പി.എം ശ്രീ പദ്ധതിയെച്ചൊല്ലി നിയമസഭയിൽ ഭരണപക്ഷവും പ്രതിപക്ഷവും തമ്മിൽ കടുത്ത വാക്കേറ്റം. പദ്ധതി നടപ്പിലാക്കില്ലെന്ന് വ്യക്തമാക്കാൻ സർക്കാർ തയ്യാറാകാതിരുന്ന സാഹചര്യത്തിൽ, ധാരണപത്ര പ്രകാരം പദ്ധതിയിൽ നിന്ന് പിന്മാറാൻ കഴിയില്ലെന്ന നിലപാടാണ് പൊതു വിദ്യാഭ്യാസ മന്ത്രി എൻ. ഷംസുദ്ദീൻ സഭയിൽ ആവർത്തിച്ചത്.
പിഎം ശ്രീ പദ്ധതി നടപ്പിലാക്കുന്നതിൽ ഒത്തുകളി നടക്കുന്നതായി പ്രതിപക്ഷം ആരോപിച്ചു. എന്നാൽ ഭരണത്തിൽ ഇരിക്കെ എന്തിനാണ് കരാറിൽ ഒപ്പുവച്ചതെന്ന് വിശദീകരിക്കാൻ പ്രതിപക്ഷവും തയ്യാറായില്ലെന്ന് ഭരണപക്ഷം തിരിച്ചടിച്ചു.
ധാരണപത്രത്തിൽ ഒപ്പുവച്ച എൽഡിഎഫ് നടപടിയാണ് സംസ്ഥാനത്തെ നിലവിലെ പ്രതിസന്ധിക്ക് കാരണമെന്നതാണ് സർക്കാരിന്റെ നിലപാട്. അതേസമയം, ധാരണപത്രത്തിന് നിയമസാധുതയില്ലെന്ന വാദമാണ് അടിയന്തര പ്രമേയ ചർച്ചയ്ക്ക് അനുമതി തേടിക്കൊണ്ട് പ്രതിപക്ഷം ഉയർത്തിയത്.
യുഡിഎഫ് സർക്കാർ പിഎം ശ്രീ പദ്ധതിയുടെ “അംബാസിഡർ” ആയി മാറിയെന്നും പ്രതിപക്ഷം ആരോപിച്ചു. പദ്ധതി നടപ്പാക്കുന്നതുമായി ബന്ധപ്പെട്ട കാര്യങ്ങൾ മന്ത്രിസഭാ ഉപസമിതി പരിശോധിക്കുകയാണെന്നും സംസ്ഥാന താൽപര്യത്തിന് വിരുദ്ധമായ ഒന്നും ഉണ്ടാകില്ലെന്നും സർക്കാർ ഉറപ്പ് നൽകി.
പിഎം ശ്രീ പദ്ധതി ബിജെപി അജണ്ടയാണെന്നും സർക്കാർ അതിന് കീഴടങ്ങുകയാണെന്നും ആരോപിച്ച് പ്രതിപക്ഷം സഭയിൽ നിന്ന് ഇറങ്ങിപ്പോയി. നിയമസഭാ ചർച്ച അവസാനിച്ചിട്ടും കരാർ ഒപ്പുവച്ചതിനെക്കുറിച്ചുള്ള വ്യക്തമായ വിശദീകരണം ഇരുപക്ഷത്തും നിന്ന് ലഭിക്കാത്തതാണ് ശ്രദ്ധേയമായത്. പദ്ധതിയെക്കുറിച്ച് മന്ത്രിസഭാ ഉപസമിതി ഇന്ന് ചേരും.
