ചെന്നൈ: ഓസ്ട്രേലിയയില് ഐപിഎല് മത്സരങ്ങള് നടക്കുമെന്ന ചര്ച്ചകള് സജീവമായിരിക്കെ, ഓസ്ട്രേലിയന് ട്വന്റി-20 ലീഗായ ബിഗ് ബാഷ് ലീഗിന് ആദ്യമായി ഇന്ത്യ വേദിയാകുന്നു. ബിബിഎല്ലിന്റെ ചരിത്രത്തിലാദ്യമായി രാജ്യത്തിന് പുറത്ത് നടക്കുന്ന മത്സരത്തിന് ചെന്നൈയാണ് ആതിഥേയത്വം വഹിക്കുന്നത്. മെല്ബണ് റെനഗേഡ്സും പെര്ത്ത് സ്കോര്ച്ചേഴ്സും തമ്മിലാണ് ഈ ചരിത്ര പോരാട്ടം.
വരുന്ന ഡിസംബര് 12-ന് ചെന്നൈയിലെ വിഖ്യാതമായ എം.എ. ചിദംബരം (ചേപ്പോക്ക്) സ്റ്റേഡിയത്തിലാണ് ഈ ചരിത്ര മത്സരം അരങ്ങേറുന്നത്. ഇന്ത്യയും ഓസ്ട്രേലിയയും തമ്മിലുള്ള ഇരുപക്ഷ നയതന്ത്ര-സൗഹൃദ ബന്ധങ്ങള് കൂടുതല് ദൃഢമാക്കുന്നതിനായുള്ള 'ജി'ഡേ നമസ്തേ' എന്ന ബൃഹത് പദ്ധതിയുടെ ഭാഗമായാണ് ക്രിക്കറ്റ് മത്സരം സംഘടിപ്പിക്കുന്നത്. വെള്ളിയാഴ്ച മെല്ബണ് ക്രിക്കറ്റ് ഗ്രൗണ്ടില് വെച്ച് ഇന്ത്യന് പ്രധാനമന്ത്രി നരേന്ദ്ര മോദിയും ഓസ്ട്രേലിയന് പ്രധാനമന്ത്രി ആന്റണി ആല്ബനീസും ചേര്ന്നാണ് ഈ സുപ്രധാന പ്രഖ്യാപനം നടത്തിയത്.
ടൂര്ണമെന്റില് മെല്ബണ് റെനഗേഡ്സിന്റെ ഹോം മാച്ചായാണ് ഈ ചെന്നൈ മത്സരം കണക്കാക്കപ്പെടുക. മത്സരം കഴിഞ്ഞ ഉടന് തന്നെ ഇരു ടീമുകള്ക്കും ഓസ്ട്രേലിയയില് തിരിച്ചെത്തി അടുത്ത റൗണ്ടുകളില് പങ്കെടുക്കാന് ആവശ്യമായ വിശ്രമസമയം ലീഗ് അധികൃതര് ഉറപ്പുവരുത്തുന്നുണ്ട്. ബിബിഎല്ലിന്റെ 16-ാം സീസണിന്റെ ഔദ്യോഗിക മത്സരപ്പട്ടിക അടുത്ത ആഴ്ച പുറത്തുവിടും.
ഏകദേശം 38,000 കാണികളെ ഉള്ക്കൊള്ളാന് ശേഷിയുള്ളതാണ് ചേപ്പോക്ക് സ്റ്റേഡിയം. ഇന്ത്യന് ടീമുകളോ കളിക്കാരോ ഇല്ലെങ്കില് പോലും ചെന്നൈയിലെ കടുത്ത ക്രിക്കറ്റ് പ്രേമികള് സ്റ്റേഡിയം നിറയ്ക്കുമെന്ന വലിയ പ്രതീക്ഷയിലാണ് ക്രിക്കറ്റ് ഓസ്ട്രേലിയ.
ബിഗ് ബാഷ് ലീഗ് ഫ്രാഞ്ചൈസികളില് സ്വകാര്യ നിക്ഷേപം കൊണ്ടുവരുന്നതിനെക്കുറിച്ചുള്ള ചര്ച്ചകള് പുരോഗമിക്കുന്ന പശ്ചാത്തലത്തിലാണ് ഈ നീക്കമെന്നത് ശ്രദ്ധേയമാണ്. നിലവില് ചെന്നൈയിലെ ഈ മത്സരത്തെ ഒരു പരീക്ഷണാടിസ്ഥാനത്തിലാണ് ക്രിക്കറ്റ് ഓസ്ട്രേലിയ കാണുന്നത്. കളി വന് വിജയമാവുകയും ഇരു രാജ്യങ്ങളിലെയും സര്ക്കാരുകളുടെ അനുമതികള് ലഭിക്കുകയും ചെയ്താല്, എല്ലാ വര്ഷവും ബിബിഎല്ലിന്റെ ഒരു മത്സരം ഇന്ത്യയില് നടത്തുന്ന രീതിയിലേക്ക് കാര്യങ്ങള് മാറിയേക്കാം.
