കാക്കനാട്: മയക്കു മരുന്നിന് അടിമപ്പെടുന്ന കുട്ടികളെ അതില് നിന്ന് മോചിപ്പിക്കാനും അവരെ പുനരധിവസിപ്പിക്കാനും ചൈല്ഡ് റിഹാബിലിറ്റേഷന് സെന്ററുകള് ആരംഭിക്കുമെന്ന് സാമൂഹ്യ നീതി വകുപ്പ് മന്ത്രി വി.ഇ അബ്ദുള് ഗഫൂര് അറിയിച്ചു. തൃക്കാക്കര ഭാരത മാത കോളേജില് നടന്ന അന്താരാഷ്്രട ലഹരി വിരുദ്ധ ദിനാചരണം ഉദ്ഘാടനം ചെയ്യുകയായിരുന്നു മന്ത്രി.
ഇന്ത്യയിലാദ്യമായി ചൈല്ഡ് റിഹാബിലിറ്റേഷന് സെന്റര് തുടങ്ങുന്നതിനു വേണ്ടി രണ്ട് കോടി രൂപ സര്ക്കാര് ബജറ്റില് അനുവദിച്ച് തന്നിട്ടുണ്ട്. എത്രയും വേഗം അത് പ്രാവര്ത്തികമാക്കാന് ശ്രമിക്കുമെന്നും മന്ത്രി കൂട്ടിച്ചേര്ത്തു.
പുതിയ സര്ക്കാര് അധികാരത്തില് വന്നതിനുശേഷം കഴിഞ്ഞ കുറേ ദിവസങ്ങളായി ലഹരിക്കെതിരെയുള്ള വലിയൊരു പോരാട്ടം തുടങ്ങിവച്ചിരിക്കുകയാണ്. സര്ക്കാര് ഏതെങ്കിലും ഒരു വകുപ്പിനെയല്ല ഇതിനായി ചുമതലപ്പെടുത്തിയിട്ടുള്ളത്. ആഭ്യന്തര വകുപ്പ്, എക്സൈസ് വകുപ്പ്, വിദ്യാഭ്യാസ വകുപ്പ്, സാംസ്കാരി വകുപ്പ്, സാമൂഹ്യ നീതി വകുപ്പ് ഉള്പ്പെടെ വിവിധ വകുപ്പുകളാണ് ഇതൊരു ഉത്തരവാദിത്തമായി ഏറ്റെടുത്തിട്ടുള്ളതെന്നും അദ്ദേഹം പറഞ്ഞു. ഒരുപാട് പേര് അറിഞ്ഞും അറിയാതെയും മയക്കുമരുന്നിന് അടിമപ്പെട്ടു പോകുന്നവരുണ്ട്.
അവരെ നമുക്ക് സാധാരണ ജീവിതത്തിലേക്ക് തിരികെ കൊണ്ടുവരേണ്ടതുണ്ട്. അവര്ക്ക് കൃത്യമായ പുനരധിവാസം ഉറപ്പാക്കേണ്ടത് സമൂഹത്തിന്റെ ഉത്തരവാദിത്തം കൂടിയാണ്. ആ ഉത്തരവാദിത്തം ഭംഗിയായി നിര്വഹിക്കാന് ശ്രമിക്കുന്ന ഒരു വകുപ്പാണ് സാമൂഹ്യ നീതി വകുപ്പ്. മയക്കുമരുന്നിന് ഏറ്റവും കൂടുതല് അടിമപ്പെടുത്തുന്നത് വിദ്യാര്ത്ഥികളെയാണ് കുട്ടികളെ ഇതിന്റെ ഒരു കണ്ണിയായി മാറ്റുവാന് ശ്രമിക്കുകയാണെന്നും ഇതിനെ ഏതുവിധേനയും ചെറുക്കണമെന്നും മന്ത്രി കൂട്ടിച്ചേര്ത്തു.
ഉമ തോമസ് എം എല് എ അധ്യക്ഷത വഹിച്ച പരിപാടിയില് സാമൂഹ്യനീതി വകുപ്പ് ഡയറക്ടര് അരുണ് എസ്. നായര് സ്വാഗതം പറഞ്ഞു. ജില്ലാ കളക്ടര് ജി. പ്രിയങ്ക, തൃക്കാക്കര മുനിസിപ്പല് ചെയര് പേഴ്സണ് റാഷിദ് ഉള്ളംപിള്ളി, ഡെപ്യുട്ടി ചെയര്പേഴ്സണ് അഡ്വ. ഷെറീന ഷുക്കൂര്, തൃക്കാക്കര അസി. പോലീസ് കമ്മീഷണര് മനോജ് കുമാര് ആര്, ആലുവ നാര്ക്കോട്ടിക് ഡിവൈഎസ്പി ഉമേഷ് കുമാര് ജെ., ഭാരത മാത കോളേജ് പ്രിന്സിപ്പല് ഡോ. സൗമ്യ തോമസ്, എന് എസ് എസ് ജില്ലാ കോര്ഡിനേറ്റര് ഫാ. എല്ദോസ് ജോയ്, ജില്ലാ സാമൂഹ്യ നീതി ഓഫീസര് ജോണ് ജോഷി കെ.ജെ. തുടങ്ങിയവര് സംബന്ധിച്ചു.
