ബ്രിജ്ഭൂഷണ് ശരണ് സിങ്ങിനെയും ദേശീയ ഗുസ്തി ഫെഡറേഷന്റെ മുന് സെക്രട്ടറി വിനോദ് തോമറിനെയും ഡല്ഹിയിലെ റൗസ് അവന്യൂ കോടതി കുറ്റവിമുക്തരാക്കിയതോടെ കഴിഞ്ഞ മൂന്നുവര്ഷമായി ഇന്ത്യന് കായികരംഗത്തെയും പൊതുസമൂഹത്തെയും പിടിച്ചുകുലുക്കിയ ഒരു അധ്യായത്തിന് നിയമപരമായ ഒരവസാനമുണ്ടായിരിക്കുകയാണ്. കോടതി വിചാരണ നടത്തി തെളിവുകളും സാക്ഷിമൊഴികളും പരിശോധിച്ചാണ് ഈ നിഗമനത്തിലെത്തിയത്. നിയമവാഴ്ചയില് വിശ്വസിക്കുന്ന ഒരു ജനാധിപത്യസമൂഹം കോടതി വിധിയെ ബഹുമാനിക്കേണ്ടത് അനിവാര്യമാണ്. അതേസമയം, ഈ കേസുയര്ത്തിയ ചോദ്യങ്ങള് വിധിയോടെ അവസാനിക്കുന്നില്ല എന്നതും അത്രതന്നെ പ്രധാനമാണ്.
ഈ സംഭവപരമ്പരയുടെ ഏറ്റവും വലിയ പാഠം കായികസംഘടനകളിലെ അധികാരഘടനയെക്കുറിച്ചുള്ളതാണ്. ഒരു ഫെഡറേഷന്റെ തലപ്പത്ത് ഇരിക്കുന്നവര് നിയമലംഘനം നടത്തിയെന്ന് കോടതി കണ്ടെത്തിയില്ലെങ്കിലും, അത്തരം സ്ഥാനങ്ങളിലുള്ളവര് സ്വഭാവശുദ്ധിയുടെയും പെരുമാറ്റമര്യാദയുടെയും ഏറ്റവും ഉയര്ന്ന നിലവാരം പുലര്ത്തേണ്ടവരാണ്. അധികാരം എന്നത് തീരുമാനമെടുക്കാനുള്ള അവകാശം മാത്രമല്ല;വിശ്വാസം കാത്തുസൂക്ഷിക്കാനുള്ള ഉത്തരവാദിത്വം കൂടിയാണ്.
ഈ കേസില് ആരോപണവുമായി രംഗത്തെത്തിയത് രാജ്യത്തിനുവേണ്ടി വര്ഷങ്ങളോളം വിയര്പ്പൊഴുക്കിയ വനിതാ ഗുസ്തി താരങ്ങളാണ്. ഒളിമ്പിക്സിലും ലോകവേദികളിലും ഇന്ത്യയുടെ പതാക ഉയര്ത്താന് പോരാടിയവരാണ് അവര്. അവരുടെ ആരോപണങ്ങള് കോടതി തെളിവുകളുടെ അടിസ്ഥാനത്തില് അംഗീകരിച്ചില്ല എന്നതുകൊണ്ട് മാത്രം അവരുടെ വേദനയും ആശങ്കയും സ്വാഭാവികമായും അസത്യമാണെന്ന് സമൂഹം വിധിയെഴുതരുത്. കോടതിവിധിയും വ്യക്തികളുടെ അനുഭവവും രണ്ടുതലങ്ങളിലാണ് വിലയിരുത്തപ്പെടുന്നത്. ഒന്നിനെ അംഗീകരിക്കാന് മറ്റൊന്നിനെ നിഷേധിക്കേണ്ട സാഹചര്യമില്ല.
കായികതാരങ്ങളുടെ ജീവിതം പുറമേ കാണുന്നതുപോലെ തിളക്കമുള്ളതല്ല. ബാല്യവും കൗമാരവും കുടുംബജീവിതവും പലപ്പോഴും മാറ്റിവച്ച് പരിശീലനക്യാമ്പുകളിലും മത്സരവേദികളിലുമാണ് അവര് ജീവിതത്തിന്റെ വലിയൊരു ഭാഗം ചെലവഴിക്കുന്നത്. പരിശീലകരോടും ഭരണാധികാരികളോടും സ്ഥാപനങ്ങളോടും അവര്ക്ക് അനിവാര്യമായ ആശ്രയബന്ധമുണ്ട്. അത്തരം സാഹചര്യത്തില് പരാതി ഉന്നയിക്കുന്നത് തന്നെ വലിയ മാനസികധൈര്യം ആവശ്യപ്പെടുന്ന കാര്യമാണ്. അതുകൊണ്ടുതന്നെ, ഒരു പരാതി ഉയരുമ്പോള് അതിനെ മുന്വിധികളില്ലാതെ കേള്ക്കുകയും, പരാതിക്കാരനെ അവഹേളിക്കാതിരിക്കുകയും ചെയ്യുക എന്നത് സമൂഹത്തിന്റെ ഉത്തരവാദിത്വമാണ്.
അതോടൊപ്പം, ആരോപണം ഉയര്ന്ന നിമിഷം തന്നെ ആരെയും കുറ്റവാളിയെന്ന മുദ്രകുത്തുന്നതും നീതിയല്ല. അന്വേഷണവും വിചാരണയും തെളിവുകളുടെ പരിശോധനയും പൂര്ത്തിയാകുന്നതുവരെ നിയമം നല്കുന്ന നിരപരാധിത്വത്തിന്റെ അനുമാനം ഓരോ പൗരനും ഒരുപോലെ ബാധകമാണ്. ഈ തുലനാവസ്ഥയാണ് ജനാധിപത്യനീതിയുടെ അടിത്തറ.
എന്നാല്, ഈ കേസിലൂടെ ഇന്ത്യന് കായികരംഗം ചില അനിവാര്യമായ പരിഷ്കാരങ്ങളുടെ ആവശ്യകത തിരിച്ചറിയണം. പരാതികള് സ്വതന്ത്രമായി അന്വേഷിക്കുന്ന സംവിധാനങ്ങള്, വനിതാ താരങ്ങള്ക്ക് വിശ്വാസത്തോടെ സമീപിക്കാവുന്ന പരാതിപരിഹാര സംവിധാനം, അധികാരസ്ഥാനങ്ങളിലുള്ളവരുടെ പെരുമാറ്റച്ചട്ടങ്ങള്, സുതാര്യമായ ഭരണരീതി എന്നിവ കൂടുതല് ശക്തിപ്പെടുത്തേണ്ട സമയമാണിത്. ഒരു പരാതിയും അവഗണിക്കപ്പെടരുത്.
കോടതി ഒരു കേസില് അന്തിമവിധി പറഞ്ഞുകഴിഞ്ഞു. എന്നാല്, ഇന്ത്യന് കായികരംഗം ഇനി അഭിമുഖീകരിക്കേണ്ട വലിയ വെല്ലുവിളി മറ്റൊന്നാണ്-താരങ്ങള്ക്ക് സുരക്ഷിതവും മാന്യവും ഭയരഹിതവുമായ അന്തരീക്ഷം ഉറപ്പാക്കുക. രാജ്യത്തിനുവേണ്ടി മെഡലുകള് നേടാന് ജീവിതം സമര്പ്പിച്ച കായികതാരങ്ങള്, പ്രത്യേകിച്ച് വനിതാ താരങ്ങള്, തങ്ങളുടെ ശബ്ദം ഉയര്ത്തുമ്പോള് അവരെ സംശയത്തിന്റെ കണ്ണിലൂടെ മാത്രമല്ല, ആദരവിന്റെയും കരുതലിന്റെയും കണ്ണിലൂടെ കൂടി കേള്ക്കാന് സമൂഹം പഠിക്കണം.
Comments