കോഴിക്കോട്: ദേശീയപാത ബൈപ്പാസിൽ ടോൾ നൽകാതെ കടന്നുപോകുന്ന വാഹനങ്ങൾക്കെതിരെ നടപടി ശക്തമാക്കി പോലീസ്. ടോൾ പ്ലാസ അധികൃതർ നൽകിയ വിവരങ്ങളുടെ അടിസ്ഥാനത്തിൽ ടോൾ വെട്ടിച്ച് പോയ വാഹനങ്ങളുടെ ഉടമകൾക്ക് പിഴ ചുമത്താൻ തുടങ്ങി. ഇന്നലെ മാത്രം 86 വാഹനങ്ങളും ഇന്ന് ഉച്ചയ്ക്ക് ഒരു മണിവരെ 32 വാഹനങ്ങളും ടോൾ നൽകാതെ കടന്നുപോയതായാണ് കണക്ക്. ടോൾ നൽകാതെ പോകുന്ന വാഹനങ്ങൾക്ക് ആയിരം രൂപയാണ് ട്രാഫിക് പോലീസ് പിഴ ഈടാക്കുന്നത്.
ടോൾ നൽകാൻ വിസമ്മതിക്കുന്നവരുമായുള്ള തർക്കങ്ങൾ ഒഴിവാക്കാൻ പ്ലാസയിലെ ജീവനക്കാർ വാഹനങ്ങൾ തടഞ്ഞുനിർത്തുന്നത് നിർത്തിയതോടെയാണ് ടോൾ വെട്ടിപ്പ് വ്യാപകമായത്. ടോൾ നൽകാതെ കടന്നുപോകുന്നവയിൽ ഭൂരിഭാഗവും കാറുകളാണ്. നിയമലംഘനം നടത്തുന്ന വാഹനങ്ങളുടെ വിവരങ്ങൾ ടോൾ പ്ലാസ അധികൃതർ കൃത്യമായി പോലീസ് കൈമാറുന്നുണ്ട്. ഇത്തരത്തിൽ പിടിക്കപ്പെടുന്ന വാഹന ഉടമകൾക്ക് പിഴയടക്കം കനത്ത തുക നഷ്ടമാകുമെന്ന് പോലീസ് മുന്നറിയിപ്പ് നൽകി.
