ആരാധകനില് നിന്നും നേരിടേണ്ടി വന്ന ഞെട്ടിപ്പിക്കുന്ന അനുഭവം വെളിപ്പെടുത്തി നടി അവന്തിക മോഹന്. മാസ്ക് ധരിച്ച് നിന്നിട്ടും തന്നെ തിരിച്ചറിഞ്ഞ ആരാധകന് ആവശ്യം തന്റെ ഫോണ് നമ്പര് ആയിരുന്നുവെന്നും നല്കില്ലെന്നു പറഞ്ഞിട്ടും അയാള് കാറില് വന്ന് പിന്തുടര്ന്നെന്നും അവന്തിക പറയുന്നു.
‘ഇന്നലെ എനിക്ക് ഇതുവരെ ഉണ്ടായതില്വെച്ച് ഏറ്റവും വിചിത്രമായ ഒരനുഭവമുണ്ടായി. മാസ്ക് ധരിച്ച് പുറത്തുനില്ക്കുന്ന സമയത്ത് ഒരു മനുഷ്യന് പെട്ടെന്ന് എന്റെ അടുത്തേക്ക് വന്നു. ഞാന് അവന്തികയാണോ എന്ന് ചോദിച്ചു. ഞാന് വ്യക്തമായി വേണ്ടെന്ന് പറഞ്ഞിട്ടും പ്രോജക്ടുകള്ക്ക് വേണ്ടി എന്റെ നമ്പര് വേണമെന്ന് അയാള് നിര്ബന്ധിച്ചു.
ഞാന് മര്യാദയോടെ നിരാകരിച്ചെങ്കിലും അയാള് പിന്മാറിയില്ല. എന്റെ കൂട്ടുകാരി ഞങ്ങളെ വെറുതെ വിടാന് ആവശ്യപ്പെട്ടു. ഉടന് തന്നെ അവിടെ നിന്ന് നടന്നുപോയി. കുറച്ച് നിമിഷങ്ങള് കഴിഞ്ഞപ്പോള് അയാളുടെ കാര് ഞങ്ങളെ പിന്തുടരുകയാണെന്ന് ഞാൻ മനസ്സിലാക്കി.
പെട്ടെന്ന് കുറച്ച് ആളുകളുള്ള ഒരിടത്ത് നിന്ന് അയാളെ നേരിട്ടു. ഈ സ്വഭാവം തുടരുകയാണെങ്കിൽ നിയമനടപടി സ്വീകരിക്കുമെന്ന് അയാളോട് പറഞ്ഞു. ഉടനെ അയാള് കരയാന് തുടങ്ങി. മാഡം എനിക്ക് നിങ്ങളെ ഇഷ്ടമാണ് എന്ന് പറഞ്ഞു. ഇന്സ്റ്റഗ്രാമില് എപ്പോഴെങ്കിലും മറുപടി കൊടുക്കുമോ എന്ന് ചോദിച്ചു. ആ നിമിഷത്തെ സുരക്ഷയെക്കരുതി ഞാന് സമ്മതിച്ചു. ഭാഗ്യത്തിന് അയാള് അവിടെ നിന്നും പോയി.
ജീവിതത്തില് അസ്വാഭാവിക സ്വഭാവമുള്ള പല സൈക്കോകളേയും കണ്ടിട്ടുണ്ട്. പക്ഷെ ഇത് സത്യസന്ധമായി പറഞ്ഞാല്, മറ്റൊരു തരത്തിലുള്ള അസ്വസ്ഥതയായിരുന്നു. ദയവായി ഒരാള് നോ എന്ന് പറഞ്ഞാല് അത് മാനിക്കുക. അതിരുകള് കടക്കരുത്-’ അവന്തികയുടെ വാക്കുകള്.
