അധികാരമേറ്റ് മാസത്തിനുള്ളിൽ ഇന്ദിര ഗ്യാരണ്ടി നടപ്പാക്കി; വാഗ്ദാനങ്ങൾ പാലിക്കുമെന്നത് വീണ്ടും തെളിഞ്ഞെന്ന് കെ സി വേണുഗോപാൽ

അധികാരമേറ്റ് ഒരു മാസത്തിനുള്ളിൽ യുഡിഎഫ് ഇന്ദിര ഗ്യാരണ്ടി നടപ്പിലാക്കിയെന്ന് കെ സി വേണുഗോപാൽ എംപി പറഞ്ഞു. കേരളത്തിലുടനീളമുള്ള സ്ത്രീകൾക്ക് കെഎസ്ആർടിസി ബസുകളിൽ സൗജന്യമായി യാത്ര ചെയ്യാൻ കഴിയുമെന്നും അതിലൂടെ എല്ലാ മാസവും ആയിരക്കണക്കിന് രൂപ ലാഭിക്കാനാകുമെന്നും അദ്ദേഹം വ്യക്തമാക്കി. ജനപക്ഷ ക്ഷേമത്തിലാണ് യുഡിഎഫ് വിശ്വസിക്കുന്നതെന്നും വാഗ്ദാനങ്ങൾ എല്ലായ്പ്പോഴും പാലിക്കുമെന്നും അദ്ദേഹം പറഞ്ഞു. കർണാടകയിലായാലും തെലങ്കാനയിലായാലും ഇപ്പോൾ കേരളത്തിലായാലും അതാണ് യുഡിഎഫിന്റെ നിലപാടെന്നും കെ സി വേണുഗോപാൽ കൂട്ടിച്ചേർത്തു.

തിരുവനന്തപുരം ആർ.എസ്.എസ് ശതാബ്ദി ആഘോഷങ്ങളുടെ ഭാഗമായി സംഘടിപ്പിച്ച പ്രഭാഷണ സഭയിൽ കേരളത്തിലെ മൂന്ന് വൈസ് ചാൻസലർമാർ പങ്കെടുത്തതെയും കെ സി വേണുഗോപാൽ വിമർശിച്ചു. ഇന്ത്യൻ സ്വാതന്ത്ര്യ സമര പോരാട്ടങ്ങളെ ഒറ്റുകൊടുക്കുകയും മതനിരപേക്ഷ ബോധ്യങ്ങളെ ബലി കഴിക്കുകയും ചെയ്ത ആർഎസ്എസ് ചിന്താഗതിയുള്ളവർ മഹത്തായ വിദ്യാഭ്യാസ സ്ഥാപനങ്ങളുടെ തലപ്പത്ത് ഇരിക്കാൻ ഒരു കണിക കൊണ്ടുപോലും യോഗ്യരല്ലെന്ന് അദ്ദേഹം പറഞ്ഞു. സ്വയം രാജിവെച്ച് ഗവർണറുടെ സംരക്ഷണത്തിൽ നിന്ന് ആർഎസ്എസ് മേധാവിയുടെ തണലിലേക്ക് ചേക്കേറുന്നതാണ് മൂവർക്കും നല്ലതെന്നും കെ സി വേണുഗോപാൽ അഭിപ്രായപ്പെട്ടു.