കൂടുതല് നിപ റിപ്പോര്ട്ടു ചെയ്തിട്ടില്ലെന്ന ആശ്വാസത്തിനിടയില് സംസ്ഥാനത്ത് ഷിഗെല്ലയും മലമ്പനിയും ആശങ്ക പടര്ത്തുന്നു. കോഴിക്കോട് ജില്ലയിലെ തിക്കോടിയിലും ഒളവണ്ണയിലും മലമ്പനി(മലേറിയ) സ്ഥിരീകരിച്ചു. തിക്കോടി റെയില്വേ സ്റ്റേഷന് പിന്വശം താമസിക്കുന്ന ഇതര സംസ്ഥാന തൊഴിലാളിക്കും ഒളവണ്ണ ഇരിങ്ങല്ലൂരിലെ അറുപതു വയസുകാരനുമാണ് മലമ്പനി സ്ഥിരീകരിച്ചത്. ഒളവണ്ണയില് മഞ്ഞപ്പിത്തവും ഡെങ്കിപ്പനിയും വ്യാപകമാണ്. ആരോഗ്യവകുപ്പ് പ്രതിരോധ പ്രവര്ത്തനങ്ങള് ശക്തമാക്കിയിട്ടുണ്ട്.
സംസ്ഥാനത്തിന്റെ വിവിധ ഭാഗങ്ങളിലായി ഇന്നലെ എട്ടുപേര്ക്കു കൂടി ഷിഗെല്ല സ്ഥിരീകരിച്ചു. ഇതോടെ ഈ വര്ഷം ഷിഗെല്ല ബാധിച്ചവരുടെ എണ്ണം 135 ആയി. ഇടുക്കി ജില്ലയില് കഞ്ഞിക്കുഴി പഞ്ചായത്ത് പഴയരിക്കണ്ടം സ്വദേശികളായ ഒമ്പത് വയസുകാരനും നാലര വയസുകാരിക്കും രോഗം സ്ഥിരീകരിച്ചു. ഒന്പതു വയസുകാരനെ 13ന് തൊടുപുഴയിലെ സ്വകാര്യ ആശുപത്രിയിലും നാലര വയസുകാരിയെ 14 ന് ഇടുക്കി മെഡിക്കല് കോളജ് ആശുപത്രിയിലും പ്രവേശിപ്പിച്ചു.
രണ്ടുപേരുടെയും ആരോഗ്യനില മെച്ചപ്പെട്ടുവരികയാണെന്ന് ജില്ലാ ആരോഗ്യ വിഭാഗം അധികൃതര് പറഞ്ഞു. ഇരുവരും പഴയരിക്കണ്ടം ഗവ. എച്ച്.എസ്.എസ്. വിദ്യാര്ഥികളാണ്. സ്കൂളിലെ വെള്ളം സാമ്പിള് പരിശോധനയ്ക്കെടുത്തതായും വെള്ളം കേ്ലാറിനേറ്റ് ചെയ്തിട്ടുണ്ടെന്നും അധികൃതര് പറഞ്ഞു.
കോഴിക്കോട് വടകരയില് 17-ാം വാര്ഡായ കുറുമ്പയില് നാലു വയസുകാരിക്ക് ഷിഗെല്ല സ്ഥിരീകരിച്ചു. ആശുപത്രിയിലായിരുന്ന കുട്ടി വീട്ടില് തിരിച്ചെത്തിയെന്നും ഇപ്പോള് പ്രശ്നങ്ങളില്ലെന്നും അധികൃതര് അറിയിച്ചു. ഷിഗെല്ലെ ബാധിച്ച് കഴിഞ്ഞ ദിവസം ഒരാള് മരിച്ച തൃശൂര് ജില്ലയില് ഇന്നലെ രോഗബാധ റിപ്പോര്ട്ട് ചെയ്തിട്ടില്ല.
സംസ്ഥാനത്ത് ഒരാഴ്ചയ്ക്കിടെ പതിനയ്യായിരത്തിലേറെപ്പേര്ക്കാണ് വയറിളക്കരോഗങ്ങള് ബാധിച്ചത്. എലിപ്പനി പിടിപെട്ട് നൂറിലേറെപ്പേര് ചികിത്സയിലാണ്. ഈ മാസം രണ്ടുമരണവും സ്ഥിരീകരിച്ചു. ഡെങ്കിബാധിതര് 3,366 പേര്. മൂന്നു മരണവുമുണ്ടായി. കഴിഞ്ഞദിവസംമാത്രം 85 പേര്ക്ക് ഡെങ്കിപ്പനി ബാധിച്ചു. ഈ മാസം 1,111 ചിക്കന്പോക്സ് കേസുകളും റിപ്പോര്ട്ട് ചെയ്തു.
ഏറ്റവും കൂടുതല് പനിബാധിതര് മലപ്പുറംജില്ലയിലാണ്- 2470 പേര്. രണ്ടാമത് കോഴിക്കോട്- 1142 പേര്. ഏറ്റവും കുറവ് ഇടുക്കിയില്- 298 പേര്. പനിബാധിച്ച് കഴിഞ്ഞദിവസം വയനാട്ടില് 10 വയസുള്ള കുട്ടി മരിച്ചിരുന്നു.
നിപ: രണ്ട് പേര് കൂടി
ആശുപത്രി വിട്ടു
കോഴിക്കോട് നിപ സംശയത്തെത്തുടര്ന്ന് നിരീക്ഷണത്തിലായിരുന്നവരില് രണ്ട് പേര് കുടി ആശുപത്രി വിട്ടു. ഇവരുടെ പരിശോധനാഫലം നേരത്തെ നെഗറ്റീവ് ആയിരുന്നു. എന്നാല് രോഗലക്ഷണങ്ങള് കണ്ടതിനെത്തുടര്ന്ന് ഒരാളെ കൂടി നിരീക്ഷണത്തിനായി ഇന്നലെ ആശുപത്രിയില് പ്രവേശിപ്പിച്ചു. ഇതോടെ സമ്പര്ക്കപ്പട്ടികയില് നിന്നു ആശുപത്രിയില് പ്രവേശിപ്പിക്കപ്പെട്ട ആകെ ഒമ്പത് പേരില് നാല് പേര് ആശുപത്രി വിട്ടു. അഞ്ച് പേര് നിരീക്ഷണത്തില് തുടരുന്നു.
നിപ രോഗബാധയെത്തുടര്ന്ന് സമ്പര്ക്കപട്ടികയിലുള്ള 13 പേരുടേയും സമാന രോഗലക്ഷണങ്ങളുള്ള 24 പേരുടെയും ഉള്പ്പെടെ 37 പേരുടെ സ്രവങ്ങള് പരിശോധിച്ചതില് എല്ലാം നെഗറ്റീവ് ആണ്.
കോഴിക്കോട് ജില്ലയില് ഇന്നലെയും പുതിയ നിപ കേസുകള് ഒന്നും റിപ്പോര്ട്ട് ചെയ്തിട്ടില്ല. കോഴിക്കോട് സര്ക്കാര് മെഡിക്കല് കോളജ് ആശുപത്രിയില് ചികിത്സയിലുള്ള നിപ രോഗി വെന്റിലേറ്ററില് തുടരുകയാണ്.
നിലവില് സമ്പര്ക്ക പട്ടികയില് 104 പേരാണുള്ളത്. ഇതില് നാല് പേര് വളരെ ഉയര്ന്ന റിസ്ക് വിഭാഗത്തില്പെട്ടവരും 14 പേര് ഉയര്ന്ന റിസ്ക് അതില് പെട്ടവരും 86 പേര് കുറഞ്ഞ ഭാഗത്തില്പെട്ടവരുമാണ്. സമ്പര്ക്ക പട്ടികയില് 45 പേര് ആരോഗ്യ പ്രവര്ത്തകരാണ്.
