ഒരുകാലത്ത് മഴക്കാലരോഗങ്ങളുടെ പട്ടികയില് ഒതുങ്ങിയിരുന്ന ഡെങ്കിപ്പനി ഇന്ന് ഇന്ത്യയുടെ പൊതുജനാരോഗ്യ സംവിധാനത്തെ നിരന്തരം പരീക്ഷിക്കുന്ന ദേശീയ വെല്ലുവിളിയായി മാറിക്കഴിഞ്ഞിരിക്കുന്നു. രോഗബാധിതരുടെ എണ്ണത്തിലെ വര്ധന മാത്രമല്ല, വൈറസിന്റെ സ്വഭാവത്തിലും രോഗവ്യാപനത്തിന്റെ രീതിയിലും സംഭവിക്കുന്ന മാറ്റങ്ങളാണ് കൂടുതല് ആശങ്കപ്പെടുത്തുന്നത്. ഇന്ത്യന് കൗണ്സില് ഓഫ് മെഡിക്കല് റിസര്ച്ചിന്റെ (ഐ.സി.എം.ആര്.) ഏറ്റവും പുതിയ രാജ്യവ്യാപക പഠനം നല്കുന്ന മുന്നറിയിപ്പ് അതുകൊണ്ടുതന്നെ ഗൗരവത്തോടെ കാണേണ്ടതാണ്.
ഇന്ത്യയിലെ പല സംസ്ഥാനങ്ങളിലും ഡെങ്കി വൈറസിന്റെ നാല് വകഭേദങ്ങളും ഒരേസമയം സജീവമാണെന്നാണ് പഠനത്തില് കണ്ടെത്തിയത്. ഇത് രാജ്യത്തിന്റെ പൊതുജനാരോഗ്യ നയങ്ങള് പുതുക്കിയെഴുതേണ്ട സാഹചര്യം സൃഷ്ടിക്കുന്ന വിവരമാണ്. ഇതുവരെ ഒരു പ്രദേശത്ത് ഒരു പ്രത്യേക വൈറസ് വകഭേദം ആധിപത്യം പുലര്ത്തുന്നതാണ് സാധാരണ കാഴ്ചയെങ്കില്, ഇപ്പോള് ഒരേ സമയത്ത് ഒന്നിലധികം വകഭേദങ്ങള് ഒരുമിച്ച് വ്യാപിക്കുന്ന അവസ്ഥയിലേക്കാണ് ഇന്ത്യ നീങ്ങുന്നത്. പൊതുജനാരോഗ്യശാസ്ത്രത്തില് ഇതിനെ ഹൈപ്പര്എന്ഡെമിസിറ്റി എന്നാണ് വിശേഷിപ്പിക്കുന്നത്. രോഗം ഒരു പ്രദേശത്ത് സ്ഥിരസാന്നിധ്യമായി മാറുന്നതിനെക്കാള് ഗുരുതരമായ അവസ്ഥയാണിത്.
ഡെങ്കിപ്പനി ഒരൊറ്റ വൈറസ് മൂലമുണ്ടാകുന്ന രോഗമല്ല. നാല് വ്യത്യസ്ത സെറോടൈപ്പുകളാണ് രോഗത്തിന് പിന്നിലുള്ളത്. ഒരുതരം വൈറസ് ബാധിച്ച് രോഗമുക്തി നേടിയാല് മറ്റൊരു സെറോടൈപ്പില്നിന്ന് പൂര്ണ സംരക്ഷണം ലഭിക്കില്ല. മറിച്ച് പിന്നീട് മറ്റൊരു വകഭേദം ബാധിക്കുമ്പോള് രോഗം കൂടുതല് സങ്കീര്ണമാകാനുള്ള സാധ്യത ഉയരുമെന്നാണ് ശാസ്ത്രലോകം ചൂണ്ടിക്കാട്ടുന്നത്. ഇപ്പോള് ഒരേ വ്യക്തിയില് ഒരേസമയം രണ്ടോ അതിലധികമോ വൈറസ് വകഭേദങ്ങള് കണ്ടെത്തുന്ന സാഹചര്യം രൂപപ്പെടുന്നത് ആ ആശങ്ക കൂടുതല് ശക്തമാക്കുകയാണ്.
നഗരവല്ക്കരണവും നിയന്ത്രണമില്ലാത്ത നിര്മാണപ്രവര്ത്തനങ്ങളും കാലാവസ്ഥാ വ്യതിയാനവും ഡെങ്കിയുടെ വ്യാപനത്തിന് അനുകൂലമായ സാഹചര്യങ്ങളാണ് സൃഷ്ടിച്ചിരിക്കുന്നത്. മുമ്പ് മഴക്കാലത്ത് മാത്രം സജീവമായിരുന്ന രോഗം ഇന്ന് വിവിധ സംസ്ഥാനങ്ങളില് വര്ഷത്തില് പലപ്പോഴും റിപ്പോര്ട്ട് ചെയ്യപ്പെടുന്നു. ചൂടും ഈര്പ്പവും കൂടിയ നഗരപ്രദേശങ്ങളില് കൊതുകുകളുടെ പ്രജനനകാലം ദീര്ഘിക്കുന്നതും രോഗവ്യാപനം തുടര്ച്ചയാകാന് കാരണമാകുന്നു. കേരളം ഉള്പ്പെടെയുള്ള സംസ്ഥാനങ്ങളില് എല്ലാ വര്ഷവും ആവര്ത്തിക്കുന്ന ഡെങ്കി വ്യാപനം ഇതിന്റെ തെളിവാണ്.
പൊതുജനാരോഗ്യരംഗം ഇന്ന് ഒരു പുതിയ യാഥാര്ഥ്യം അംഗീകരിക്കേണ്ടിവരുന്നു. രോഗബാധിതരുടെ എണ്ണം മാത്രം കണക്കാക്കുന്ന നിരീക്ഷണ സംവിധാനം ഇനി മതിയാകില്ല. ഏത് വൈറസ് വകഭേദമാണ് ഏത് പ്രദേശത്ത് പ്രബലമാകുന്നത്, അതില് എന്തെല്ലാം മാറ്റങ്ങള് സംഭവിക്കുന്നു, രോഗതീവ്രതയുമായി അതിന് എന്ത് ബന്ധമുണ്ട് എന്നിവ കൃത്യമായി മനസിലാക്കുന്ന ജനിതക നിരീക്ഷണ സംവിധാനമാണ് ഇനി അനിവാര്യം. കോവിഡ് മഹാവ്യാധിക്കാലത്ത് വൈറസിന്റെ വകഭേദങ്ങള് നിരീക്ഷിക്കാന് ഇന്ത്യ വികസിപ്പിച്ച ശാസ്ത്രീയ ശേഷി ഡെങ്കി ഉള്പ്പെടെയുള്ള മറ്റ് പകര്ച്ചവ്യാധികളിലേക്കും വ്യാപിപ്പിക്കേണ്ട സമയമാണിത്.
ഡെങ്കിക്കെതിരായ വാക്സിന് വികസനവും ഈ പുതിയ സാഹചര്യത്തില് കൂടുതല് സങ്കീര്ണമാകുന്നു. ഒരു വൈറസ് വകഭേദത്തിനെതിരേ മികച്ച പ്രതിരോധശേഷി നല്കുന്ന വാക്സിന് മറ്റൊരു വകഭേദത്തില് അതേ ഫലം നല്കണമെന്നില്ല. അതുകൊണ്ടുതന്നെ രാജ്യത്ത് പ്രബലമായ സെറോടൈപ്പുകളുടെ നിരന്തരമായ ശാസ്ത്രീയ നിരീക്ഷണം ഇല്ലാതെ ദേശീയ വാക്സിനേഷന് നയം രൂപപ്പെടുത്തുന്നത് പ്രായോഗികമല്ല. ഇന്ത്യയില് വികസിപ്പിച്ചുകൊണ്ടിരിക്കുന്ന ഡെങ്കി വാക്സിനുകളുടെ ഫലപ്രാപ്തി വിലയിരുത്തുമ്പോഴും ഈ യാഥാര്ഥ്യം പരിഗണിക്കേണ്ടിവരും.
ഡെങ്കിക്കെതിരായ പോരാട്ടം ലബോറട്ടറികളില് മാത്രം ജയിക്കാനാവില്ല. നഗരഭരണകൂടങ്ങള്, തദ്ദേശസ്വയംഭരണ സ്ഥാപനങ്ങള്, ആരോഗ്യവകുപ്പ്, വിദ്യാഭ്യാസ സ്ഥാപനങ്ങള്, പൊതുസമൂഹം എന്നിവയുടെ സംയുക്ത ഉത്തരവാദിത്വമായാണ് ഇതിനെ കാണേണ്ടത്. വീടുകളിലെയും പൊതുസ്ഥലങ്ങളിലെയും വെള്ളക്കെട്ടുകള് ഒഴിവാക്കുന്നതു മുതല് നഗരാസൂത്രണത്തില് മഴവെള്ളസംഭരണത്തിന്റെയും മാലിന്യസംസ്കരണത്തിന്റെയും ശാസ്ത്രീയ സംവിധാനങ്ങള് ഉറപ്പാക്കുന്നതുവരെ നിരവധി മേഖലകളില് ഏകോപിതമായ ഇടപെടല് ആവശ്യമാണ്. ഓരോ വര്ഷവും മഴക്കാലത്ത് ശുചീകരണ ക്യാമ്പയിനുകള് സംഘടിപ്പിക്കുന്നത് മാത്രം മതിയാകാത്ത ഘട്ടത്തിലേക്കാണ് രാജ്യം കടന്നിരിക്കുന്നത്.
കേരളത്തിന്റെ അനുഭവവും ഇതിന് പാഠമാണ്. ഉയര്ന്ന സാക്ഷരതയും മികച്ച ആരോഗ്യസൗകര്യങ്ങളും ഉണ്ടായിട്ടും ഡെങ്കിപ്പനി നിയന്ത്രിക്കുന്നതില് സംസ്ഥാനം വര്ഷംതോറും വെല്ലുവിളി നേരിടുന്നു. അതിനര്ഥം രോഗനിയന്ത്രണം ചികിത്സയുടെ പ്രശ്നം മാത്രമല്ലെന്നും പരിസ്ഥിതി, നഗരവികസനം, പൊതുജനപങ്കാളിത്തം എന്നിവയെല്ലാം ചേര്ന്നുള്ള സാമൂഹിക പ്രശ്നമാണെന്നുമാണ്.
ഡെങ്കിപ്പനിയെ സീസണല് പനിയായി കാണുന്ന സമീപനം ഉപേക്ഷിക്കേണ്ട സമയമാണിത്. വൈറസ് മാറുകയാണ്;അതിനനുസരിച്ച് നമ്മുടെ നയങ്ങളും മാറണം. രോഗം വന്നാല് ചികിത്സിക്കുക എന്നതില്നിന്ന് രോഗത്തിന്റെ ജനിതക സ്വഭാവം മനസിലാക്കി മുന്കരുതലെടുക്കുക എന്ന ശാസ്ത്രീയ സമീപനത്തിലേക്കുള്ള മാറ്റമാണ് ഇന്ത്യയുടെ പൊതുജനാരോഗ്യ സംവിധാനത്തിന് ഇനി അനിവാര്യം.
ഐ.സി.എം.ആറിന്റെ പുതിയ പഠനം ഭാവിയിലേക്കുള്ള മുന്നറിയിപ്പുകൂടിയാണ്. ആ മുന്നറിയിപ്പ് സമയോചിതമായി കേള്ക്കുകയും പ്രതിരോധനയങ്ങള് ശക്തിപ്പെടുത്തുകയും ചെയ്താല് ഡെങ്കിയുടെ അടുത്ത ഘട്ടത്തെ നേരിടാന് ഇന്ത്യയ്ക്ക് കഴിയും. അല്ലാത്തപക്ഷം, വര്ഷംതോറും ആവര്ത്തിക്കുന്ന ഒരു മഴക്കാലരോഗമെന്ന പരിധി കടന്ന്, ദീര്ഘകാല ദേശീയാരോഗ്യ പ്രതിസന്ധിയായി ഡെങ്കി മാറാനുള്ള സാധ്യത തള്ളിക്കളയാനാവില്ല.
എ.ഐ.സി. റഹിം
Comments