ബജാജ് പള്സര് 220F (Bajaj Pulsar 220F) മോട്ടോര്സൈക്കിളിന്റെ പുതിയ 2026 പതിപ്പ് പുറത്തിറക്കിയിരിക്കുകയാണ് ബജാജ് ഓട്ടോ. കൂടുതല് ജനപ്രിയമാക്കാന് തക്കവണ്ണമുള്ള മാറ്റങ്ങളോടെയാണ് ബജാജ് ഓട്ടോ വിപണിയില് എത്തിച്ചിരിക്കുന്നത്. 1.36 ലക്ഷം രൂപ മുതലാണ് രാജ്യത്തെ പള്സര് പ്രേമികളെ ആവേശത്തിലാഴ്ത്തുന്ന 2026 മോഡലിന്റെ എക്സ്-ഷോറൂം വില തുടങ്ങുന്നത്. സുരക്ഷയ്ക്കും റൈഡിംഗ് കംഫര്ട്ടിനും മുന്ഗണന നല്കുന്ന അപ്ഡേറ്റുകളാണ് കമ്പനി ബൈക്കില് നടപ്പാക്കിയിരിക്കുന്നത്.
കൂടുതല് വെളിച്ചം നല്കുന്ന അത്യാധുനിക എല്ഇഡി പ്രൊജക്ടര് ഹെഡ്ലൈറ്റും ആകര്ഷകമായ എല്ഇഡി പൊസിഷന് ലൈറ്റുകളുമാണ് 2026 പള്സര് 220F മോഡലിലെ സുപ്രധാന കൂട്ടിച്ചേര്ക്കല്. രാത്രികാലങ്ങളിലെ ദീര്ഘദൂര ഹൈവേ യാത്രകള് കൂടുതല് സുരക്ഷിതമാക്കാന് ഈ പുതിയ ലൈറ്റിംഗ് സജ്ജീകരണം റൈഡര്മാരെ സഹായിക്കും. മുമ്പ് വിപണിയിലുണ്ടായിരുന്ന മോഡലുകളില് ലോ ബീമിനായി പ്രൊജക്ടറും ഹൈ ബീമിനായി മള്ട്ടി-റിഫ്ലക്ടര് യൂണിറ്റുമായിരുന്നു നല്കിയിരുന്നത്. എന്നാല് പുതിയ 2026 മോഡലില് ലോ, ഹൈ ബീമുകള് ഒന്നിച്ച് ക്രമീകരിച്ചിരിക്കുന്ന സിംഗിള് എല്ഇഡി പ്രൊജക്ടര് യൂണിറ്റാണ് ബജാജ് പുതുതായി ഉള്പ്പെടുത്തിയിട്ടുള്ളത്. ലൈറ്റിംഗ് സംവിധാനത്തിലെ ഈ സുപ്രധാനം മാറ്റങ്ങള് വരുത്തിയതൊഴിച്ചാല്, മോട്ടോര്സൈക്കിളിന്റെ ഡിസൈനിലോ മെക്കാനിക്കല് ഘടനയിലോ ബജാജ് യാതൊരു മാറ്റവും വരുത്തിയിട്ടില്ല.
220 സിസി, എയര്/ഓയില്-കൂള്ഡ്, സിംഗിള്-സിലിണ്ടര് DTS-i എഞ്ചിനാണ് ഈ ബൈക്കിന്റെ ഹൃദയം. ഈ എഞ്ചിന് 8,500 ആര്പിഎമ്മില് 20.1 bhp പവറും 7,000 ആര്പിഎമ്മില് 18.55 Nm പീക്ക് ടോര്ക്കും പുറത്തെടുക്കാന് ശേഷിയുള്ളതാണ്. ഈ കരുത്തുറ്റ എഞ്ചിന് 5-സ്പീഡ് മാനുവല് ഗിയര്ബോക്സുമായി ബന്ധിപ്പിച്ചിരിക്കുന്നു. സിറ്റി, ഹൈവേ റൈഡുകളില് സുഗമമായ ഗിയര് ഷിഫ്റ്റിംഗും മികച്ച ഡ്രൈവിംഗ് കണ്ട്രോളും നല്കാന് ഇത് റൈഡര്മാരെ സഹായിക്കും.
അത്യാധുനിക ഓള്-എല്ഇഡി ലൈറ്റിംഗ് സജ്ജീകരണത്തിന് പുറമെ പുത്തന് ടെക് ഫീച്ചറുകളാല് സമ്പന്നമാണ് പുത്തന് പള്സര് 220F. സ്മാര്ട്ട്ഫോണ് ചാര്ജ് ചെയ്യുന്നതിനായി ഒരു മൊബൈല് ചാര്ജിംഗ് പോര്ട്ടും ബ്ലൂടൂത്ത് കണക്റ്റിവിറ്റിയുള്ള പുതിയ എല്സിഡി (LCD) ഡിസ്പ്ലേയും ഈ പതിപ്പില് ബജാജ് പുതുതായി ഉള്പ്പെടുത്തിയിട്ടുണ്ട്. യാത്രകള് കൂടുതല് എളുപ്പമാക്കാന് സഹായിക്കുന്ന ടേണ്-ബൈ-ടേണ് നാവിഗേഷന് (Turn-by-turn navigation) സംവിധാനവും കോള്/എസ്എംഎസ് അലേര്ട്ടുകളും ഈ ആധുനിക ഡിസ്പ്ലേയിലൂടെ റൈഡര്മാര്ക്ക് ലഭ്യമാകും.
