പ്രാര്ത്ഥിക്കണം. എന്റെ റിതപ്പനെ ഓര്ത്തു. എനിക്ക് വേണ്ടി പ്രാര്ത്ഥിക്കണം'' എന്നാണ് രേണു കുറിച്ചത്.
രേണുവിനെ സ്നേഹിക്കുന്ന നിരവധിപ്പേരാണ് പോസ്റ്റിന് താഴെയായി പ്രതികരണം അറിയിച്ച് എത്തുന്നത്. '' അസുഖം ഒകെ മാറി സുഖം ആയി ഇരിക്കട്ടെ'', '' എന്നും പ്രാര്ത്ഥനയില് രേണു ചേച്ചി ഉണ്ാകും'', '' മനസ്സിന് ധൈര്യം കൊടുത്ത് പ്രാര്ത്ഥനയോടെ മുന്പോട്ട് പോകു ചേച്ചി. എല്ലാം മാറി സുഖമായി ജീവിക്കാന് ദൈവം അനുഗ്രഹിക്കട്ടെ'' എന്നാണ് ആരാധകരുടെ കമന്റുകള്.
മെയിന്സ്ട്രീം വണ് എന്ന യുട്യൂബ് ചാനലിന് നല്കിയ അഭിമുഖത്തിലാണ് തനിക്ക് കാന്സറാണെന്ന കാര്യം രേണു സുധി സ്ഥിരീകരിച്ചത്. രോഗം മൂന്നാം ഘട്ടത്തിലാണെന്നും ഉടനെ കീമോതെറാപ്പി തുടങ്ങുമെന്നും രേണു പറഞ്ഞു. 15 വയസ്സ് ഉളളപ്പോഴാണ് ബ്രെസ്റ്റില് ഒരു മുഴ ശ്രദ്ധയില്പെട്ടത്. അന്ന് അത് കാര്യമാക്കിയില്ല. ആ മുഴയാണ് ഇന്ന് കാന്സര് ആയിരിക്കുന്നത് എന്നാണ് രേണു അഭിമുഖത്തില് പറയുന്നത്.
അന്തരിച്ച നടനും മിമിക്രി കലാകാരനുമായ കൊല്ലം സുധിയുടെ ഭാര്യയാണ് രേണു സുധി. സുധിയുടെ മരണശേഷമാണ് രേണു മലയാളികള്ക്ക് കൂടുതല് സുപരിചിതയാകുന്നത്. റീല്സുകളിലും ആല്ബങ്ങളിലുമൊക്കെ സജീവമാണ് രേണു. സമൂഹമാധ്യമങ്ങളില് നിരവധി സൈബര് ആക്രമണങ്ങളും വിമര്ശനങ്ങളും നേരിടേണ്ടി വന്ന താരം കൂടിയാണ് രേണു സുധി. എങ്കിലും സോഷ്യല് മീഡിയയില് നിരവധി ഫോളോവേഴ്സും ആരാധകരും രേണുവിന് ഉണ്ട്.
