ലോകമെമ്പാടുമുള്ള സിനിമാപ്രേമികളുടെ പ്രിയപ്പെട്ട ആക്ഷൻ താരം ജാക്കി ചാൻ സമൂഹമാധ്യമങ്ങളിൽ പങ്കുവെച്ച ഏറ്റവും പുതിയ പോസ്റ്റാണ് ഇപ്പോൾ ശ്രദ്ധനേടുന്നത്. തന്റെ കരിയറിലെ ആദ്യനാളുകളിലെ ഓർമ്മകളും അക്കാലത്ത് മനസ്സിൽ സൂക്ഷിച്ചിരുന്ന മൂന്ന് വലിയ ആഗ്രഹങ്ങളെക്കുറിച്ചുമാണ് താരം ആരാധകരുമായി പങ്കുവെക്കുന്നത്.
ചൈനീസ് സിനിമയുടെ വളർച്ച, ചൈനീസ് ചലച്ചിത്ര പ്രവർത്തകരുടെ പുരോഗതി, ചലച്ചിത്ര മേഖലയിലെ അടുത്ത തലമുറയുടെ ഭാവി എന്നിവയായിരുന്നു തന്റെ തുടക്കകാലത്തെ ആ മൂന്ന് ആഗ്രഹങ്ങളെന്ന് താരം വെളിപ്പെടുത്തി. ബീജിംഗിലെ ചൈനയിലെ മഹാനേതിൽ, ഷാങ്ഹായ് വേൾഡ് എക്സ്പോ, ഷാൻഷിയിലെ ദെഷെങ്ബാവോ തുടങ്ങി ചൈനയിലെ ചരിത്രപ്രസിദ്ധമായ സ്ഥലങ്ങളിൽ നിന്നുള്ള തന്റെ പഴയകാല ചിത്രങ്ങൾ പങ്കുവെച്ചുകൊണ്ടാണ് താരം മനസ്സ് തുറന്നത്.
"ഈ പഴയ ചിത്രങ്ങളിലേക്ക് നോക്കുമ്പോൾ, എനിക്ക് ഇപ്പോഴും അത് അനുഭവിക്കാൻ കഴിയുന്നുണ്ട് - ചൈനയിലെ ഏതോ ഷൂട്ടിംഗ് സെറ്റുകളിൽ ഞാൻ ഉപേക്ഷിച്ചുപോന്ന ആ ക്ഷീണവും, ആവേശവും, എന്റെ യൗവനവും. വർഷങ്ങൾ എത്ര കഴിഞ്ഞിട്ടും, ഞാൻ എവിടെ പോയാലും, ലോകമെമ്പാടുമുള്ള എന്റെ സുഹൃത്തുക്കൾ എന്നെ സ്നേഹത്തോടെ 'ജാക്കി' എന്ന് വിളിക്കുന്നു. സിനിമകളാണ് എനിക്ക് ആ പേര് നൽകിയത് - അതിരുകൾക്കപ്പുറം കഥകൾ പങ്കുവെക്കാനും ലോകത്തിലേക്ക് ഇറങ്ങിത്തിരിക്കാനുമുള്ള അവസരം എനിക്ക് തന്നതും ആ സിനിമകളാണ്. എന്നാൽ ഞാൻ എത്ര ദൂരേക്ക് പോയോ, അത്രത്തോളം എന്റെ ചിന്തകൾ ഇത് എവിടെ നിന്നാണ് തുടങ്ങിയത് എന്നതിലേക്ക് തിരികെ എത്തിക്കൊണ്ടിരുന്നു.
ചൈനയാണ് എന്നെ രൂപപ്പെടുത്തിയത്. 'ജാക്കി ചാൻ' എന്നൊരാൾ ഉണ്ടാകുന്നതിന് എത്രയോ മുമ്പ് തന്നെ, ഞാൻ ആരായിത്തീരണമെന്ന് ഈ മണ്ണ് നിശ്ചയിച്ചിരുന്നു. കാരുണ്യം, പതറാത്ത മനസ്സ്, ആത്മാർത്ഥത. ഓരോ തവണ ഞാൻ ഇവിടേക്ക് തിരികെ വരുമ്പോഴും അതേ അനുഭൂതി തന്നെയാണ് എന്നെ കാത്തിരിക്കാറുള്ളത്. ഈ നാട് മാറുന്നതും വളരുന്നതും ഞാൻ കണ്ടിട്ടുണ്ട്, എങ്കിലും ചില കാര്യങ്ങൾ ഇവിടെ ഒരിക്കലും മാറില്ല - മനുഷ്യർ തമ്മിലുള്ള ആ ഊഷ്മളത, ഒട്ടും മങ്ങാത്ത സംസ്കാരം, ഇവിടുത്തെ മലനിരകളിലും നദികളിലും ഒളിഞ്ഞിരിക്കുന്ന കഥകൾ." ജാക്കി ചാൻ കുറിച്ചു.
എന്റെ സിനിമകളാണ് ചൈനയെ ലോകത്തിന് മുന്നിൽ എത്തിച്ചതെന്ന് ആളുകൾ പറയാറുണ്ടെന്നും എന്നാൽ യഥാർത്ഥ സത്യം ചൈനയാണ് എനിക്ക് ആദ്യം ആ കഥകൾ സമ്മാനിച്ചത് എന്നതാണെന്നും താരം പറയുന്നു.
"ഞാൻ കരിയർ തുടങ്ങിയപ്പോൾ, എനിക്ക് മൂന്ന് ആഗ്രഹങ്ങളുണ്ടായിരുന്നു: ചൈനീസ് സിനിമയ്ക്ക് വേണ്ടി, ചൈനീസ് ചലച്ചിത്ര പ്രവർത്തകർക്ക് വേണ്ടി, പിന്നെ അടുത്ത തലമുറയ്ക്ക് വേണ്ടി. ഇന്ന്, ഞാൻ നാലാമതൊരു ആഗ്രഹം കൂടി നെഞ്ചിലേറ്റുന്നു - ഞാൻ ഏറെ സ്നേഹിക്കുന്ന ഈ മണ്ണ് വന്ന് കാണാൻ ലോകമെമ്പാടുമുള്ള ആളുകൾ വരണമെന്ന് ഞാൻ ആഗ്രഹിക്കുന്നു." എന്നു പറഞ്ഞാണ് താരം തന്റെ കുറിപ്പ് അവസാനിപ്പിക്കുന്നത്.
