അപ്പോഴപ്പോള് നിറംമാറുന്ന ഓന്ത് നേതാക്കള് ഇന്ത്യന് രാഷ്ട്രീയത്തില് സുപരിചിതരാണ്. അധികാരക്കസേരയുടെ ദിശ നോക്കി പാര്ട്ടികള് മാറുന്ന ഇത്തരം നേതാക്കളെ നാം പലപ്പോഴും കണ്ടിട്ടുണ്ട്. പ്രത്യേകിച്ച് ഉത്തരേന്ത്യന് രാഷ്ട്രീയത്തിലാണ് ഈ പ്രവണത കൂടുതല് പ്രകടമാകുന്നത്. ബി.ജെ.പിക്കെതിരായ ഇന്ത്യാ മുന്നണിയുടെ പ്രധാന നേതാക്കളില് ഒരാളായിരുന്ന നിതീഷ് കുമാര് വളരെ വേഗത്തിലാണ് നിലപാട് മാറ്റി ബി.ജെ.പിയുടെ പിന്തുണയോടെ ബിഹാര് മുഖ്യമന്ത്രിയായത്. പിന്നീട് അദ്ദേഹം കേന്ദ്ര മന്ത്രിസഭയിലും ഇടംപിടിച്ചു. രാഷ്ട്രീയത്തിലെ ആശയപരമായ പ്രതിബദ്ധതയെക്കാള് അധികാരരാഷ്ട്രീയത്തിനാണ് പല നേതാക്കളും മുന്ഗണന നല്കുന്നതെന്ന വിമര്ശനത്തിന് ഇത്തരം സംഭവങ്ങള് ശക്തിപകരുന്നു.
തമിഴ്നാട്ടിലെ രാഷ്ട്രീയത്തിലും സമീപകാലത്ത് ശ്രദ്ധേയമായ മാറ്റങ്ങളാണ് ഉണ്ടായിരിക്കുന്നത്. അഞ്ച് പതിറ്റാണ്ടിലേറെ കൈകോര്ത്ത് സഞ്ചരിച്ച കോണ്ഗ്രസും ഡി.എം.കെയും ഇന്ന് വ്യത്യസ്ത വഴികളിലാണ്. ബി.ജെ.പി. അധികാരത്തിലെത്താതിരിക്കാനുള്ള രാഷ്ട്രീയ കണക്കുകൂട്ടലുകളുടെ ഭാഗമായാണ് കോണ്ഗ്രസ്, ഡി.എം.കെയെ മുന്കൂട്ടി അറിയിക്കാതെ ടി.വി.കെയുമായി അടുത്തത് എന്നാണ് വിലയിരുത്തലുകള്. മറുവശത്ത് സി.പി.ഐ., സി.പി.എം., മുസ്ലിം ലീഗ് തുടങ്ങിയ സഖ്യകക്ഷികള് ഡി.എം.കെയെ നേരിട്ട് കണ്ട് രാഷ്ട്രീയ സാഹചര്യങ്ങളിലെ മാറ്റങ്ങളുടെ അനിവാര്യത ബോധ്യപ്പെടുത്താന് ശ്രമിക്കുകയും ചെയ്തു.
ഇത്തരം 'ഓന്ത്' രാഷ്ട്രീയത്തെ വെല്ലുവിളിച്ചുകൊണ്ടാണ് മറ്റൊരു 'കോക്രോച്ച്' പാര്ട്ടി കടന്നു വന്നിരിക്കുന്നത്. ഓന്തിനെ ഓടിക്കാന് ശബ്ദമുണ്ടാക്കിയാല് മതിയാകും. എന്നാല്, രാഷ്ട്രീയ കോക്രോച്ചുകളെ എങ്ങനെ നേരിടണം എന്നതിന് ഇതുവരെ വ്യക്തമായ ഒരു സൂത്രവാക്യം കണ്ടെത്തിയിട്ടില്ല.
ജൂണ് ആറിന് വലിയ ആവേശത്തോടെയാണ് കോക്രോച്ച് പാര്ട്ടിയുടെ നേതാവ് അഭിജിത് ദീപ്കെ ന്യൂഡല്ഹിയില് എത്തിയത്. 40 ഡിഗ്രി സെല്ഷ്യസ് ചൂടിനെ പോലും അവഗണിച്ച് ആയിരക്കണക്കിന് യുവാക്കളാണ് ജന്തര് മന്തിറില് അണിനിരന്നത്. കേന്ദ്ര വിദ്യാഭ്യാസ മന്ത്രി ധര്മേന്ദ്ര പ്രധാന് രാജിവയ്ക്കണമെന്ന ആവശ്യമാണ് അവരുടെ പ്രധാന മുദ്രാവാക്യം. എന്നാല്, സാധാരണയായി ജന്തര് മന്തിറില് കാണപ്പെടുന്ന പ്രതിഷേധരീതികളില് നിന്ന് വ്യത്യസ്തമായി, പോലീസുമായുള്ള ഏറ്റുമുട്ടലുകളോ സംഘര്ഷങ്ങളോ ഇല്ലാതെയായിരുന്നു ഈ സമരം. പ്രതിഷേധം പൂര്ണമായും സമാധാനപരമായിരുന്നു.
മാധ്യമങ്ങളോട് സംസാരിക്കവെ അഭിജിത് ദീപ്കെ പറഞ്ഞ വാക്കുകള് ശ്രദ്ധേയമായിരുന്നു. ''സര്ക്കാരിനെ എതിര്ക്കുന്ന എന്നെ ജയിലിലടയ്ക്കുമോ എന്ന ഭയമാണ് അമ്മയ്ക്കുള്ളത്. അത്തരമൊരു ഭയം ഇന്ന് പല അമ്മമാരുടെയും മനസ്സിലുണ്ട്. എത്രനാള് നാം ഭയന്ന് ജീവിക്കും? ഞങ്ങള്ക്ക് പേടിയില്ല.'' അദ്ദേഹത്തിന്റെ വാക്കുകള് അവിടെ കൂടിയ യുവാക്കള്ക്കിടയില് വലിയ ആവേശം സൃഷ്ടിച്ചു.
ജന്തര് മന്തിറിലെ പല പ്രതിഷേധങ്ങള്ക്കും മാധ്യമശ്രദ്ധ ലഭിക്കുന്നത് പലപ്പോഴും പോലീസുമായുള്ള ഏറ്റുമുട്ടലുകളിലൂടെയാണ്. എന്നാല്, സംഘര്ഷമല്ല, ആശയമാണ് പ്രതിഷേധത്തിന്റെ ശക്തിയെന്ന് ഈ സമരം ഓര്മിപ്പിച്ചു. ജനാധിപത്യത്തിന്റെ യഥാര്ത്ഥ കരുത്ത് വൈരുധ്യങ്ങളിലാണ്. ഭരണകൂടത്തോട് ചോദ്യങ്ങള് ചോദിക്കാനും ജനങ്ങളുടെ പ്രശ്നങ്ങള് ഉയര്ത്തിക്കാട്ടാനും കഴിയുന്ന ശബ്ദങ്ങളാണ് ജനാധിപത്യത്തെ ജീവസുറ്റതാക്കുന്നത്.
അതുകൊണ്ടുതന്നെ കോക്രോച്ച് പാര്ട്ടി പോലുള്ള പുതിയ സാമൂഹിക പ്രസ്ഥാനങ്ങള് ദേശീയതലത്തില് കരുത്താര്ജിക്കേണ്ടതുണ്ട്. ജനജീവിതത്തില് ഗുണകരമായ മാറ്റങ്ങള് സൃഷ്ടിക്കാന് കഴിയുന്ന രാഷ്ട്രീയ ചാലകങ്ങളായി അവ വളരേണ്ടതുണ്ട്. എന്നാല്, മഴക്കാലത്ത് മുളച്ചുവരുന്ന തകരച്ചെടികളെപ്പോലെ പെട്ടെന്ന് ഉയര്ന്നുവന്ന് അതേ വേഗത്തില് അപ്രത്യക്ഷമാകുന്ന പ്രസ്ഥാനങ്ങളായി മാറാതിരിക്കുകയും വേണം. ആവേശത്തിനപ്പുറം സംഘടനാശേഷിയും ആശയദാര്ഢ്യവും ജനവിശ്വാസവും നേടിയെടുക്കാന് കഴിഞ്ഞാല് മാത്രമേ ഇത്തരം പുതിയ രാഷ്ട്രീയ പരീക്ഷണങ്ങള്ക്ക് ഇന്ത്യന് ജനാധിപത്യത്തില് ദീര്ഘകാല സ്വാധീനം ചെലുത്താന് കഴിയൂ.
