പെരിന്തല്മണ്ണ: ജില്ലാ ആശുപത്രിയുടെ സമഗ്ര വികസനത്തിന് ആരോഗ്യവകുപ്പ് അംഗീകാരം നല്കി. ആരോഗ്യവകുപ്പ് മന്ത്രി കെ. മുരളീധരന്റെ അധ്യക്ഷതയില് തിരുവനന്തപുരത്ത് ചേര്ന്ന യോഗത്തിലാണ് തീരുമാനം. ആശുപത്രിയിലെ അത്യാഹിത വിഭാഗം കെട്ടിട നിര്മ്മാണത്തിനായി 2020-ല് കിഫ്ബി അനുവദിച്ച 12 കോടി രൂപ ലഭ്യമാക്കാനുള്ള നടപടികള് വേഗത്തിലാക്കും. ഡ്രൈനേജ് പ്രശ്നങ്ങള്ക്ക് പരിഹാരമായി നജീബ് കാന്തപുരം എം.എല്.എയുടെ ഫണ്ടില് നിന്നുള്ള മൂന്ന് കോടി രൂപ വിനിയോഗിച്ച് മോഡുലാര് സീവേജ് ട്രീറ്റ്മെന്റ് പ്ലാന്റ് അടിയന്തിരമായി സ്ഥാപിക്കും. അടിസ്ഥാന സൗകര്യ വികസനത്തിനായി ബജറ്റില് വകയിരുത്തിയ ഒരു കോടി രൂപയുടെ പ്രവൃത്തികളും ഉടന് പൂര്ത്തിയാക്കും. ആശുപത്രിയില് നിലവില് ഉപയോഗിക്കാതെ കിടക്കുന്ന ഉപകരണങ്ങള് പ്രവര്ത്തനക്ഷമമാക്കാനും, കിടത്തിച്ചികിത്സ വര്ദ്ധിപ്പിക്കാനും, മാതൃ-ശിശു വിഭാഗം പ്രത്യേക യൂണിറ്റായി മാറ്റാനും യോഗം തീരുമാനിച്ചു. വികസന കാര്യങ്ങളെക്കുറിച്ച് പഠിക്കാന് ആരോഗ്യ വകുപ്പിലെ ഉന്നത ഉദ്യോഗസ്ഥര് ഈ ആഴ്ച തന്നെ ആശുപത്രി സന്ദര്ശിച്ച് 10 ദിവസത്തിനകം റിപ്പോര്ട്ട് സമര്പ്പിക്കും.
വര്ഷങ്ങളായി മുടങ്ങിക്കിടന്ന മേലാറ്റൂര് സാമൂഹികാരോഗ്യ കേന്ദ്രത്തിലെ കിടത്തിച്ചികിത്സ ഘട്ടങ്ങളായി പുനരാരംഭിക്കാനും യോഗത്തില് തീരുമാനമായി. ആദ്യഘട്ടത്തില് 30 പേരെ കിടത്തിച്ചികിത്സിക്കാനുള്ള സൗകര്യമൊരുക്കും. മേലാറ്റൂര് സി.എച്ച്.സിയെ 15-ാം ഫിനാന്സ് കമ്മീഷന് ഗ്രാന്റ് പട്ടികയില് ഉള്പ്പെടുത്തുന്നത് അനുഭാവപൂര്വ്വം പരിഗണിക്കുമെന്ന് മന്ത്രി ഉറപ്പുനല്കി.
