കല്പ്പറ്റ: കള്ളാടിയിലെ മണ്ണിടിച്ചില് ദുരന്തം പരിസ്ഥിതി പ്രശ്നം മൂലം സംഭവിച്ചതല്ലെന്നു പ്രതിപക്ഷനേതാവ് പിണറായി വിജയന്. ഒരു പരിസ്ഥിതി പ്രശ്നവുമില്ലാത്ത പ്രദേശമായാലും നിര്മാണസമയത്ത് വെട്ടിയെടുത്ത മണ്ണ് മുന്കരുതലില്ലാതെ കൂട്ടിവച്ചാല് സംഭവിക്കാവുന്ന അപകടമാണിതെന്നും പിണറായി പറഞ്ഞു. ദുരന്തമേഖല സന്ദര്ശിച്ചശേഷം മാധ്യമങ്ങളോട് പ്രതികരിക്കുകയായിരുന്നു അദ്ദേഹം.
വീഴ്ചകള് മറച്ചുവയ്ക്കാനായി ബോധപൂര്വം വിവാദമുണ്ടാക്കാന് ശ്രമിക്കുകയാണ് സര്ക്കാര്. തുരങ്കപാതയ്ക്കു പാരിസ്ഥിതികാനുമതി ലഭിച്ചതു സൂത്രപ്പണിയിലൂടെയല്ല. സുതാര്യമായാണ് എല്ലാ പഠനങ്ങളും നടത്തിയത്. 2022-ല് കേന്ദ്ര-സംസ്ഥാന ഏജന്സികള് നടത്തിയ പഠനങ്ങളേത്തുടര്ന്ന് 2023-ലാണ് പദ്ധതിക്കു വിവിധ അനുമതികള് ലഭിച്ചത്. അതിനെതിരായ ഹര്ജികള് കഴിഞ്ഞ ഡിസംബര് 16-ന് ഹൈക്കോടതി തള്ളി. ഇത് സുപ്രീം കോടതിയും ശരിവച്ചു. കോടതി അംഗീകരിച്ച അനുമതി കണ്ടില്ലെന്നു നടിച്ചാണ് മുഖ്യമന്ത്രി ലാഘവത്തോടെ പ്രതികരിക്കുന്നത്. പാരിസ്ഥിതികാനുമതി സമ്മര്ദം ചെലുത്തി വാങ്ങിയതാണെന്ന ആരോപണം കോടതിയോടുള്ള അവഹേളനമാണ്.
മന്ത്രിമാര് ഉത്തരവാദിത്വങ്ങളില്നിന്ന് ഒഴിഞ്ഞുമാറി പലരെയും പഴിചാരുകയാണ്. തുരങ്കപാത നിര്മാണത്തിന്റെ ഭാഗമായി കൂട്ടിയിട്ടിരുന്ന വലിയ മണ്കൂനകള് നീക്കം ചെയ്ാന് ഉന്നതതലയോഗം നിര്ദേശിച്ചിരുന്നതാണ്. രണ്ടാഴ്ചയോളം സമയം ലഭിച്ചിട്ടും കൊങ്കണ് റെയില്വേയോ സര്ക്കാര് സംവിധാനങ്ങളോ മണ്ണ് നീക്കിയില്ല. മണ്ണ് നീക്കാനുള്ള തീരുമാനം അട്ടിമറിച്ചത് ദുരന്തത്തിന്റെ ആക്കം കൂട്ടി. ദുരന്തത്തിനു തൊട്ടുമുമ്പ് കനത്തമഴ പെയ്തിട്ടും ജില്ലയില് യെലോ അലെര്ട്ട് മാത്രമാണുണ്ടായിരുന്നത്. അപകടമുന്നറിയിപ്പ് നല്കുന്നതിലും സുരക്ഷാമുന്കരുതല് സ്വീകരിക്കുന്നതിലും സര്ക്കാരിന്റെ കുറ്റകരമായ അനാസ്ഥയുണ്ട്. ദുരന്തമുണ്ടായശേഷമാണ് ജില്ലയില് റെഡ് അലെര്ട്ട് പ്രഖ്യാപിച്ചത്. കാണാതായവര്ക്കായുള്ള തെരച്ചില് ഊര്ജിതമാക്കണം. ദുരിതാശ്വാസപ്രവര്ത്തനങ്ങള്ക്ക് പ്രതിപക്ഷത്തിന്റെ പിന്തുണയുണ്ടാകുമെന്നും പിണറായി വ്യക്തമാക്കി.
